Bengaluru: బెంగళూరులో రాత్రంతా భారీ వర్షం; విమానాశ్రయంలో లీకేజీ; పలు ఫ్లైట్స్ రద్దు-heavy overnight rain causes leakage in bengaluru airports terminal 2 ,జాతీయ - అంతర్జాతీయ న్యూస్
తెలుగు న్యూస్  /  జాతీయ - అంతర్జాతీయ  /  Bengaluru: బెంగళూరులో రాత్రంతా భారీ వర్షం; విమానాశ్రయంలో లీకేజీ; పలు ఫ్లైట్స్ రద్దు

Bengaluru: బెంగళూరులో రాత్రంతా భారీ వర్షం; విమానాశ్రయంలో లీకేజీ; పలు ఫ్లైట్స్ రద్దు

HT Telugu Desk HT Telugu
May 10, 2024 03:28 PM IST

బెంగళూరులో గురువారం రాత్రంతా ఈదురు గాలులతో భారీ వర్షం పడింది. దాంతో బెంగళూరులోని కెంపెగౌడ అంతర్జాతీయ విమానాశ్రయం టెర్మినల్ 2 లో లీకేజీ ఏర్పడి వర్షపు నీరు లోపలికి చేరింది. ఈదురుగాలులు, భారీ వర్షం కారణంగా పలు ఫ్లైట్స్ ను చెన్నైకి మళ్లించారు.

బెంగళూరులోని కెంపెగౌడ అంతర్జాతీయ విమానాశ్రయం టెర్మినల్ 2
బెంగళూరులోని కెంపెగౌడ అంతర్జాతీయ విమానాశ్రయం టెర్మినల్ 2

బెంగళూరులో గురువారం రాత్రి కురిసిన వర్షాలకు విమానాల రాకపోకలకు తీవ్ర అంతరాయం ఏర్పడిందని కెంపెగౌడ అంతర్జాతీయ విమానాశ్రయం (KAI) అధికారులు తెలిపారు. ఎడతెరిపి లేకుండా కురుస్తున్న వర్షాల కారణంగా విమానాశ్రయంలోని టెర్మినల్ 2లో లీకేజీ కనిపించింది. వర్షపు నీరు టెర్మినల్ 2 లోకి చేరింది. టెర్మినల్ పైకప్పుల గుండా వర్షం లోపలికి పడుతున్న వీడియోను సోషల్ మీడియా ప్లాట్ ఫామ్ 'ఎక్స్'లో పలువురు ప్రయాణికులు షేర్ చేశారు.

చెన్నైకి విమానాల మళ్లింపు

రాత్రి 9:35 నుంచి 10:29 గంటల మధ్య కురిసిన భారీ వర్షాలతో ల్యాండింగ్ పరిస్థితులు క్లిష్టంగా మారాయని, దీంతో అంతర్జాతీయ విమానాలతో సహా పలు విమానాలను చెన్నైకి దారి మళ్లించినట్లు బెంగళూరు ఇంటర్నేషనల్ ఎయిర్పోర్ట్ లిమిటెడ్ (BIAL) ఒక అధికారిక ప్రకటనలో తెలిపింది. కెంపెగౌడ అంతర్జాతీయ విమానాశ్రయం అధికారిక ఆపరేటర్ గా బీఐఏఎల్ వ్యవహరిస్తువన్న విషయం తెలిసిందే. ప్రతికూల వాతావరణ పరిస్థితుల కారణంగా శుక్రవారం 13 దేశీయ విమానాలు, మూడు అంతర్జాతీయ ప్యాసింజర్ విమానాలు, ఒక అంతర్జాతీయ కార్గో విమానాన్ని చెన్నైకి మళ్లించినట్లు బీఐఏఎల్ ప్రతినిధి తెలిపారు.

బెంగళూరులో వర్ష బీభత్సం

భారీ వర్షాలు బెంగళూరు నగరాన్ని అతలాకుతలం చేశాయి. నగరంలోని జయనగర్, నృపతుంగ నగర్, ఆర్ఆర్ నగర్ సహా నగరంలోని పలు ప్రాంతాల్లో చెట్లు నేలకూలాయి. ఏదేమైనా, ఈ వర్షం బెంగళూరు వాసులకు వేసవి ఉష్ణోగ్రతల నుండి చాలా ఉపశమనం కలిగించింది. బెంగళూరులో వరుసగా నాలుగో రోజులుగా వర్షం కురుస్తోంది. శుక్రవారం ఉదయం 8:30 గంటల వరకు 24 గంటల వ్యవధిలో బెంగళూరులో 14 మిల్లీమీటర్ల వర్షపాతం నమోదైందని భారత వాతావరణ శాఖ (ఐఎండీ) తెలిపింది. ఈ సమయంలో నగరంలో గరిష్టంగా 33 డిగ్రీల సెల్సియస్, కనిష్ఠంగా 22 డిగ్రీల సెల్సియస్ ఉష్ణోగ్రతలు నమోదైనట్లు ఐఎండీ తెలిపింది.

IPL_Entry_Point