Thalapathy Vijay GOAT: ద‌ళ‌ప‌తి విజ‌య్ గ్రేటెస్ట్ ఆఫ్ ఆల్ టైమ్ ఆ హాలీవుడ్ మూవీకి రీమేకా?

Thalapathy Vijay GOAT: ఇన్నాళ్లూ ద‌ళ‌ప‌తి 68గా పిలిచిన సినిమాకు ది గ్రేటెస్ట్ ఆఫ్ టైమ్ అనే టైటిల్ పెట్టి ద‌ళ‌ప‌తి విజ‌య్ ఫ్యాన్స్‌కు మూవీ టీమ్ పెద్ద న్యూఇయ‌ర్ గిఫ్ట్ ఇచ్చింది. అయితే ఈ టైటిల్ పోస్ట‌ర్ రిలీజ్ కాగానే సోష‌ల్ మీడియాలో ట్రోలింగ్ మొదలైంది. ఇది హాలీవుడ్ మూవీ జెమినీ మ్యాన్‌కు రీమేక్ అని, హాలీవుడ్ రీమేక్ చేసేంత సీన్ విజ‌య్‌కి లేద‌న్న విమ‌ర్శ‌లు వ‌చ్చాయి.

ద‌ళ‌ప‌తి విజ‌య్‌ని ల‌క్ష్యంగా చేసుకుంటూ త‌ర‌చూ ట్వీట్లు చేసే స‌త్య‌న్ రామ‌స్వామి అనే వ్య‌క్తి ఈ ది గ్రేటెస్ట్ ఆఫ్ ఆల్‌టైమ్ మూవీపైనా ఓ ఘాటు ట్వీటు చేశాడు. ఇది హాలీవుడ్ సినిమాకు రీమేక్ అంటూ.. గ‌తేడాది వ‌రుస ఫ్లాపులు ఇచ్చిన విజ‌య్‌కి హాలీవుడ్ రీమేక్స్ చేసేంత సీన్ లేద‌ని అన‌డం విశేషం.

అత‌డేమీ మ‌హేష్ బాబు కాదు..

స‌త్య‌న్ రామ‌స్వామి ట్వీట్ ఇలా ఉంది.. డియ‌ర్ వెంక‌ట్ ప్ర‌భు బ్రో.. 2023లో రెండు వ‌రుస ఫ్లాపుల త‌ర్వాత విజ‌య్ స‌ర్ 2024లో బ‌లంగా పుంజుకోవాల‌ని అనుకుంటున్నాడు. ఒక‌వేళ మీరు నిజంగా రీమేక్స్ ప్లాన్ చేస్తుంటే.. అత‌డు హాలీవుడ్ రీమేక్స్‌కి అస‌లు ఫిట్ కాడు. అత‌డేమీ అజిత్ లేదంటే మ‌హేష్ బాబు కాదు అని స‌త్య‌న్ అన్నాడు.

విజ‌య్ కేవ‌లం కొన్ని తెలుగు రీమేక్స్‌తోనే స‌క్సెస్ అయ్యాడ‌ని విమ‌ర్శించాడు. అందుకే ఓ మంచి తెలుగు సినిమాను కొనుక్కొని రీమేక్ చేయండని ఓ స‌ల‌హా కూడా ఇచ్చాడు. ఈ ట్వీట్‌కు డైరెక్ట‌ర్ వెంక‌ట్ ప్ర‌భు స్పందించాడు. సారీ బ్రో.. నీ నుంచి నేను ఇంకా ఎక్కువ ఎక్స్‌పెక్ట్ చేస్తున్నాను. హ్యాపీ న్యూయ‌ర్ అని అత‌డు రిప్లై ఇవ్వ‌డం విశేషం.

ది గ్రేటెస్ట్ ఆఫ్ ఆల్‌టైమ్ మూవీలో విజ‌య్‌తోపాటు ప్ర‌శాంత్, ప్ర‌భుదేవా, స్నేహ‌, లైలా, మీనాక్షి చౌద‌రి, మోహ‌న్‌, జ‌య‌రాం, యోగిబాబు న‌టిస్తున్నారు. ఇక ఈ మూవీకి ఒరిజిన‌ల్ అని చెబుతున్న జెమినీ మ్యాన్ మూవీ 2019లో హాలీవుడ్‌లో రిలీజైంది. ఇందులో విల్ స్మిత్ డ్యుయ‌ల్ రోల్లో న‌టించాడు. అచ్చూ ఆ సినిమా పోస్ట‌ర్‌లాగే ఈ ది గ్రేటెస్ట్ ఆఫ్ ఆల్‌టైమ్ ఉంది. ఇదొక సైన్స్ ఫిక్ష‌న్ మూవీ.