Nandamuri Chaitanya Krishna Breathe: నంద‌మూరి వార‌సుడి కొత్త ప్ర‌య‌త్నం - బ్రీత్ మూవీ ఫ‌స్ట్ లుక్ రిలీజ్‌

Nandamuri Chaitanya Krishna Breathe: నంద‌మూరి ఫ్యామిలీ నుంచి మ‌రో హీరో టాలీవుడ్‌లోకి అరంగేట్రం చేయ‌బోతున్నాడు. బ్రీత్ అనే సినిమాతో నంద‌మూరి చైత‌న్య కృష్ణ కథానాయకుడిగా తొలి అడుగు వేయబోతున్నాడు. ఆదివారం ఈ సినిమా ఫ‌స్ట్‌లుక్ పోస్ట‌ర్‌ను నంద‌మూరి క‌ళ్యాణ్‌రామ్‌ రిలీజ్ చేశారు. న‌టుడిగా గ‌తంలో ప‌లు సినిమాలు చేశాడు చైత‌న్య కృష్ణ‌. బ్రీత్ సినిమాతో హీరోగా ఎంట్రీ ఇవ్వ‌బోతున్నాడు.

ఈ ఫ‌స్ట్ లుక్ పోస్ట‌ర్‌లో వ‌ర్షంలో గొడుగు ప‌ట్టుకొని సీరియ‌స్ లుక్‌లో చైత‌న్య కృష్ణ క‌నిపిస్తోన్నాడు. టైటిల్‌తో పాటు అంతిమ పోరాటం అనే క్యాప్ష‌న్ ఆస‌క్తిని పంచుతోంది. వంశీకృష్ణ ఆకెళ్ల‌ ద‌ర్శ‌క‌త్వం వ‌హిస్తోన్న ఈ సినిమాను దివంగ‌త ఎన్టీఆర్ మొద‌టి కొడుకు జ‌య‌కృష్ణ నిర్మిస్తోన్నారు.

త‌న‌యుడు చైత‌న్య కృష్ణ‌ను హీరోగా నిలబెట్టడం కోసం జ‌య‌కృష్ణ స్వ‌యంగా బ‌స‌వ‌తార‌కం క్రియేష‌న్స్ ప‌తాకంపై బ్రీత్ సినిమాను నిర్మిస్తోన్నారు. ఫ‌స్ట్‌లుక్ పోస్ట‌ర్ చూస్తుంటే సీరియ‌స్ సోష‌ల్ డ్రామాగా ఈ సినిమా తెర‌కెక్కుతోన్న‌ట్లు క‌నిపిస్తోంది.

ద‌ర్శ‌కుడు వంశీకృష్ణ ఆకెళ్ల‌కు ఇదే మొద‌టి సినిమా కాదు. గ‌తంలో ర‌క్ష‌, జ‌క్క‌న సినిమాల్ని తెర‌కెక్కించాడు. . ప్ర‌స్తుతం ఈ సినిమా షూటింగ్ శ‌ర‌వేవంగా జ‌రుగుతోన్న‌ట్లు స‌మాచారం. బ్రీత్ సినిమాకు మార్క్ కె రాబిన్ సంగీతాన్ని అందిస్తోన్నారు.