FTX collapse : 1 బిలియన్ డాలర్ల కస్టమర్ల నిధులు మిస్సింగ్! అసలేం జరిగింది?
12 November 2022, 11:56 IST
- FTX collapse : దివాళా తీసిన ఎఫ్టీఎక్స్ క్రిప్టో ఎక్స్ఛేంజ్లో 1 బిలియన్ డాలర్ల కనస్టమర్ల నిధులు కనిపించడం లేదని సమాచారం. దీనిపై సంస్థ, సీఈఓ స్పందించలేదు.
ఎఫ్టీఎక్స్లో.. 1 బిలియన్ డాలర్ల కస్టమర్ల నిధులు మిస్సింగ్! అసలేం జరిగింది?
1 billion dollar client funds missing in FTX : క్రిప్టో ప్రపంచాన్ని కుదిపేసిన ఎఫ్టీఎక్స్ వ్యవహారంలో రోజుకో కొత్త విషయం బయటకొస్తోంది. తాజాగా.. ఎఫ్టీఎక్స్ క్రిప్టో ఎక్స్ఛేంజ్ నుంచి 1 బిలియన్ డాలర్ల కస్టమర్ల నిధులు మాయమైపోయినట్టు తెలుస్తోంది. ఇవి లెక్కల్లో కనిపించడం లేదని.. ఈ విషయంతో సంబంధం ఉన్న కొందరు అంతర్జాతీయ మీడియాకు వివరించారు.
ఎఫ్టీఎక్స్ ఎక్స్ఛేంజ్ వ్యవస్థాపకుడు సామ్ బాంక్మన్- ఫ్రైడ్.. ఎక్స్ఛేంజ్కు సంబంధించిన 10బిలియన్ డాలర్ల కస్టమర్ల నిధులను, తన సొంత ట్రేడింగ్ కంపెనీ అయిన అలమేడా రీసెర్చ్కు రహస్యంగా బదిలీ చేసినట్టు.. గతంలో వార్తలు వచ్చాయి. అప్పటి నుంచి.. కనీసం 1 బిలియన్ డాలర్ల కస్టమర్ల నగదు మిస్సింగ్ అని తాజాగా తేలింది. మొత్తం మీద 1.7బిలియన్ డాలర్ల నిధులు కనిపించడం లేదని కొందరు చెబుతుంటే.. 1-2 బిలియన్ డాలర్లు మిస్సింగ్ అని మరికొందరు అంటున్నారు.
ఆర్థికంగా కుదేలు..
ప్రపంచంలోనే రెండో అతిపెద్ద క్రిప్టో ఎక్స్ఛేంజ్ ప్లాట్ఫామ్గా గుర్తింపు పొందిన ఎఫ్టీఎక్స్.. దివాళా తీసే స్థితికి చేరింది. సంస్థలో అనేక ఆర్థికపరమైన లోపాలు ఉన్నట్టు గత వారం వార్తలు బయటకొచ్చాయి.
FTX CEO Bankman fried : కష్టాల్లో ఉన్న ఎఫ్టీఎక్స్ను ఆదుకునేందుకు ప్రపంచంలోనే అతిపెద్ద క్రిప్టో కరెన్సీ ప్లాట్ఫామ్ బినాన్స్ ముందుకొచ్చింది. కానీ సంస్థ ఆర్థిక వ్యవస్థలో అనేక లోపాలు ఉండటం చూసి వెనకడుగు వేసింది. చేసేదేమీ లేక.. దివాళాకు అప్లై చేసుకుంది ఎఫ్టీఎక్స్. కస్టమర్లు.. నిధులను విత్డ్రా చేసుకోకుండా ఆంక్షలు విధించింది.
అయితే.. 10 బిలియన్ డాలర్ల నగదును ఎఫ్టీఎక్స్ నుంచి రహస్యంగా తన సంస్థకు మార్చుకోలేదని బాంక్మన్ ఫ్రెడ్ చెబుతున్నారు. ఈ వార్తలను ఖండించారు. కానీ కనిపించకుండా పోయిన కస్టమర్ల నిధులపై మాత్రం బాంక్మన్ ఫ్రెడ్, ఎఫ్టీఎక్స్, అలమేడా ఇంకా స్పందించలేదు.
సంస్థ ఆర్థిక వ్యవస్థ అత్యంత దారుణంగా ఉన్నట్టు అందులోని చాలా మంది సీనియర్ అధికారులకు కూడా తెలియదు! గత ఆదివారం.. ఎఫ్టీఎక్స్తో ఒప్పందం నుంచి తప్పుకుంటున్నట్టు బినాన్స్ ప్రకటించడంతో పరిస్థితుల మరింత తీవ్రంగా మారాయి. అప్పుడే.. ఎఫ్టీఎక్స్ సీనియర్ అధికారులతో బాంక్మన్ ఫ్రైడ్ సమావేశమైనట్టు, అందులో కొన్ని విషయాలను చర్చించినట్టు తెలుస్తోంది. సంస్థను మళ్లీ గాడిన పడేసేందుకు బయట నుంచి ఎంత నిధులు తీసుకురావాలి? అన్న విషయంపైనా చర్చలు జరిగినట్టు సమాచారం. కానీ ఇవేవీ వర్కవుట్ అవ్వలేదని సంబంధిత వర్గాలు వెల్లడించాయి.
FTX collapse latest news : మిస్సింగ్లో ఉన్న 1-2 బిలియన్ డాలర్లు అలమేడా ఆస్తుల వివరాల్లో కూడా లేవని, బ్యాలెన్స్ షీట్లలో కూడా కనిపించడం లేదని సమాచారం. ఈ వ్యవహారంపై వేళ్లన్నీ బాంక్మన్ ఫ్రైడ్వైపే వెళుతున్నాయి. సంస్థ ఆర్థిక పరిస్థితులను దాచి పెట్టేందుకు.. అక్రమ మార్గం ద్వారా కొందరికి ఆయన భారీ మొత్తంలో నగదు చెల్లించినట్టు వార్తలు వస్తున్నాయి. అందుకే ఆ నగదు రికార్డుల్లో లేదని తెలుస్తోంది. అయితే.. ఈ ఆరోపణలను బాంక్మన్ ఫ్రైడ్ ఖండించారు.