ATF price : భారీగా తగ్గిన విమాన ఇంధన ధరలు.. టికెట్​ రేట్లు కూడా..!

ATF price : విమానయాన సంస్థలకు ఉపశమనం! విమాన ఇంధన(ఏటీఎఫ్​) ధరలను ఆయిల్​ మార్కెటింగ్​ సంస్థలు భారీగా తగ్గించాయి. అంతర్జాతీయంగా చమురు ధరలు దిగొస్తుండటంతో శనివారం ఈ నిర్ణయం తీసుకున్నాయి. ఫలితంగా ఏటీఎఫ్​ ధరలు 2.2శాతం మేర తగ్గాయి. ప్రస్తుతం.. ఏటీఎఫ్​ ధరలు కిలోలీటరుకు రూ. 3,084.94 తగ్గి.. రూ. 1,38,147.93కి చేరాయి.

దేశ రాజధాని ఢిల్లీలో ఏటీఎఫ్​ ధర రూ. 1,38,147.95(కిలోలీటరకు)గా ఉంది. ముంబైలో ఆ ధర రూ. 1,37,095.74కు చేరింది. రాష్ట్రాలు, ప్రాంతాల బట్టి ఏటీఎఫ్​ ధరలను విభజిస్తారు.

ఈ ఏడాదిలో ఏటీఎఫ్​ ధరలను తగ్గించడం ఇది రెండోసారి. కాగా.. ఈ ఏడాది అనేకమార్లు ఏటీఎఫ్​ ధరలను పెంచాయి ఆయిల్​ మార్కెటింగ్​ కంపెనీలు. జూన్​లో ధరలు రూ. 1,41,232.87(కిలోలీటరుకు) వద్ద ఆల్​ టైమ్​ హైని తాకింది.

అంతర్జాతీయ చమురు ధరలకు అనుగుణంగా.. ప్రతి నెల 1, 16న ఏటీఎఫ్​ ధరలను సవరిస్తారు. జులై 1న ఏటీఎఫ్​ ధరల్లో ఎలాంటి మార్పులు చేయలేదు.

ఏటీఎఫ్​ ధరలు తగ్గడంతో.. విమాన టికెట్ల ధరలు కూడా తగ్గుతాయని ప్రజలు ఆశిస్తున్నారు.