IMD heatwave alert : అమ్మో ఎండలు.. హీట్​వేవ్​ ఎఫెక్ట్​తో పెరుగుతున్న ఉష్ణోగ్రతలు

IMD heatwave alert : దేశంలో భానుడి భగభగలు రోజురోజుకు పెరుగుతున్నాయి. హీట్​వేవ్​ పరిస్థితులు ప్రజలను ఉక్కిరిబిక్కిరి చేస్తున్నాయి. ఇదే విషయంపై భారత వాతావరణశాఖ (ఐఎండీ).. తాజాగా 5 రాష్ట్రాలకు అలర్ట్​ జారీ చేసింది. ప్రజలు నిత్యం అప్రమత్తంగా ఉండాలని స్పష్టం చేసింది. ప్రభుత్వాలు కూడా తగిన చర్యలు తీసుకుంటున్నాయి.

పశ్చిమ్​ బంగాల్​..

పశ్చిమ్​ బంగాల్​లోని కొన్ని ప్రాంతాల్లో గత 5 రోజులుగా హీట్​వేవ్​ పరిస్థితులు కొనసాగుతున్నాయి. ప్రజలు అప్రమత్తంగా ఉండాలని ఐఎండీ హెచ్చరించడంతో ప్రభుత్వం తగిన చర్యలు చేపట్టింది. సోమవారం నుంచి వారం రోజుల పాటు రాష్ట్రంలోని అన్ని విద్యాసంస్థలను మూసివేయాలని ప్రభుత్వం ఆదేశించింది.

పశ్చిమ్​ బంగాల్​ రాష్ట్రానికి ఐఎండీ ఆరెంజ్​ అలర్ట్​ జారీ చేసింది.

ఒడిశా..

heatwave in Odisha : ఒడిశాలో ఉష్ణోగ్రతలు భారీగానే నమోదవుతున్నాయి! గత గురువారం పగటి ఉష్ణోగ్రతలు పలు ప్రాంతాల్లో దాదాపు 44 డిగ్రీలకు చేరాయి.

"బరపదాలో రికార్డు స్థాయిలో 43.5 డిగ్రీల ఉష్ణోగ్రత నమోదైంది. ఈ నెలలో ఇది రికార్డు. ఏప్రిల్​ 10 భువనేశ్వర్​లో 37.5 డిగ్రీల ఉష్ణోగ్రత నమోదైంది," అని ఐఎండీ పేర్కొంది.

వర్షాలు పడటం తగ్గడంతో రానున్న రోజుల్లో ఉష్ణోగ్రతలు భారీగా పెరిగే అవకాశం ఉందని ఐఎండీ హెచ్చరించింది.

ఇదీ చదవండి :- Heatwave Advisory । ఎండలు పెరుగుతున్నాయి.. మద్యం, మాంసాహారానికి దూరంగా ఉండాలి!

ఢిల్లీ..

Delhi Heatwave 2023 : ఢిల్లీలో ఉష్ణోగ్రతలు రోజురోజుకు పెరుగుతున్నాయి. రానున్న రెండు రోజుల పాటు హీట్​వేవ్​ పరిస్థితులు ఉంటాయని ఐఎండీ పేర్కొంది. సాధారణంగా కన్నా ఉష్ణోగ్రతలు 4-4.5 డిగ్రీలు పెరగొచ్చని స్పష్టం చేసింది.

బిహార్​..

India Heatwave 2023 : బిహార్​లోని అనేక జిల్లాల్లో హీట్​వేవ్​ పరిస్థితులు కొనసాగుతున్నాయి. గత 4-5 రోజులుగా భారీగా ఉష్ణోగ్రతలు నమోదవుతున్నాయి. స్థానిక వాతావరణశాఖ యెల్లో అలర్ట్​ జారీ చేసింది. రాష్ట్రంలోని ఈశాన్య ప్రాంతాల్లో సోమ- మంగళవారాలు.. దక్షిణ ప్రాంతాల్లో బుధ, గురువారాలు హీట్​వేవ్​ పరిస్థితులు ఉంటాయని స్పష్టం చేసింది.

మహారాష్ట్ర..

Heatwave in Maharashtra 2023 : ఐఎండీ రిపోర్టు ప్రకారం.. ఈ నెల మధ్య వారం నాటికి రాష్ట్రంలోని 10కిపైగా జిల్లాల్లో సాధారణం కన్నా అధిక ఉష్ణోగ్రతలు నమోదయ్యాయి! చంద్రపూర్​లో అత్యధికంగా 43.2 డిగ్రీల సెల్సియెస్​ ఉష్ణోగ్రత రికార్డైంది. కాగా.. దక్షిణ ముంబైలో మాత్రం వాతావరణ చల్లగానే ఉంది. 31.6 డిగ్రీల ఉష్ణోగ్రత నమోదైంది.

హీట్​వేవ్​ నేపథ్యంలో రాష్ట్రంలోని అనేక విద్యాసంస్థలు పని వేళలను తగ్గించాయి. మధ్యాహ్నం 1 నుంచి సాయంత్రం 5 గంటల వరకు బయట తిరగ వద్దని స్థానిక ఆరోగ్యశాఖ అధికారులు ప్రజలను హెచ్చరిస్తున్నారు.