Rajinikanth in Kantara 2: కాంతారా ప్రీక్వెల్‌లో రజనీకాంత్.. ఇంట్రెస్టింగ్ బజ్

Rajinikanth in Kantara 2: కాంతారా మూవీ ఎంతటి సంచలనం సృష్టించిందో మనకు తెలుసు కదా. కేవలం రూ.15 కోట్ల బడ్జెట్ తో రూపొందిన ఈ సినిమా ఏకంగా రూ.500 కోట్ల వరకూ వసూలు చేసింది. కన్నడలోనే కాదు తెలుగు, తమిళం, హిందీల్లోనూ ఊహించని విజయాన్ని సొంతం చేసుకుంది. ఈ విజయమే మేకర్స్ ను ఈ మూవీ ప్రీక్వెల్ తీసే దిశగా ప్రోత్సహించింది.

కాంతారాకు సీక్వెల్ వస్తుందని మొదట్లో వార్తలు వచ్చినా.. నిజానికి ప్రీక్వెల్ తీసుకొస్తున్నామని, ప్రేక్షకుల ఇప్పటికే రెండో పార్ట్ చూసేయగా.. తొలి పార్ట్ తీసుకురాబోతున్నట్లు ఈ మూవీ హీరో, దర్శకుడు రిషబ్ శెట్టి చెప్పాడు. అయితే ఈ సినిమాలో తమిళ సూపర్ స్టార్ రజనీకాంత్ నటించబోతున్నాడన్న వార్త ఇప్పుడు మరింత ఆసక్తి రేపుతోంది.

ఈ సినిమా కోసం ఈ మధ్యే మోస్ట్ ప్రామిసింగ్ యాక్టర్ గా దాదాసాహెబ్ ఫాల్కే అవార్డు అందుకున్న రిషబ్.. ఈ సందర్భంగా కాంతారా ప్రీక్వెల్ గురించి ఇంట్రెస్టింగ్ కామెంట్స్ చేశాడు. ఈ ప్రీక్వెల్ కోసమే ప్రస్తుతం తాము రీసెర్చ్ చేస్తున్నట్లు తెలిపాడు. ఈ మూవీ కూడా కాంతారాలాంటి స్టోరీతోనే రానున్నా.. జానర్ మాత్రం మారబోతున్నట్లు తెలుస్తోంది.

అంతేకాదు ఈ సినిమాలో రజనీ గెస్ట్ రోల్ లో కనిపిస్తున్నాడటగా అని రిషబ్ ను ప్రశ్నించినప్పుడు అతడు కేవలం నవ్వి ఊరుకున్నాడు. ఈ వార్తలను ఖండించలేదు. దీంతో ఈ వార్తల్లో ఎంతోకొంత నిజం ఉందని స్పష్టమవుతోంది. నిజానికి కాంతారా మూవీపై గతంలో రజనీ ప్రశంసలు కురిపించాడు. ఈ సినిమా తనకు గూస్‌బంప్స్ తెప్పించదని అతడు అనడం విశేషం. ఈ నేపథ్యంలో ఇప్పుడదే మూవీ ప్రీక్వెల్ లో గెస్ట్ రోల్ పోషించనున్నాడన్న వార్త మరింత ఆసక్తి రేపుతోంది.