Nepal plane crash | ఘోర ప్రమాదాలు.. కన్నీటి కథలకు అడ్డా 'నేపాల్​'!

Nepal plane crash | నేపాల్​ విమానం అదృశ్యమైన ఘటనతో ప్రపంచం ఉలిక్కిపడింది. దాదాపు 5గంటల పాటు మిస్స్​ అయిన తారా ఎయిర్​లైన్స్​ విమానాన్ని అధికారులు.. కోవాంగ్​ గ్రామంలోని లంచే నదికి సమీపంలో గుర్తించారు. కానీ ప్రతికూల వాతావరణం కారణంగా.. సహాయక చర్యలకు తీవ్ర ఆటంకం కలిగింది. సోమవారం వరకు ఎలాంటి చర్యలు చేపట్టలేని స్థితి! విమానంలోని 22మంది ప్రయాణికులు కుటుంబసభ్యులు ఆర్తనాథాలతో నేపాల్​ విమానాశ్రయాలు ఉక్కిరిబిక్కిరి అవుతున్నాయి.

అయితే.. నేపాల్​కి విమాన ప్రమాదాలు కొత్తేమీ కాదు. ఎన్నో ఏళ్లుగా.. ఇక్కడ ఘోర ప్రమాదాలు జరుగుతూనే ఉన్నాయి. విమాన ప్రమాదాల్లో ఇప్పటికే వందలాది మంది ప్రాణాలు కోల్పోయారు. కానీ పరిస్థితులను మెరుగుపరచకపోవడం ఆందోళనకరం. ఇందుకు తాజా విమాన ఘటన ఉదాహరణ!

నేపాల్​ విమానాశ్రయాల్లో భద్రతా ప్రమాణాలు చాలా తక్కువగా ఉంటాయి. పైగా.. అత్యంత క్లిష్టమైన రన్​వేలు అక్కడ ఉంటాయి. చాలా సందర్భాల్లో అవి మంచుతో కూరుకుపోయి ఉంటాయి. అదే సమయంలో నేపాల్​ వాతావరణం ఎప్పుడు ఎలా ఉంటుందో అంచనా వేయడం చాలా కష్టం. కొద్ది నిమిషాల్లో వాతావరణ మారిపోయి, పైలట్లను భయపెడుతూ ఉంటుంది. ఆదివారం కూడా.. వాతావరణ సరిగ్గా లేదని తెలుస్తోంది.

నేపాల్​లోని ఘోర ప్రమాదాల్లో కొన్ని..

• 2016 మార్చ్​:- పోఖారా నుంచి జామ్​సమ్​కు బయలుదేరిన దేశీయ విమానం.. టేకాఫ్​ అయిన 8 నిమిషాలకే అదృశ్యమైపోయింది. దానా అనే గ్రామానికి సమీపంలో కుప్పకూలినట్టు పలు గంటల తర్వాత తెలిసింది. ఈ ఘటనలో ఎవరు కూడా ప్రాణాలతో బయటపడలేదు.
• Nepal plane missing 2019:- లుక్లా విమానాశ్రయంలో.. ఓ విమానం టేకాఫ్​ తీసుకుంటుండగా.. రన్​వేపై అదుపుతప్పింది. పక్కనే ఉన్న రెండు హెలికాప్టర్లను బలంగా ఢీకొట్టింది. ఈ ఘటనలో ముగ్గురు మరణించారు. ఎవరెస్ట్​ ప్రాంతానికి అత్యంత సమీప రవాణా మార్గం ఈ విమానాశ్రయం. టేకాఫ్​కు ప్రపంచంలో అత్యంత క్లిష్టపరిస్థితులు ఇక్కడ ఉంటాయి.
• 2018 మార్చ్​:- యూఎస్​-బంగ్లా ఎయిర్​లైన్స్​ ఒకటి.. ఖాట్మండు విమానాశ్రయానికి అత్యంత సమీపంలో కుప్పకూలింది. ఈ ఘటనలో 51మంది మృతిచెందారు. బంగ్లాదేశ్​ రాజధాని ఢాకా నుంచి బయలుదేరిన విమానం.. ఫుట్​బాల్​ ఫీల్డ్​లో కుప్పకూలి, మంటలకు ఆహుతైపోయింది. ఈ దారుణ ఘటనలో 20మంది ప్రయాణికులు బతికి బయటపడం అందరిని ఆశ్చర్యానికి గురిచేసింది.
• 1992:- ఖాట్మాండు విమానాశ్రయానికి వస్తుండగా.. ఓ పాకిస్థాన్​ విమానం కుప్పకూలింది. ఈ ఘటనలో 167మంది దుర్మరణం పాలయ్యారు.
• 1992:- పాకిస్థాన్​ విమానం ఘటన జరగడానికి రెండు నెలల ముందు.. థాయ్​ ఎయిర్​వేస్​కు చెందిన ఓ విమానం ఖాట్మండు విమానాశ్రయానికి సమీపంలో కుప్పకూలింది. ఈ ఘటనలో 113మంది మరణించారు.

భారతీయులు కూడా..!

Nepal plane news | తాజాగా.. ఘటన జరిగిన విమానంలో 22మంది ఉన్నారు. వీరిలో ఇద్దరు జర్మనీవాసులు, 13మంది నేపాలీలు. కాగా.. నలుగురు భారతీయులు సైతం విమానంలో ఉన్నారు. వారిని అశోక్​ కుమార్​ త్రిపాఠి, ధనుష్​ త్రిపాఠి, రితిక త్రిపాఠి, వైభవి త్రిపాఠిలుగా గుర్తించారు.

ఇలా గుర్తించారు..

కుప్పకూలిన విమానాన్ని.. పైలట్​ ఫోన్​లో ఉన్న జీపీఎస్​ లొకేషన్​ నెట్​వర్క్​ ద్వారా గుర్తించారు. ఈ విషయాన్ని స్థానిక మీడియా వెల్లడించింది.

ప్రమాదం జరిగిన సమయంలో.. విమనాన్ని కెప్టెన్​ ప్రభాకర్​ ఘిమిరె నడుపుతున్నారు.

"ప్రమాదం జరిగిన తర్వాత.. పైలట్​ ఘిమిరె ఫోన్​కు కాల్​ చేశాము. అది మోగుతూనే ఉంది. ఫలితంగా లొకేషన్​ను గుర్తించగలిగాము," అని ఓ అధికారి వెల్లడించారు.