Morocco earthquake : మొరాకోలో భారీ భూకంపం.. 296మంది మృతి!

Morocco earthquake today : మొరాకోలో భారీ భూకంపం సంభవించింది. స్థానిక కాలమానం ప్రకారం శుక్రవారం రాత్రి 11:11 నిమిషాలకు భూమి కంపించింది. రిక్టార్​ స్కేల్​పై భూకంపం తీవ్రత 6.8గా నమోదైంది. ఈ ఘటనలో 296మంది మరణించారు. 150 మందికిపైగా ప్రజలు గాయపడ్డారు. మృతుల సంఖ్య పెరిగే అవకాశం ఉంది.

మొరాకోలో భూకంపం ధాటికి భవనాలు కదిలిపోయాయి. ప్రజలు భయంతో ఇళ్లల్లో నుంచి బయటకు పరుగులు తీశారు. ఇందుకు సంబంధించిన దృశ్యాలు సామాజిక మాధ్యమాల్లో వైరల్​గా మారాయి.

"నైరుతి మర్రాకేశ్​ ప్రాంతంలో భూమికి 18.5కిమీల దిగువన.. శుక్రవారం రాత్రి 11:11 గంటలకు 6.8 తీవ్రతతో భూకంపం నమోదైంది. అనేక సెకన్ల పాటు భూమి కంపించింది," అని అమెరికా జియోలాజికల్​ సర్వే ఓ ప్రకటన విడుదల చేసింది. అయితే.. మొరాకోకు చెందిన నేషనల్​ సీస్మిక్​ మానిటరింగ్​ అండ్​ అలర్ట్​ నెట్​వర్కం మాత్రం.. ఈ భూకంపం తీవ్రత 7గా ఉందని చెబుతోంది.

Morocco earthquake death toll : మొరాకో భూకంపం సంభవించిన ప్రాంతంలో జనాభా ఎక్కువగా ఉంటుంది. కానీ ఇక్కడి భవనాలకు.. భూ ప్రకంపనలను తట్టుకునే సామర్థ్యం లేదని తెలుస్తోంది. తాజా ప్రకృతి విపత్తుతో అనేక భవనాలు దెబ్బతిన్నట్టు తెలుస్తోంది. కొన్ని భవనాలు కుప్పకూలిన దృశ్యాలు ట్విట్టర్​లో వెలుగులోకి వచ్చాయి. అయితే.. వాటిని ధ్రువీకరించాల్సి ఉంది.

మొరాకోలో భూకంపాలు ప్రజలను భయపెడుతూనే ఉన్నాయి. ఆఫ్రికన్​- యూరేషియన్​ ప్లేట్స్​ మధ్య ఉండటంతో.. ఈ ప్రాంతంలో భూ ప్రకంపనలు ఎక్కువగా నమోదవుతున్నాయి.

Morocco earthquake 2023 : 2004లో ఈశాన్య మొరాకోలోని హొసిమాలో సంభవించిన భూకంపం ధాటికి.. 628మంది ప్రాణాలు కోల్పోయారు. దాదాపు 1000మంది గాయపడ్డారు. ఇక 1980లో ఎల్​ అస్నన్​ ప్రాంతంలో 7.3 తీవ్రతతో నమోదైన భూకంపం ధాటికి 2500మంది ప్రాణాలు వీడారు. కనీసం 3లక్షల మంది నిరాశ్రయులయ్యారు.