Manipur viral video case : ‘మణిపూర్​ పోలీసులు ఏం చేస్తున్నారు?’- సుప్రీంకోర్టు ఫైర్​!

Manipur viral video case hearing in Supreme court : మణిపూర్​లో ఇద్దరు మహిళలను నగ్నంగా చేసి ఊరేగించిన కేసుకు సంబంధించి సోమవారం విచారణ చేపట్టింది సుప్రీంకోర్టు. ఈ నేపథ్యంలో మణిపూర్​ పోలీసు వ్యవస్థపై తీవ్రస్థాయిలో అసహనం వ్యక్తం చేసింది. అదే సమయంలో.. ఇలాంటి ఘటనలు పశ్చిమ్​ బంగాల్​, ఛత్తీస్​గఢ్​, రాజస్థాన్​లనూ జరుగుతున్నాయని ఓ న్యాయవాది చేసిన వ్యాఖ్యలను తప్పుబట్టింది.

"ప్రతి చోటా ఇలాగే జరుగుతోందని చెప్పి, మణిపూర్​ వైరల్​ వీడియో కేసును తక్కువ చేసి చూడకూడదు. ఇది చాలా దారుణమైన, హీనమైన ఘటన. దేశం మొత్తం ఇలాగే ఉందని ఆలోచించకుండా.. మణిపూర్​ వ్యవహారంలో మనం ఏం చేయగలము? అని ఆలోచించాలి. కాపాడితే ఆడబిడ్డలను అందరిని కాపాడండి, లేదా ఎవరినీ కాపాడవద్దు? అని మీరు అంటున్నారా?" అని సుప్రీంకోర్టు ప్రధాన న్యాయమూర్తి జస్టిస్​ డీవై చంద్రచూడ్​ వ్యాఖ్యానించారు.

Manipur viral video case : మణిపూర్​లో మే 3 నుంచి హింసాత్మక ఘటనలు కొనసాగుతున్నాయి. కుకీ జాతికి చెందిన ఇద్దరు మహిళలను కొందరు నగ్నంగా చేసి, ఊరేగించిన ఘటన మే 4న చోటుచేసుకుంది. కాగా.. ఇందుకు సంబంధించిన దృశ్యాలు ఇటీవలే బయటకొచ్చాయి. ఈ ఘటన దేశవ్యాప్తంగా సంచలనం సృష్టించింది. ఈ నేపథ్యంలో బాధిత మహిళలు.. సుప్రీంకోర్టులో పిటిషన్​ దాఖలు చేశారు. సీబీఐ దర్యాప్తును వ్యాజ్యంలో వ్యతిరేకించారు. సోమవారం ఈ పిటిషన్​పై విచారణ జరిగింది.

మణిపూర్​ వైరల్​ వీడియోపై సీబీఐ కాకుండా.. కోర్టు పర్యవేక్షణలో సిట్​ బృందం దర్యాప్తు చేయాలని పిటిషనర్ల తరఫు న్యాయవాది కపిల్​ సిబల్​ వాదించారు. సుప్రీంకోర్టు పర్యవేక్షణ సీబీఐ దర్యాప్తు కొనసాగితే తమకు అభ్యంతరం లేదని కేంద్రం తరఫు న్యాయవాది తుషార్​ మెహతా స్పష్టం చేశారు.

Manipur viral video parade : మణిపూర్​ హింసకు సంబంధించి ఇప్పటివరకు 6వేలకుపైగా ఎఫ్​ఐఆర్​లు నమోదయ్యాయని సుప్రీంకోర్టుకు వెల్లడించింది కేంద్రం. మహిళలపై నేరాలకు సంబంధించి.. వీటిల్లో ఎన్ని ఎఫ్​ఐఆర్​లు ఉన్నాయని అత్యున్నత న్యాయస్థానం అడిగిన ప్రశ్నకు కేంద్రం వద్ద సమాధానం లేకుండా పోయింది. ఈ నేపథ్యంలో ఆరు విషయాలను ప్రస్తావిస్తూ, వాటిపై సమాధానం ఇవ్వాలని కేంద్రానికి ఆదేశించింది సుప్రీంకోర్టు. అవి.. కేసుల విభజన, జీరో ఎఫ్​ఐఆర్​ల సంఖ్య, పోలీస్ స్టేషన్లకు ఎన్ని బదిలీ అయ్యాయి. ఇప్పటివరకు ఎంత మందిని అరెస్ట్​ చేశారు? నిందితులకు ఇస్తున్న న్యాయపరమైన సాయం, ఇప్పటివరకు ఎన్ని సెక్షన్​ 164 స్టేట్​మెంట్స్​ రికార్డు చేశారు.. వంటి ప్రశ్నలు సంధించింది. ఈ ప్రశ్నలకు ఒక రోజులో సమాధానం చెప్పాలని, విచారణను మంగళవారానికి వాయిదా వేసింది కోర్టు.

"ఇది నిర్భయ కేసు కాదు.."

విచారణలో మణిపూర్​ పోలీసుల తీరుపై అసంతృప్తిని వ్యక్తం చేసింది సర్వోన్నత న్యాయస్థానం.

Manipur violence latest news : "ఇది నిర్భయ తరహా కేసు కాదు. ఇది చాలా తీవ్రతతో కూడిన కేసు. మణిపూర్​ వైరల్​ వీడియో ఘటన మే 4న జరిగింది. మే 18 వరకు జీరో ఎఫ్​ఆర్​ కూడా నమోదు చేయలేదు. సంబంధిత పోలీస్​ స్టేషన్​కు ఈ కేసు జూన్​లో బదిలీ అయ్యింది. జులై 19న వీడియో వైరల్​ అయ్యింది. ఆ తర్వాతే కేసు వేగవంతమైంది. బాధితులకు దర్యాప్తులో, న్యాయవ్యవస్థపై నమ్మకం ఉండాలంటే.. కేసును వేగంగా విచారించాలి. అసలు పోలీసులు 14 రోజుల వరకు ఏం చేస్తున్నారు?" అని కేంద్రాన్ని ప్రశ్నించింది సుప్రీంకోర్టు.