Paytm CEO : పేటీఎం సీఈఓగా.. మళ్లీ విజయ్​ శేఖర్​కే పగ్గాలు

Paytm CEO : పేటీఎం మేనేజింగ్​ డైరక్టర్​, సీఈఓ బాధ్యతలు మళ్లీ విజయ్​ శేఖర్​ శర్మకే దక్కాయి. సీఈఓగా విజయ్​ శేఖర్​కు షేర్​హోల్డర్ల నుంచి 99.67శాతం మద్దతు లభించడం విశేషం.

"పేటీఎం లిస్టింగ్​ తర్వాత జరిగిన తొలి ఏజీఎంలో షేర్​హోల్డర్ల నుంచి విశేష స్పందన లభించింది. షేర్​హోల్డర్లకు ధన్యవాదాలు. భారీ మద్దతుతో.. మన ఎండీ- సీఈఓ విజయ్​ శేఖర్​ శర్మ.. సంస్థని ముందుండి నడిపించనున్నారు. 22వ ఏజీఎంలో పేటీఎం చేసిన తిర్మానాలన్నీ గట్టెక్కాయి," అని పేటీఎం ట్వీట్​ చేసింది.

వన్​97 కమ్యూనికేషన్​ లిమిటెడ్​ 22వ ఏజీఎం(యాన్యువెల్​ జనరల్​ మీటింగ్​)లో భాగంగా.. సీఈఓ ఎంపికకు ఓటింగ్​ జరిగింది. వన్​97 కమ్యూనికేషన్​ లిమిటెడ్​లో పేటీఎం భాగంగా ఉంది.

Vijay Shekhar Sharma : "దాదాపు 100శాతం ఓట్లు విజయ్​ శేఖర్​కే దక్కాయి. ఇది సంస్థపై షేర్​హోల్డర్ల నమ్మకానికి ప్రతిరూపంగా నిలుస్తోంది. సంస్థపై వారికున్న నమ్మకాన్ని ఇది చూపిస్తోంది. ఈ యాజమాన్యంతోనే కంపెనీ ప్రాఫిట్​లోకి వెళుతుందని వారు విశ్వసిస్తున్నారు," అని పేటీఎం సంస్థ.. అధికారిక ప్రకటనను విడుదల చేసింది.

గతేడాది నవంబర్​లో స్టాక్​ మార్కెట్​లో లిస్ట్​ అయ్యింది పేటీఎం. అప్పటి నుంచి దాదాపు 60శాతం వాల్యూయేషన్​ను కోల్పోయింది. ఈ క్రమంలో పేటీఎం ఆర్థిక వ్యవహారాలు, యాజమాన్యంపై షేర్​హోల్డర్లలో అసంతృప్తి నెలకొన్నట్టు వార్తలొచ్చాయి. విజయ్​ శేఖర్​ను సీఈఓగా తప్పిస్తే.. పేటీఎం మెరుగుపడుతుందని పలువురు అభిప్రాయాలు వ్యక్తం చేశారు. ఈ నేపథ్యంలో విజయ్​ శేఖర్​ని తిరిగి ఎన్నుకుంటారా? లేదా? అన్న అనుమానాలు మార్కెట్​లో నెలకొన్నాయి. తాజా పరిణామాలతో.. ఆ అనుమానాలకు చెక్​ పడింది.

శుక్రవారం ట్రేడింగ్​ సెషన్​ ముగిసే సమయానికి.. పేటీఎం షేరు విలువ రూ. 771గా ఉంది.