Brahmastra Teaser | బ్రహ్మాస్త్ర కొత్త టీజర్‌లో నాగార్జున

రణ్‌బీర్‌ కపూర్‌, ఆలియా భట్‌లాంటి క్రేజీ కాంబినేషన్‌లో వస్తున్న మూవీ బ్రహ్మాస్త్ర. ఈ జోడీ తొలిసారి కలిసి నటించారు. ఈ మూవీ షూటింగ్‌లోనే ప్రేమలో పడ్డారు. రీసెంట్‌గా పెళ్లి కూడా చేసుకున్నారు. నిజానికి ఈ ప్రాజెక్ట్‌కు కరోనా దెబ్బ గట్టిగానే తగిలింది. ఎప్పుడో రెండేళ్ల కిందటే రిలీజ్‌ కావాల్సి ఉన్నా చాలా ఆలస్యమైంది. మొత్తానికి గత నెలలోనే షూటింగ్‌ పూర్తి చేసుకున్న ఈ సినిమాను సెప్టెంబర్‌ 9న రిలీజ్‌ చేయనున్నట్లు మేకర్స్‌ ప్రకటించారు.

ఇక ఇప్పుడు రిలీజ్‌కు సరిగ్గా వంద రోజులు ఉండటంతో ఓ కొత్త టీజర్‌ రిలీజ్‌ చేశారు. దీనికోసమే రణ్‌బీర్‌, రాజమౌళి, అయాన్‌ ముఖర్జీ విశాఖపట్నం వచ్చారు. ఈ టీజర్‌లోనే చివరికి ట్రైలర్‌ను జూన్‌ 15న రిలీజ్‌ చేయనున్నట్లు కూడా ప్రకటించారు. ఈ కొత్త టీజర్‌లో నాగార్జునతోపాటు అమితాబ్‌ బచ్చన్‌, మౌనీరాయ్‌లను కూడా చూడొచ్చు.

ఐదేళ్ల కిందట షూటింగ్‌ ప్రారంభమైన ఈ సినిమా.. ఈ ఏడాది రిలీజ్‌ కాబోతోందంటేనే ఎంత ఆలస్యమైందో అర్థం చేసుకోవచ్చు. ఈ సినిమాలో నాగార్జున ఓ ముఖ్యమైన పాత్రలో కనిపించాడు. బ్రహ్మాస్త్ర మూవీలో ఇది ఫస్ట్‌పార్ట్‌. దీని పేరు శివ. ఇక ఈ కొత్త టీజర్‌ను ఆలియా భట్‌ తన ఇన్‌స్టాలో షేర్‌ చేసింది. మరో వంద రోజుల్లో బ్రహ్మాస్త్ర మీదవుతుంది.. ట్రైలర్‌ జూన్‌ 15న రానుంది అని చెప్పింది.

అంతకుముందు విశాఖపట్నంలో రాజమౌళి, రణ్‌బీర్‌, అయాన్‌ ముఖర్జీలకు ఘన స్వాగతం లభించింది. వాళ్లకు సంబంధించిన ఫొటోలు సోషల్‌ మీడియాలో చెక్కర్లు కొట్టడంతో బ్రహ్మాస్త్రకు సంబంధించి ఏదో ముఖ్యమైన అప్‌డేట్‌ రాబోతోందని ఊహించారు. మేకర్స్‌ ఇప్పుడిలా టీజర్‌తో సర్‌ప్రైజ్‌ చేశారు. బ్రహ్మాస్త్ర మూవీని తెలుగులో రాజమౌళి సమర్పిస్తున్న విషయం తెలిసిందే.