Zika virus Karnataka : కర్ణాటకలో జికా కలకలం.. ఐదేళ్ల చిన్నారికి పాజిటివ్​

Zika virus Karnataka : దేశంలో జికా వైరస్​పై మళ్లీ ఆందోళనలు పెరిగాయి. పుణెకు చెందిన ఓ వ్యక్తికి జికా వైరస్​ పాజిటివ్​ అని తేలిన కొద్ది రోజులకే.. కర్ణాటకలో మరో కేసు నమోదైంది. ఓ ఐదేళ్ల చిన్నారికి సైతం ఈ వ్యాధి సోకింది.

ఐదేళ్ల చిన్నారి రక్తనమూనాలను పుణెలోని ల్యాబ్​కు పంపించారు. పరీక్షలు నిర్వహించగా.. ఆమెకు జికా వైరస్​ పాజిటివ్​ అని తేలింది. చిన్నారికి ముందస్తు జాగ్రత్తలు తీసుకోవాలని ఆమె తల్లిదండ్రులకు వైద్యులు సూచించారు.

Zika virus India : అయితే.. పరిస్థితులను ఎదుర్కొనేందుకు తాము సిద్ధంగా ఉన్నామని కర్ణాటక ప్రభుత్వం వెల్లడించింది.

"రాష్ట్రంలో ఇదే మొదటి కేసు. పరిస్థితిని నిరంతరం పర్యవేక్షిస్తున్నాము. జికాను ఎదుర్కొనేందుకు మేము సన్నద్ధమయ్యే ఉన్నాము," అని కర్ణాటక ఆరోగ్యశాఖ మంత్రి డా. కే సుధాకర్​ మీడియాకు తెలిపారు.

పుణెలో.. 67ఏళ్ల వృద్ధుడికి..

Maharashtra Zika virus cases : డిసెంబర్​ తొలి వారంలో.. పుణె బావ్ధాన్​ ప్రాంతంలో నివాసముంటున్న ఓ 67ఏళ్ల వృద్ధుడికి జికా వైరస్​ సోకినట్టు తేలింది. నాసిక్​లో నివాసముండే ఆ వ్యక్తి.. నవంబర్ 6న పుణెకు వెళ్లాడు. జ్వరం, జలుబు, దగ్గు, శరీరం నొప్పుల కారణంగా నవంబర్​ 16న జహగీర్​ ఆసుపత్రికి వెళ్లాడు. ఆయనకు వైద్య పరీక్షలు నిర్వహించగా.. జికా వైరస్​ పాజిటివ్​ అని తేలింది.

జికా వైరస్​ లక్షణాలు.. చికిత్స..

1947లో ఉగాండలోని అడవుల్లో తొలిసారిగా ఈ జికా వైరస్​ను గుర్తించారు. అప్పటి నుంచి ఆఫ్రికా, నైరుతి ఆసియా, పెసిఫిక్​ ద్వీపాల్లో జికా వైరస్​ కలకలం సృష్టించింది. 2016లో బ్రెజిల్​లో జికా వైరస్​ కారణంగా ఏర్పడిన సంక్షోభం దేశాన్ని కుదిపేసింది. కొన్ని నెలల క్రితం.. కేరళ, మహారాష్ట్ర, ఉత్తర్​ప్రదేశ్​లో సైతం జికా వైరస్​ కేసులు నమోదయ్యాయి.

Zika virus symptoms : ఏడెస్​ జాతి దోమల కారణంగా ఈ వైరస్​ వ్యాపిస్తుంది. ఇవి మనిషిని కుడితే.. జికా సోకే ప్రమాదం ఉంటుంది.

దద్దుర్లు, జ్వరం, కంజెక్టివైటిస్​, జాయింట్​ నొప్పులు, తలనొప్పులు వంటి సమస్యలు.. జికా వైరస్​ లక్షణాలుగా ఉన్నాయి. ఇవి 2-7 రోజుల వరకు ఉంటాయి.

Zika virus treatment : జికా వైరస్​ కోసం ప్రత్యేకంగా.. చికిత్సేమీ అవసరం లేదు. జికా వైరస్​ సోకిన రోగులకు ఎక్కువగా విశ్రాంతి కావాలి. ద్రవాలు ఎక్కువగా తీసుకోవాలి. పారాసిటమాల్​తో జ్వరాన్ని నియంత్రించాలి. అప్పటికీ లక్షణాలు ఎక్కువగా ఉంటే.. అప్పుడు వైద్యులను సంప్రదించాల్సి ఉంటుంది. జికాకు ప్రస్తుతానికి ఎలాంటి వ్యాక్సిన్​ అందుబాటులో లేదు.