Yash Toxic movie: యశ్ టాక్సిక్ మూవీలో కరీనా కపూర్.. తల్లి పాత్రా అంటూ ట్రోలింగ్

Yash Toxic movie: కేజీఎఫ్ 2 తర్వాత యశ్ నటిస్తున్న మూవీ టాక్సిక్. ఈ మధ్యే మూవీ టైటిల్ ను మేకర్స్ రివీల్ చేసిన సంగతి తెలుసు కదా. తాజాగా ఈ సినిమాలో బాలీవుడ్ నటి కరీనా కపూర్ నటించబోతోందని వార్తలు వస్తున్నాయి. దీనిపై మూవీ టీమ్ ఇంకా స్పందించనే లేదు.. అప్పుడే సోషల్ మీడియాలో కరీనాపై ట్రోలింగ్ మొదలైంది.

టాక్సిక్ మూవీలో యశ్ తల్లి పాత్రలో కరీనా నటించబోతోందా అంటూ కొందరు కామెంట్ చేయడం గమనార్హం. ఈ ముసలి హీరోయిన్ ఎందుకు అంటూ మరికొందరు నెగటివ్ కామెంట్స్ చేశారు. సుమారు రెండున్నర దశాబ్దాలుగా బాలీవుడ్ లో నటిస్తున్న కరీనా ప్రస్తుత వయసు 43 ఏళ్లు. అంటే యశ్ కంటే ఆరేళ్ల పెద్ద వయసు. మరి అలాంటి నటిని టాక్సిక్ కోసం తీసుకున్నారన్న వార్తలు అభిమానులకు రుచించడం లేదు.

లోకల్ టాలెంట్ లేదా?

కేజీఎఫ్ తర్వాత యశ్ మరో పాన్ ఇండియా మూవీతో అభిమానుల ముందుకు వస్తున్నాడు. దీంతో ఈ టాక్సిక్ లో బాలీవుడ్ అట్రాక్షన్ కూడా ఉంటే బాగుంటుందని మేకర్స్ భావిస్తున్నారు. అందులో భాగంగానే కరీనా పేరును పరిశీలిస్తున్నారన్న వార్తలు వచ్చాయి. ఇది తెలియగానే ఫ్యాన్స్ నెగటివ్ కామెంట్లతో చెలరేగిపోయారు. గతంలో సౌత్ సినిమాలకు వ్యతిరేకంగా కరీనా చేసిన కామెంట్స్ ను కూడా ఈ సందర్భంగా వాళ్లు గుర్తు చేస్తున్నారు.

కరీనాతోపాటు శృతి హాసన్ పేరు కూడా వినిపిస్తోంది. యశ్ తప్ప ఈ సినిమాలో మరో కన్నడ నటీనటులు లేకపోవడం కూడా అక్కడి అభిమానులకు రుచించడం లేదు. లోకల్ టాలెంట్ లేదా అని కూడా వాళ్లు ప్రశ్నిస్తున్నారు. యశ్ కేజీఎఫ్ 2లోనూ బాలీవుడ్ ను అట్రాక్ట్ చేయడానికి సంజయ్ దత్, రవీనా టండన్ లాంటి వాళ్లను తీసుకొచ్చారు.

ఇక 2022లో లాల్ సింగ్ చద్దా మూవీలో నటించిన సందర్భంగానే వయసుపై కరీనా కపూర్ ను పలువురు ప్రశ్నించారు. దీనికి ఆమె స్పందిస్తూ.. ఇది కేవలం సోషల్ మీడియాలోనే ఉందంటూ కొట్టి పారేసింది. ఇప్పుడు కరీనాను టాక్సిక్ లోకి తీసుకుంటారా లేదా? తీసుకుంటే ఆమె పాత్ర ఏంటి అన్నదానిపై ఎలాంటి స్పష్టత లేకపోయినా.. యశ్ ఫ్యాన్స్ మాత్రం ట్రోలింగ్ మొదలు పెట్టడం విశేషం.

కేజీఎఫ్ 2 తర్వాత ఏడాదిన్నరకు యశ్ నెక్ట్స్ ప్రాజెక్ట్ ను అనౌన్స్ చేసిన విషయం తెలిసిందే. ఈ సినిమాకు టాక్సిక్ అనే టైటిల్‌ను ఫిక్స్ చేశారు. టాక్సిక్ మూవీకి మ‌ల‌యాళ డైరెక్ట‌ర్ గీతూ మోహ‌న్ దాస్ ద‌ర్శ‌క‌త్వం వ‌హించ‌నుంది. డిఫ‌రెంట్‌ యాక్ష‌న్ ఎంట‌ర్‌టైన‌ర్‌గా టాక్సిక్‌ మూవీ తెర‌కెక్కుతోన్న‌ట్లు స‌మాచారం. య‌శ్ హీరోగా న‌టిస్తోన్న 19వ సినిమా ఇది.

మ‌రోవైపు మ‌ల‌యాళంలో అవార్డు విన్నింగ్ సినిమాల‌తో గీతూ మోహ‌న్ దాస్ ఫేమ‌స్ అయ్యారు. ఆమె ద‌ర్శ‌క‌త్వం వ‌హించిన ల‌య‌ర్ డైస్ మూవీ ఆస్కార్ నామినేష‌న్స్‌లో నిలిచింది. కానీ తుది జాబితాలో చోటు ద‌క్కించుకోలేక‌పోయింది. యాక్ట‌ర్‌గా కెరీర్ మొద‌లుపెట్టిన గీతూ మోహ‌న్ దాస్ ఆ త‌ర్వాత ద‌ర్శ‌కురాలిగా మారింది.