Droupadi Murmu : వైసీపీ ప్రజాప్రతినిధులతో భేటీ కానున్న ద్రౌపది ముర్ము

రాష్ట్రపతి ఎన్నికల్లో ఎన్టీఏ అభ్యర్థిగా బరిలోకి దిగిన ద్రౌపది ముర్ము ఆంధ్రప్రదేశ్‌లో వైసీపీ ప్రజా ప్రతినిధులతో భేటీ కానున్నారు.

కేంద్రమంత్రి కిషన్‍రెడ్డితో కలిసి రాష్ట్రపతి అభ్యర్థి ద్రౌపది ముర్ము గన్నవరం రానున్నారు. మంత్రులు రోజా, జోగి రమేశ్, విజయసాయిరెడ్డి, బాలశౌరిలు ముర్ముకు స్వాగతం పలుకనున్నారు. మంగళగిరి సీకే కన్వెన్షన్‍లో వైసీపీ ఎమ్మెల్యేలు, ఎంపీలతో భేటీ అవుతారు. ఈ భేటీలో రాష్ట్రపతి ఎన్నికలో తన అభ్యర్ధిత్వాన్ని బలపరచాల్సిందిగా ముర్ము కోరనున్నారు. సాయంత్రం 5 గం.కు ఏపీ సీఎం జగన్‍తో భేటీ కానున్నారు.

మరోవైపు ముర్ము ఏపీ పర్యటన సందర్భంగా ఆమెతో టీడీపీ నేతలు ఆమెతో భేటీ కానున్నారు. ద్రౌపది అభ్యర్ధిత్వానికి టీడీపీ కొద్ది రోజుల క్రితం మద్దతు ప్రకటించింది. ఈ నేపథ్యంలో రాష్ట్ర పర్యటనకు వస్తున్న ముర్మును కలిసేందుకు చంద్రబాబు ఏర్పాట్లు చేసుకున్నారు. చివరి నిమిషంలో టీడీపీ ప్రజాప్రతినిధులతో ముర్ము అపాయింట్‌మెంట్‌ ఖరారు చేశారు. టీడీపీ ముర్ముకు మద్దతిస్తున్న సంగతి తమకు తెలియదని, బీజేపీ పెద్దల అనుమతితో అపాయింట్‌మెంట్ ఖరారు చేస్తామని కిషన్‌ రెడ్డి కార్యాలయం తెలిపినట్లు ప్రచారం జరుగుతోంది. రాష్ట్రపతి అభ్యర్థి ముర్ము గేట్‍వే హోటల్లో టీడీపీ అధినేత చంద్రబాబు, టీడీపీ నేతలతో భేటీ కానున్నారు. సమావేశం ముగిసిన తర్వాత విజయవాడ నుంచి బయలుదేరి వెళ్తారు.

ముర్ము తెలంగాణ పర్యటన రద్దు

మరోవైపు ద్రౌపది ముర్ము తెలంగాణ పర్యటన రద్దైంది. హైదరాబాద్‌లో ఎడతెరిపి లేకుండా వర్షాలు కురుస్తుండటంతో ఆమె పర్యటన రద్దు చేసుకున్నారు. షెడ్యూల్ ప్రకారం మంగళవారం సాయంత్రం 5.30 గంటలకు బేగంపేట ఎయిర్ పోర్ట్‌కి ఆమె చేరుకోవాల్సి ఉంది. బేగంపేట ఎయిర్ పోర్ట్ లో రాష్ట్రపతి అభ్యర్థికి ఘనస్వాగతం పలికిచేందుకు బీజేపీ నేతలు ఏర్పాట్లు కూడా చేసుకున్నారు.

సోమజిగూడలోని ఓ హోటల్‌లో మేధావులతో సమావేశంతో పాల్గొని ఆ తర్వాత బీజేపీ ముఖ్యనేతలతో మీటింగ్ ఏర్పాటు చేశారు. తిరిగి రాత్రి 7.40 గంటలకు తిరుగు ప్రయాణానికి షెడ్యూల్‌ రూపొందించారు. సమయాభావం, హైదరాబాద్‌లో వర్షాల వల్ల ద్రౌపది ముర్ము తెలంగాణకు రాలేకపోతున్నట్లు ప్రకటించారు. ఇతర రాష్ట్రాల పర్యటనలో ఉన్న ద్రౌపది ముర్ము సమయాభావం వల్ల హైదరాబాద్ రాలేకపోతున్నట్టు చెబుతున్నారు. భారత 16వ రాష్ట్రపతి ఎన్నికలు ఈ నెల 18వ తేదీన జరగనున్నాయి ప్రస్తుత రాష్ట్రపతి రామ్‌నాథ్ కోవింద్ పదవీకాలం ఈ నెల 24వ తేదీతో ముగియనుంది. జులై 25న కొత్త రాష్ట్రపతి ప్రమాణ స్వీకారం చేయనున్నారు.