Mexico bus accident : మెక్సికోలో ఘోర బస్సు ప్రమాదం.. ఆరుగురు భారతీయులు సహా 18మంది మృతి!

Mexico bus accident : మెక్సికోలో ఘోర బస్సు ప్రమాదం జరిగింది. నయారిట్​ రాష్ట్రంలో ఓ బస్సు లోయలోకి దూసుకెళ్లింది. ఈ ఘటనలో ఆరుగురు భారతీయులు సహా 18మంది ప్రాణాలు కోల్పోయినట్టు తెలుస్తోంది. 23మందికిపైగా ప్రజలు గాయపడ్డారు.

నయారిట్​ రాష్ట్ర రాజధాని టెపిక్​కు సమీపంలోని బరాంక బ్లాంకాలో స్థానిక కాలమానం ప్రకారం గురువారం ఉదయం ఈ దుర్ఘటన చోటుచేసుకుంది. ప్రమాదం జరిగిన సమయంలో బస్సులో 42మంది ఉన్నట్టు సమాచారం. టిజువానా ప్రాంతానికి బస్సు వెళుతుండగా.. లోయలో పడిపోయింది. మృతుల్లో భారతీయులు, డొమెనిక్​ రిపబ్లిక్​, ఆఫ్రికెన్​ దేశస్థులు ఉన్నారని అధికారులు తెలిపారు.

Mexico bus accident death toll : ఘటనపై సమాచారం అందుకున్న పోలీసులు.. ఘటనాస్థలానికి వెళ్లారు. సహాయక చర్యలు క్లిష్ఠంగా సాగాయి. మృతదేహాలను వెలికితీశారు. కాగా.. మృతదేహాలను గుర్తించేందుకు కష్టంగా ఉందని సమాచారం. మరోవైపు మెక్సికో బస్సు ప్రమాదంలో గాయపడిన వారిని సమీప ఆసుపత్రికి తరలించి చికిత్స అందిస్తున్నారు.

కాగా.. సంబంధిత బస్సు డ్రైవర్​ను పోలీసులు అరెస్ట్​ చేశారు. ఘటన జరగడానికి గల కారణాలు తెలియరాలేదు. కానీ.. మలుపులు ఎక్కువగా ఉన్న రోడ్డుపై డ్రైవర్​.. బస్సును అతివేగంగా నడపటమే మెక్సికో రోడ్డు ప్రమాదానికి గల కారణమని అధికారులు అనుమానిస్తున్నారు. ఘటనపై దర్యాప్తు చేపట్టామని, త్వరలోనే మరిన్ని వివరాలు వెల్లడిస్తామని పోలీసులు స్పష్టం చేశారు.

బస్సులో ఉన్నవారందరు వలసదారులని సమాచారం. మరణించిన వారిలో ఆరుగురు భారతీయులు ఉన్నారని సహాయక సిబ్బందిలో ఒకరు తెలిపారు.

మెక్సికో బస్సు ప్రమాదం..

Mexico bus accident 2023 : మెక్సికోలో రోడ్డు ప్రమాదాలు ఇటీవలి కాలంలో ఆందోళనకరంగా పెరుగుతున్నాయి. గత నెలలో ఓక్సాకాలో జరిగిన బస్సు ప్రమాదంలో 29మంది ప్రాణాలు కోల్పోయారు. ఈ ఏడాది ఫిబ్రవరిలో సెంట్రల్​ మెక్సికోలో జరిగిన బస్సు ప్రమాదంలో 17మంది మరణించారు. వీరందరు వలసదారులే!