Extra Marital Affair : భార్యతో ఎఫైర్.. ప్రియుడికి భర్త కరెంట్ షాక్.. రంగంలోకి పోలీస్ డాగ్

భార్యతో ప్రేమాయణం సాగిస్తున్నాడని ఓ వ్యక్తి పొరుగునే ఉన్న మరో వ్యక్తిని విద్యుదాఘాతంతో హతమార్చాడు. భర్తను పోలీసులు అరెస్టు చేశారు. వివాహేతర సంబంధమే ఈ ఘటనకు కారణంగా పోలీసులు గుర్తించారు.

విజయనగరం(Vizianagaram) జిల్లా సంతకవిటి పోలీస్‌స్టేషన్‌ పరిధిలోని ఎస్‌ఆర్‌ అగ్రహారం గ్రామ సమీపంలో బాధితుడు గోవిందరావు (28) శవమై కనిపించాడు. అయితే అతడు కొంతకాలం కిందటే.. తన కుటుంబంతో కలిసి జీవనోపాధి కోసం వైజాగ్ నగరానికి వెళ్లాడు.

ఇటీవల గోవిందరావు తన స్వగ్రామానికి ఒక ఫ్యామిలీ ఫంక్షన్‌కి హాజరయ్యాడు. మంగళవారం రాత్రి కనిపించకుండా పోయిన అతడు బుధవారం రాత్రి హత్యకు గురయ్యాడు. పోలీసు స్నిఫర్ డాగ్ నిందితుల ఇంటిని గుర్తించినట్లు సంతకవిటి పోలీసులు తెలిపారు. ఎస్‌ఆర్ అగ్రహారా(SR Agraharam)నికి చెందిన ఓ వివాహితతో అతడు అక్రమ సంబంధం పెట్టుకున్నాడని వెల్లడించారు.

మహిళ భర్త అప్పారావుకు ఇటీవలే ఎఫైర్ గురించి తెలిసింది. అతని స్నేహితుల సహాయంతో గోవిందరావును హత్య చేయాలని నిర్ణయించుకున్నాడు. మంగళవారం రాత్రి అప్పారావుతోపాటు కొందరు గోవిందరావును ఎస్‌ఆర్‌ అగ్రహారంలో పార్టీ కోసం ఆహ్వానించారు.

అక్కడ విద్యుదాఘాతంతో అతడిని హత్య చేసినట్లు పోలీసుల విచారణలో తేలింది. హంతకుల ఇంట్లో విద్యుదాఘాతానికి ఉపయోగించిన వస్తువులను గుర్తించడంలో పోలీస్ డాగ్ సహాయపడింది. ఈ మేరకు కేసు నమోదు చేసిన పోలీసులు నిందితులను అదుపులోకి తీసుకున్నారు.