JEE Advanced 2023 results : జేఈఈ అడ్వాన్స్డ్ ఫలితాలు విడుదల.. తెలుగు వారే టాపర్లు!
JEE-Advanced 2023 results : జేఈఈ అడ్వాన్స్డ్ ఫలితాలు వెలువడ్డాయి. తెలుగు వారికి టాప్ ర్యాంక్లు వచ్చాయి.
JEE Advanced 2023 results : జేఈఈ అడ్వాన్స్డ్ 2023 పరీక్ష ఫలితాలను ఆదివారం విడుదల చేసింది ఐఐటీ గువాహటి. ఐఐటీ హైదరాబాద్ జోన్కు చెందిన వావిలాల చిద్విలాస్ రెడ్డికి మొదటి ర్యాంక్ వచ్చింది. మొత్తం 360 మార్కులకు పరీక్ష జరగ్గా.. చిద్విలాస్కు 341 మార్కులు దక్కాయి.
మహిళల్లో టాప్ ర్యాంక్ కూడా హైదరాబాద్ వాసికే దక్కడం విశేషం. ఐఐటీ హైదరాబాద్ జోన్కు చెందిన నాయకంటి నాగ భవ్య శ్రీకి టాప్ ర్యాంక్ వచ్చింది. మొత్తం మీద ఆమె 298 మార్కులతో 56వ ర్యాంక్ సంపాదించుకుంది.
"ఈసారి.. 1,80,372 మంది విద్యార్థులు.. జేఈఈ అడ్వాన్స్డ్ పరీక్షలో రెండు పేపర్లు రాశారు. వారిలో 43,773 మంది క్వాలిఫై అయ్యారు. వీరిలో 36,204 మంది అబ్బాయిలు.. 7,509 మంది అమ్మాయిలు ఉన్నారు," అని ఐఐటీ గువాహటి వెల్లడించింది.
దేశంలోని ఐఐటీల్లో ప్రవేశాల కోసం జేఈఈ పరీక్షను నిర్వహిస్తారు. ఎన్ఐటీల కోసం కూడా ఈ ర్యాంక్లను పరిగణలోకి తీసుకుంటారు. ఇందులో రెండు విభాగాలు ఉన్నాయి. తొలుత జరిగే మెయిన్స్ పరీక్షలో పాస్ అయ్యే వారికి.. అడ్వాన్స్డ్ రాసే అర్హత లభిస్తుంది. రెండు పేపర్లు రాయాల్సి ఉంటుంది. ఇందులో ఉత్తీర్ణత సాధించే వారికి.. ర్యాంక్ల ఆధారంగా ఐఐటీల్లోకి ప్రవేశం లభిస్తుంది. ఈ నెల 4న 2023 జేఈఈ అడ్వాన్స్డ్ పరీక్ష జరగ్గా.. తాజాగా ఫలితాలు వెలువడ్డాయి.
కామన్ ర్యాంక్ లిస్ట్లోని టాప్ 10 అభ్యర్థుల పేర్లు..
- వావిలాల చిద్విలాస్ రెడ్డి
- రమేశ్ సూర్య తేజ
- రిషి కార్ల
- రాఘవ్ గోయల్
- అడ్డగాడ వెంకట శివరామ్
- ప్రభవ్ ఖండేల్వాల్
- బిక్కిన అభినవ్ చౌదరి
- మలయ్ కేడియా
- నాగిరెడ్డి బాలాజీ రెడ్డి
- యక్కండి ఫని వెంకట మానేందర్ రెడ్డి.
టాప్ 10లో ఆరుగురు హైదరాబాద్ జోన్కు చెందిన వారే ఉండటం విశేషం. మరో నలుగురు ఢిల్లీ, రూర్కీకి చెందిన వారున్నారు.
మీ ఫలితాలను ఇలా చెక్ చేసుకోండి..
స్టెప్ 1:- జేఈఈ అడ్వాన్స్డ్ పరీక్ష ఫలితాల కోసం అధికారిక వెబ్సైట్ jeeadv.ac.in లోకి వెళ్లండి.
స్టెప్ 2:- హోం పేజ్లో కనిపించే జేఈఈ అడ్వాన్స్డ్ 2023 రిజల్ట్ లింక్పై క్లిక్ చేయండి.
JEE Advanced 2023 results link : స్టెప్ 3:- మీ లాగిన్ వివరాలు సమర్పించండి.
స్టెప్ 4:- ఫలితాలు స్క్రీన్పై డిస్ప్లే అవుతాయి.
స్టెప్ 5:- వాటిని చెక్ చేసుకుని, డౌన్లోడ్ చేసుకోండి.
ఫలితాలతో పాటు పేపర్ 1, పేపర్ 2 ఫైనల్ ఆన్సర్ కీని సైతం విడుదల చేసింది ఐఐటి గువాహటి. అధికారిక వెబ్సైట్లో దానిని చెక్ చేసుకోవచచు.
జేఈఈ అడ్వాన్స్డ్ గరిష్ఠ మార్కులు:- 360 (ప్రతి పేపర్కు 180)
ఫిజిక్స్ గరిష్ఠ మార్కులు:- 120 (ప్రతి పేపర్కు 60)
కెమిస్ట్రీ గరిష్ఠ మార్కులు:- 120 (ప్రతి పేపర్కు 60)
మాథ్స్ గరిష్ఠ మార్కులు:- 120 (ప్రతి పేపర్కు 60)
సంబంధిత కథనం