Manipur video : మణిపూర్​లో మరో దారుణం.. వ్యక్తి తల నరికి, వేలాడదీసి!

Manipur video : హింసాత్మక ఘటనలతో దాదాపు మూడు నెలలుగా అట్టుడుకుతున్న మణిపూర్​లో మరో దారుణం! కుకి జాతికి చెందిన ఓ వ్యక్తిని, కొందరు దుండగులు దారుణంగా చంపి, శరీరం నుంచి తలను వేరు చేశారు. అనంతరం దానిని ఇంటి ముందు వేలాడదీసి వెళ్లిపోయారు. ఈ దృశ్యాలు తాజాగా వైరల్​ అయ్యాయి.

ఇదీ జరిగింది..

మణిపూర్​లో.. కుకి జాతికి చెందిన ఇద్దరు మహిళలపై గ్యాంగ్​ రేప్​తో పాటు వారిని నగ్నంగా చేసి ఊరేగించిన ఘటన దేశవ్యాప్తంగా ప్రకంపనలు సృష్టిస్తోంది. నిందితులను కఠినంగా శిక్షించాలని డిమాండ్​లు వెల్లువెత్తుతున్నాయి. ఈ ఘటన మే 4న జరగ్గా.. కొన్ని రోజుల క్రితమే వీడియో బయటపడింది. ఇక ఈ ఘటన కలకలం సృష్టించిన కొన్ని రోజులకే, అంటే శుక్రవారం నాడు.. శరీరం నుంచి వేరు చేసిన ఓ వ్యక్తి తలకు సంబంధించిన వీడియో సంచలనం సృష్టిస్తోంది.

సంబంధిత ఘటన చూరచంద్రాపుర్​లోని లమ్జా గ్రామంలో జులై 2న జరిగినట్టు తెలుస్తోంది. మృతుడి పేరు డేవిడ్​ థైక్​. వాస్తవానికి ఉద్యోగం కోసం అతను ముంబైకి వెళ్లాల్సి ఉంది. కానీ మణిపూర్​ ఘర్షణల కారణంగా అతను గ్రామంలోనే ఉండిపోయాడు.

Manipur violence : పోలీసుల కథనం ప్రకారం.. సంబంధిత గ్రామంలో దుండగుల దాడి పెరిగింది. ఈ నేపథ్యంలో ఊరిలోని వారు ఒకరి తర్వాత ఒకరు కాపలా కాయడం మొదలుపెట్టారు. ఈ క్రమంలోనే జులై 2 తెల్లవారుజామున థైక్​ కాపలా కాశాడు. 5 గంటలకు.. ఓ గుంపు, ఆయుధాలతో థైక్​పై దాడి చేసింది. తుపాకీతో అతడిని కాల్చిన దుండగులు.. ఆ తర్వాత శరరం నుంచి తలను వేరు చేశారు. ఒక కన్నును పీకేశారు. అనంతరం ఆ తలను ఇంటి ముందు ఉన్న ఫెన్సింగ్​కు వేలాడదీశారు. అంతటితో ఆగకుండా.. తల లేని శరీరంపై అనేక మార్లు కత్తితో పొడిచారు.

"ఘటన జరిగిన కొన్ని క్షణాల ముందు.. ఓ మహిళ, ఆమె ఇద్దరి బిడ్డలను థైక్​ రక్షించాడు. దుండగుల దాడి చేస్తుండగా.. ఆ ముగ్గురిని సురక్షిత ప్రాంతానికి తరలించారు. ఆ తర్వాత తన స్నేహితుడు స్కూటర్​ను తీసుకురావడానికి వెళ్లాడు. స్కూటర్​పై వారిద్దరు గ్రామం నుంచి బయటకు వెళ్లిపోవాలన్నది ప్లాన్​. కానీ స్కూటర్​ వచ్చే ముందే, అతనిపై గుంపు దాడి చేసింది," అని ఐటీఎల్​ఎఫ్​ (ఇండిజీనియస్​ ట్రైబల్​ లీడర్స్​ ఫార్మ్​) సభ్యురాలు మేరీ వెల్లడించారు.

Manipur crime news : "థైక్​ కుటుంబానికి అతనే దిక్కు. 2020 వరకు ముంబైలోని ఓ హోటల్​లో పనిచేసే వాడు. 2020లో ఇంటికి వచ్చాడు. మళ్లీ ఇప్పుడు వెళదామని సన్నద్ధమవుతుండగా.. మణిపూర్​ల ఘర్షణలు మొదలయ్యాయి. ఇంట్లో ఉండిపోయాడు. చివరికి ఇలా జరిగింది," అని మేరీ తెలిపారు.

మరోవైపు థైక్​ బంధువులు పోలీసులను ఆశ్రయించారు. ఘటనపై ఎఫ్​ఐఆర్​ దాఖలైంది. కానీ పోలీసులు ఇంకా ఈ ఘటనపై స్పందించలేదని బంధువులు చెబుతున్నారు.