Keerthy Suresh: ఆకాశమే నీ హద్దురా ద‌ర్శ‌కురాలితో కీర్తిసురేష్ సినిమా

సూర్య హీరోగా న‌టించిన త‌మిళ చిత్రం సూరారైపొట్రు (తెలుగులో ఆకాశమే నీ హద్దురా పేరుతో రిలీజ్ అయింది) ఐదు జాతీయ అవార్డుల‌ను సొంతం చేసుకున్న‌ది. ఉత్త‌మ సినిమాతో పాటు ప‌లు విభాగాల్లో ఆస్కార్ రేసులో నిలిచి ద‌క్షిణాది సినిమా స‌త్తాను చాటింది. ఎయిర్ ద‌క్క‌న్ వ్య‌వ‌స్థాప‌కుడు జీఆర్ గోపీనాథ్ జీవితంతో స్ఫూర్తిదాయ‌కంగా ఈ సినిమాను తెర‌కెక్కించి ద‌ర్శ‌కురాలిగా ప్ర‌తిభ‌ను చాటుకున్నారు సుధా కొంగ‌ర‌. సూరారైపొట్రు సినిమాకుగాను బెస్ట్ స్క్రీన్‌ప్లే రైట‌ర్‌గా ఉషానాయ‌ర్‌తో క‌లిసి సుధా కొంగ‌ర జాతీయ అవార్డును ద‌క్కించుకున్న‌ది.

ప్ర‌స్తుతం అక్ష‌య్ కుమార్ హీరోగా సూరారైపొట్రు సినిమాను సుధా కొంగ‌ర హిందీలో రీమేక్ చేస్తున్నారు. ఈ రీమేక్ త‌ర్వాత ఆమె ఓ లేడీ ఓరియెంటెండ్ సినిమాను తెర‌కెక్కించ‌బోతున్న‌ట్లు వార్త‌లు వినిపిస్తున్నాయి. ఇందులో మ‌హాన‌టి సినిమాతో నేషనల్ అవార్డును అందుకున్న కీర్తిసురేష్ హీరోయిన్‌గా న‌టించ‌బోతున్న‌ట్లు స‌మాచారం. ఛాలెంజింగ్ స్క్రిప్ట్‌తో రూపుదిద్దుకోనున్న ఈ సినిమాలో కీర్తిసురేష్ పాత్ర స‌రికొత్త‌గా ఉండ‌నున్నట్లు వార్త‌లు వినిపిస్తున్నాయి.

కేజీఎఫ్ నిర్మాణ సంస్థ హోంబ‌లే ఫిల్మ్స్ ఈ లేడీ ఓరియెంటెడ్ చిత్రాన్ని నిర్మించ‌బోతున్న‌ట్లు తెలిసింది. సుధా కొంగ‌ర చెప్పిన క‌థ న‌చ్చ‌డంతో కీర్తిసురేష్ ఈ సినిమాకు గ్రీన్‌సిగ్న‌ల్ ఇచ్చిన‌ట్లు స‌మాచారం. త‌మిళంతో పాటు తెలుగులో ఒకేసారి ఈ సినిమాను రిలీజ్ చేయ‌బోతున్న‌ట్లు వార్త‌లు వినిపిస్తున్నాయి. త్వ‌ర‌లోనే ఈ సినిమాకు సంబంధించి అధికారిక ప్ర‌క‌ట‌న వెలువ‌డ‌నున్న‌ట్లు స‌మాచారం. ప్ర‌స్తుతం కీర్తిసురేష్ తెలుగులో చిరంజీవి భోళాశంక‌ర్ సినిమాలో కీల‌క పాత్ర పోషిస్తోంది. అలాగే నాని ద‌స‌రా సినిమాలో హీరోయిన్‌గా న‌టిస్తోంది.