Salaar First Song: సలార్ నుంచి పాట రెడీ.. అప్‍డేట్ ఇచ్చిన మూవీ యూనిట్

Salaar First Song: పాన్ ఇండియా రెబల్ స్టార్ ప్రభాస్ హీరోగా నటించిన సలార్ మూవీ బజ్ ప్రస్తుతం విపరీతంగా ఉంది. ఈ మూవీ రిలీజ్ డేట్ సమీపిస్తోంది. కేజీఎఫ్ ఫేమ్ ప్రశాంత్ నీల్ దర్శకత్వం వహించిన హైవోల్టేజ్ యాక్షన్ థ్రిల్లర్ సలార్ డిసెంబర్ 22వ తేదీన థియేటర్లలో రిలీజ్ కానుంది. ఇప్పటికే వచ్చిన ట్రైలర్ అంచనాలను మరింత పెంచేసింది. అయితే, మూవీ విడుదల దగ్గరపడుతుండటంతో మరింత కంటెంట్, ప్రమోషన్ల కోసం ప్రభాస్ ఫ్యాన్స్ వేచిచూస్తున్నారు. ఈ క్రమంలో సలార్ నుంచి తొలి పాట రిలీజ్ గురించి మూవీ యూనిట్ నుంచి అప్‍డేట్ వచ్చింది.

సలార్ సినిమా నుంచి తొలి పాటను తీసుకొస్తున్నామంటూ హొంబాలే ఫిల్మ్స్ ప్రకటించింది. ఈ సాంగ్ రిలీజ్, డేట్ టైమ్‍ను నేడు (డిసెంబర్ 12) ప్రకటిస్తామని పేర్కొంది. “మ్యూజికల్ జర్నీకి సిద్ధమవండి. నేడు సలార్ ఫస్ట్ సింగిల్ అనౌన్స్‌మెంట్ ఇస్తాం” అని ట్వీట్ చేసింది. కాగా, సలార్ నుంచి తొలి పాట రేపే (డిసెంబర్ 13) రిలీజ్ అవుతుందని లీకులు వచ్చాయి. ఈ విషయంపై అధికారిక ప్రకటన రావాల్సి ఉంది. సలార్ చిత్రానికి రవి బస్రూర్ సంగీతం అందిస్తున్నారు.

సలార్ సినిమా ట్రైలర్ డిసెంబర్ 1న వచ్చింది. ట్రైలర్‌కు సూపర్ రెస్పాన్స్ వచ్చింది. అంచనాలు మరింత పెరిగాయి. అయితే, ఈ చిత్రం కోసం ప్రమోషన్స్ చేయకపోవడంపై ప్రభాస్ అభిమానులు కాస్త నిరాశ చెందుతున్నారు. ఇంటర్వ్యూలు లాంటివి కూడా చేయడం లేదని అంటున్నారు. అసలు, సలార్ మూవీకి ప్రీ-రిలీజ్ ఈవెంట్ కూడా ఉండదనే బజ్ కూడా వినిపిస్తోంది. మరి మూవీ యీనిట్ ఏం చేస్తుందో చూడాలి.

సలార్ చిత్రంలో మలయాళ స్టార్ పృథ్విరాజ్ సుకుమారన్ కూడా ప్రధాన పాత్ర పోషిస్తున్నారు. శృతి హాసన్ హీరోయిన్ కాగా.. జగపతి బాబు, బాబి సింహా, టిన్నూ ఆనంద్, ఈశ్వరి రావు శ్రీయారెడ్డి కీలకపాత్రల్లో నటించారు. హొంబాలే ఫిల్మ్స్ పతాకంపై విజయ్ కిరంగదూర్ ఈ చిత్రాన్ని నిర్మించారు.

డిసెంబర్ 22న తెలుగుతో పాటు హిందీ, తమిళం, మలయాళం, కన్నడ భాషల్లో సలార్ రిలీజ్ కానుంది. అంతకు ఒక్క రోజు ముందే షారూఖ్ ఖాన్ హీరోగా నటించిన డంకీ కూడా విడుదల కానుంది. బాక్సాఫీస్ వద్ద ఈ రెండు భారీ సినిమాలు పోటీపడనున్నాయి. దీంతో ఈ అంశం కూడా ఆసక్తికరంగా మారింది.