Macherla Niyojakavargam: పవర్‌ఫుల్ విలన్‌గా సముద్రఖని.. రాజప్ప లుక్ వచ్చేసింది
నితిన్ హీరోగా రూపొందుతోన్న తాజా చిత్రం మాచర్ల నియోజకవర్గం. ఈ సినిమాలో విలన్‌గా సముద్రఖని నటిస్తున్నారు. ఆయనకు సంబంధించిన లుక్‌ను విడుదల చేశారు మేకర్స్. రాజప్ప అనే స్థానిక ఎమ్మెల్యే పాత్రను ఆయన పోషిస్తున్నారు.
సినిమా ఏదైనా హీరోకు దీటుగా విలన్ పాత్ర లేకపోతే కథ పెద్దగా ఆసక్తిగా ఉండదు. మరీ ముఖ్యంగా కమర్షియల్ మాస్ మసాలా చిత్రాల్లో ప్రతినాయకుడి పాత్ర కీ రోల్ పోషిస్తుంది. హీరోకు ఎన్ని ఎలివేషన్లు ఇచ్చినా పవర్‌ఫుల్ విలన్ లేకపోతే కథానాయకుడు తేలిపోతాడు. అందుకే ప్రస్తుతం మన సినిమాల్లో ప్రతినాయకుడి పాత్రలను చాలా పకడ్భందీగా రాసుకుంటున్నారు మన దర్శక నిర్మాతలు. తాజాగా టాలీవుడ్ హీరో నితిన్ నటిస్తున్న మాచర్ల నియోజకవర్గం సినిమాలోనూ ఇలాంటి శక్తిమంతమైన విలన్‌ను పరిచయం చేశారు మేకర్స్. సముద్రఖని పోషించిన ఈ పాత్ర పేరు రాజప్ప. తాజాగా విలన్ లుక్‌ను విడుదల చేశారు.
"రాజప్పకు ఎన్నికలు ఉండవు. మాచర్ల నియోజకవర్గానికి ఏకగ్రీవ ఎమ్మెల్యే" అంటూ సముద్రఖని పోస్టర్‌ను విడుదల చేశారు మేకర్స్. ఈ లుక్‌లో బుర్ర మీసాలు, తెల్ల జుట్టుతో తదేకంగా చూస్తూ సముద్రఖని భయపెడుతున్నారు. సంప్రదాయబద్ధమైన పంచే, చొక్కాతో కనిపించినప్పటికీ ఇంటెన్సిటీ లుక్‌తో ఆకర్షించారు. ఈ పోస్టర్‌తో సినిమాపై అంచనాలు మరింత పెరిగాయి.
నియోజకవర్గానికి కొత్తగా నియమితులైన ఓ ఐఏఎస్ అధికారి వచ్చి అక్కడ ఎలాంటి మార్పులు చేశాడనేది మిగతా కథాంశం. ఇప్పటికే ఈ సినిమా నుంచి ప్రత్యేక గీతం విడుదలై సూపర్ హిట్టయింది. రా రా రెడ్డి అంటూ సాగే సాంగ్‌లో నితిన్, అంజలి కలిసి అదిరిపోయే స్టెప్పులతో నర్తించారు.
ఈ సినిమాకు ఎంఎస్ రాజశేఖర్ రెడ్డి దర్శకత్వం వహించారు. హీరో నితిన్ సొంత బ్యానరైన శ్రేష్ఠ మూవీస్ పతాకంలో ఈ చిత్రాన్ని నిర్మిస్తున్నారు. ఇందులో కృతి శెట్టి, కేథరిన్ థెరిసా హీరోయిన్లుగా చేశారు. ఆగస్టు 12న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.
సంబంధిత కథనం