Nitish Kumar : అనుకున్నదే జరిగింది.. బిహార్​ సీఎం పదవికి నితీశ్​ కుమార్​ రాజీనామా!

Nitish Kumar resigns as Bihar CM : దేశ రాజకీయాల్లో మరో కీలక మలుపు! 2024 లోక్​సభ ఎన్నికలకు ముందు విపక్ష ఇండియా కూటమికి పెద్ద ఎదురుదెబ్బ. గత కొన్ని రోజులుగా కొనసాగుతున్న ఊహాగానాలను నిజం చేస్తూ.. బిహార్​ సీఎం పదవికి రాజీనామా చేశారు జేడీయూ అధినేత నితీశ్​ కుమార్​. ఆదివారం ఉదయం.. పట్నాలో గవర్నర్​ రాజేంద్ర అర్లేకర్​ వద్దకు వెళ్లి.. తన రాజీనామాను సమర్పించారు. ఫలితంగా.. ఆ రాష్ట్రంలో జేడీయూ- ఆర్​జేడీ మధ్య 2022లో ఏర్పడిన మహాఘట్​బంధన్​ ప్రభుత్వానికి ముగింపు పడింది. నితీశ్​ కుమార్​.. మరికొన్ని గంటల్లో ఎన్​డీఏలో చేరి బీజేపీతో కలిసి, ప్రభుత్వాన్ని ఏర్పాటు చేయనున్నారు.

దశాబ్ద కాలంలో ఐదోసారి..!

నితీశ్​ కుమార్​.. ఇలా ప్రభుత్వాన్ని పడగొట్టి, వేరే కూటమిలో చేరడం దశాబ్ద కాలంలో ఇది 5వసారి! గత బిహార్​ ఎన్నికల తర్వాత.. బీజేపీతో కలిసి ప్రభుత్వాన్ని ఏర్పాటు చేశారు. కానీ కమలదళంతో విభేదాల కారణంగా 2022లో ఎన్​డీఏ నుంచి బయటకు వచ్చి.. విపక్ష ఆర్​జేడీతో చేతులు కలిపారు. మహాఘట్​బంధన్​ ప్రభుత్వాన్ని తీసుకొచ్చి, సీఎం అయ్యారు.

Bihar politics latest news : 2024 లోక్​సభ ఎన్నికల్లో ప్రధానమంత్రి నరేంద్ర మోదీ ప్రభుత్వాన్ని గద్దె దించడమే లక్ష్యంగా విపక్షాలు పావులు కదిపాయి. 'ఇండియా' పేరుతో కూటమిని ఏర్పాటు చేశాయి. అందులో కీలక నేతల్లో ఒకరు నితీశ్​ కుమార్​. ఇంకా చెప్పాలంటే.. కూటమి ఏర్పాటులో ఆయనదే కీలక పాత్ర అని రాజకీయ నిపుణులు అంటూ ఉంటారు. అలాంటిది.. ఇటీవలి కాలంలో కూటమితో ఆయనకు విభేదాలు ఏర్పడ్డాయని ఊహాగానాలు జోరుగా సాగాయి. ఇండియా కూటమికి తాను కన్వీనర్​గా అవ్వాలని ఆయన భావించారు. అదే జరిగి ఉంటే.. ఎన్నికల్లో గెలిస్తే.. ప్రధాని కూడా అయ్యే అవకాశం ఉండేది. కానీ అందుకు కాంగ్రెస్​ ఒప్పుకోలేదని రూమర్స్​ వెలుగులోకి వచ్చాయి. ఫలితంగా.. కాంగ్రెస్​పై అంసతృప్తి కారణంగా.. కూటమి నుంచి తప్పుకోవాలని నితీశ్​ కుమార్​ భావించారట.

'అందుకే రాజీనామా చేశా..'

Nitish Kumar latest news : ఈ నేపథ్యంలో.. ఆదివారం ఉదయం బిహార్​ సీఎం పదవికి రాజీనామా చేశారు నితీశ్​ కుమార్​.

"సీఎం పదవికి రాజీనామా చేసి, ఈ ప్రభుత్వాన్ని ముగించాను. నాకు అన్ని వైపుల నుంచి సూచనలు వస్తున్నాయి. గతంలో ఓ కూటమితో తెగదెంపులు చేసుకుని, ఇందులోకి వచ్చాను. కానీ ఇక్కడా పరిస్థితులు బాగాలేవు. అందుకే రాజీనామా చేశాను. మంత్రులు కలుస్తాము. త్వరలోనే ఓ నిర్ణయం తీసుకుంటాము," అని.. రాజీనామా అనంతరం మాట్లాడారు నితీశ్​ కుమార్​.

Bihar Political crisis : "నేను కుటమి కోసం పనిచేశాను. కూటమి ఏర్పడేలా చర్యలు తీసుకున్నాను. కానీ ఎవరు ఏ పని చేయడం లేదు," అని విపక్ష ఇండియాపై పరోక్షంగా విమర్శలు చేశారు నితీశ్​ కుమార్​.

ఒకప్పుడు.. అద్భుత పాలనతో మంచి పేరు తెచ్చుకున్న నితీశ్​ కుమార్​.. ఇప్పుడు ప్రభుత్వాలను కూలగొట్టి, అటు నుంచి ఇటు, ఇటు నుంచి అటు కూటములు మరుతూ.. వార్తల్లో నిలుస్తుండటం సర్వత్రా చర్చనీయాంశంగా మారింది.