Asian paints Q1 Results: ఏషియన్ పెయింట్స్ నికర లాభంలో 80 శాతం పెరుగుదల

Asian paints Q1 Results: ఏషియన్ పెయింట్స్ ప్రస్తుత ఆర్థిక సంవత్సరం తొలి క్వార్టర్‌లో నికర లాభం 80 శాతం పెరిగినట్టు నివేదించింది.

గత ఏడాది జూన్‌తో ముగిసిన ఆర్థిక సంవత్సరంలో రూ. 574 కోట్ల నికర లాభం ఆర్జించగా ఇప్పుడది రూ. 1,036 కోట్లకు పెరిగినట్టు తెలిపింది. అలాగే ఆదాయం కూడా 54 శాతం పెరిగి రూ. 8,607 కోట్లకు చేరుకుంది. గత ఏడాది ఇదే క్వార్టర్‌లో రూ. 5,585 కోట్ల ఆదాయం సమకూరింది. కాగా కంపెనీ వాల్యూమ్ గడిచిన ఆరు క్వార్టర్లతో పోలిస్తే ఈ క్వార్టర్‌లోనే అత్యధికంగా నమోదైందని తెలిపింది.

దేశీయ డెకొరేటివ్ బిజినెస్ పటిష్టంగా ఉండడం, డిమాండ్ భారీగా పుంజుకోవడం కారణంగా జూన్‌తో ముగిసిన క్వార్టర్‌లో రెవెన్యూ భారీగా పెరిగింది. అయితే గత ఏడాది కోవిడ్ రెండో విడత ఆంక్షల కారణంగా రెవెన్యూ దెబ్బతిన్నదని కంపెనీ సీఈవో, మేనేజింగ్ డైరెక్టర్ అమిత్ సింగ్లే తెలిపారు. ఇండస్ట్రియల్ బిజినెస్, హోం ఇంప్రూవ్‌మెంట్ బిజినెస్ కూడా గత ఏడాది లో బేస్‌తో పోల్చితే రెండింతలైందని చెప్పారు.

ఇంటర్నేషనల్ మార్కెట్లలో కూడా డబుల్ డిజిట్ గ్రోత్ కనబరిచినట్టు కంపెనీ సీఈవో తెలిపారు.

ఇక జూన్ క్వార్టర్‌లో ఎబిటా 88.65 శాతం పెరిగింది. గ్రాస్ మార్జిన్ మాత్రం జూన్ 2021 క్వార్టర్‌తో పోలిస్తే స్వల్పంగా తగ్గి 40.26 శాతంగా ఉంది. ఇన్‌పుట్ వ్యయాలు పెరిగినందున ధరలు పెంచినప్పటికీ మార్జిన్ తక్కువగా ఉంది.

‘ముడి చమురు ధరల్లో అధిక ద్రవ్యోల్భణం కారణంగా జూన్‌తో ముగిసిన క్వార్టర్‌లో మార్జిన్‌పై తీవ్రమైన ప్రభావం పడింది…’ అని సీఈవో వివరించారు.

ఏషియన్ పెయింట్స్ 15 దేశాల్లో తన వ్యాపార కార్యకలాపాలు చేస్తుంది.

మొదటి క్వార్టర్ ఆదాయ ఫలితాలు వెల్లడించిన తరువాత ఏషియన్ పెయింట్స్ స్వల్పంగా లాభాల్లో ట్రేడవుతోంది.