TG CPGET 2024 Updates : 'సీపీగెట్' కౌన్సెలింగ్ షెడ్యూల్ లో మార్పులు - 8న ఫస్ట్ ఫేజ్ సీట్ల కేటాయింపు, కొత్త తేదీలివే

TG CPGET 2024 Counselling : తెలంగాణలోని పీజీ కోర్సుల్లో ప్రవేశాలకు సంబంధించి కీలక అప్డేట్ వచ్చేసింది. ఇప్పటికే కౌన్సెలింగ్ షెడ్యూల్ విడుదల కాగా.. అభ్యర్థులు వెబ్ ఆప్షన్లు కూడా ఇచ్చుకున్నారు. అయితే ఫస్ట్ ఫేజ్ సీట్ల కేటాయింపు సెప్టెంబర్ 8వ తేదీన ఉంటుందని తాజాగా అధికారులు ప్రకటించారు. ఈ మేరకు బుధవారం ఓ ప్రకటన విడుదల చేశారు.

ముందుగా నిర్ణయించిన షెడ్యూల్ ప్రకారం… సెప్టెంబర్ 4వ తేదీనే సీట్లు కేటాయించాల్సి ఉంది. కానీ కొన్ని కారణాలతో వాయిదా వేయాల్సి వచ్చిందని అధికారులు క్లారిటీ ఇచ్చారు. సీట్లు పొందే విద్యార్థులు సెప్టెంబర్ 13వ తేదీలోపు ఆయా కాలేజీల్లో రిపోర్ట్ చేయాల్సి ఉంటుందని స్పష్టం చేశారు. రెండో విడత కౌన్సెలింగ్‌ సెప్టెంబర్ 18వ తేదీ నుంచి ప్రారంభమవుతుందని వెల్లడించారు. అలాట్ మెంట్ అర్డర్ కాపీని https://cpget.ouadmissions.com/ వెబ్ సైట్ లోకి వెళ్లి డౌన్లోడ్ చేసుకోవచ్చు.

టీజీ సీపీగెట్ కౌన్సెలింగ్ 2024 - ముఖ్య తేదీలు

• ప్రవేశ పరీక్ష - టీజీ సీపెగెట్(కామన్‌ పోస్ట్‌ గ్రాడ్యుయేట్‌ ఎంట్రెన్స్‌ టెస్ట్‌) 2024
• సెప్టెంబర్ 8వ తేదీన ఫస్ట్ ఫేజ్ సీట్ల కేటాయింపు ఉంటుంది.
• సెప్టెంబర్ 13వ తేదీలోపు ఆయా కాలేజీల్లో రిపోర్టింగ్ చేయాలి.
• సెప్టెంబర్ 18వ తేదీ నుంచి రెండో విడత కౌన్సెలింగ్ ప్రక్రియ ప్రారంభం అవుతుంది.
• https://cpget.tsche.ac.in/ వెబ్ సైట్ లోకి వెళ్లి ప్రాసెస్ చేసుకోవాలి.

తెలంగాణ సీపీగెట్ - 2024 (కామన్‌ పోస్ట్‌ గ్రాడ్యుయేట్‌ ఎంట్రెన్స్‌ టెస్ట్‌) ఫలితాలు ఇటీవలే విడుదలయ్యాయి. మొత్తం 73,342 మంది విద్యార్థులు దరఖాస్తు చేయగా… ఇందులో 64,765 మంది పరీక్షలకు హాజరయ్యారు. ఇందులో 61,246 మంది విద్యార్థులు అర్హత సాధించారు. 2024-25 విద్యా సంవత్సరానికి విద్యార్థులకు ప్రవేశాలు కల్పించనున్నారు.

TG CPGET 2024 ర్యాంక్ ను ఇలా చెక్ చేసుకోండి

• Step 1: పరీక్ష రాసిన అభ్యర్థులు https://cpget.tsche.ac.in/ వెబ్ సైట్ లోకి వెళ్లాలి.
• Step 2: సీపీగెట్ - 2024 ఫలితాల లింక్ పై క్లిక్ చేయాలి.
• Step 3: ఓపెన్ అయ్యే విండోలో హాల్ టికెట్ నంబర్, రిజిస్ట్రేషన్ నంబర్ తో పాటు పుట్టిన తేదీని ఎంట్రీ చేయాలి.
• Step 4: మీ ర్యాంక్ కార్డ్ డిస్ ప్లే అవుతుంది.
• Step 5: ప్రింట్ లేదా డౌన్లోడ్ అనే ఆప్షన్ పై నొక్కి కాపీని పొందవచ్చు.

రాష్ట్రంలోని ఉస్మానియా, తెలంగాణ, కాకతీయ, శాతవాహన, పాలమూరు, మహాత్మాగాంధీ, మహిళా యూనివర్సిటీలు, జేఎన్‌టీయూహెచ్‌ పరిధిలో ఉన్న 297 పీజీ కాలేజీల్లో( ఎమ్మెస్సీ, ఎంఏ, ఎంకాం, ఎంపీఈడీ కోర్సు) 45 కోర్సుల్లో ప్రవేశాలకు సీపీగెట్‌ నిర్వహించారు.సీపీగెట్ పరీక్షలను జూలై 6వ తేదీ నుంచి కంప్యూటర్‌ ఆధారిత విధానంలో నిర్వహించారు.జులై 17వ తేదీతో అన్ని పరీక్షలు పూర్తి అయ్యాయి.

రాష్ట్రవ్యాప్తంగా 44,604 పీజీ సీట్లు అందుబాటులో ఉన్నాయి. సీపీగెట్‌కు దరఖాస్తు చేసుకునే అభ్యర్థులు డిగ్రీలో ఏ సబ్జెక్టు చేసినా, పీజీలో ఇష్టమొచ్చిన సామాజిక కోర్సుల్లో చేరేందుకు వీలు కల్పిస్తున్నారు. ఎంబీబీఎస్, బీటెక్‌ విద్యార్థులు కూడా ఎంఏ, ఎంకామ్‌ వంటి కోర్సుల్లో చేరే వీలుంది. మొత్తం 100 మార్కులకు సీపీగెట్ పరీక్ష నిర్వహించారు.ఈ ఏడాది కూడా ఉస్మానియా వర్శిటే ఈ పరీక్ష నిర్వహించింది.