సరిహద్దుల్లో శాంతి పవనాలు.. స్టాక్​ మార్కెట్లకు జోష్​!

stock market news live | ఉక్రెయిన్​ నుంచి కొన్ని బలగాలను వెనక్కి తీసుకుంటున్నట్టు రష్యా చెప్పడంతో అంతర్జాతీయంగా నెలకొన్న భౌగోళిక ఉద్రిక్తతలు కాస్త శాంతించాయి. ఫలితంగా దేశీయ సూచీలు బలంగా పుంజుకున్నాయి. బీఎస్​ఈ సెన్సెక్స్​.. 1,736.21 పాయింట్లు లాభపడి.. 58,142 వద్ద ముగిసింది. ఎన్​ఎస్​ఈ నిఫ్టీ.. 509.70 పాయింట్లు బలపడి 17,352.45 వద్ద స్థిరపడింది.

సోమవారం భారీగా పతనమైన రంగాల్లో మంగళవారం కొనుగోళ్ల జోరు కనిపించింది. ముఖ్యంగా ఆటో, బ్యాంక్​, రియాల్టి, పీఎస్​యూ బ్యాంక్​, ఐటీ, ఎఫ్​ఎమ్​సీజీ రంగాలు 2-3శాతం మేర లాభడ్డాయి.

బజాజ్​ ఫినాన్స్​, ఎస్​బీఐ, ఎల్​టీ, టైటాన్,షేర్లు 4శాతం మేర లాభపడగా.. విప్రో, రిలయన్స్​, ఎయిర్​టెల్​ 3శాతం మేర వృద్ధి చెందాయి.

సిప్లా, ఓఎన్​జీసీ కంపెనీల షేర్లు నష్టపోయాయి.

అంతర్జాతీయ మార్కెట్లకూ జోష్​..

రష్యా- ఉక్రెయిన్​ వ్యవహారం తీవ్రమైన వేళ కొన్ని రోజులుగా అంతర్జాతీయ మార్కెట్లు నష్టాల్లో ఉండిపోయాయి. తాజాగా.. సరిహద్దుల్లో పరిస్థితులు కాస్త శాంతించాయని వార్తలు వెలువడటంతో రష్యా, యూరోపియన్​ మార్కెట్లు నష్టాల్లో నుంచి కొంతమేర తేరుకున్నాయి.

దిగొచ్చిన 'ఆయిల్​'..

యుద్ధం జరిగితే సరఫరాపై ప్రభావం పడుతుందన్న ఆందోళనలతో ముడి చమురు ధరలు ఇటీవలి కాలంలో దాదాపు 7ఏళ్ల గరిష్ఠాన్ని తాకాయి. తాజాగా శాంతి పవనాల కారణంగా కాస్త దిగొచ్చాయి. బ్యారెల్​ ముడి చమురు ధర 94డాలర్లకు చేరింది.