Rajamouli: ఆ రెండు హారర్‌ సినిమాలంటే ఇష్టం అంటున్న రాజమౌళి

రాజమౌళి ఇప్పటి వరకూ కామెడీ సినిమాలు తీశాడు. పీరియాడిక్‌ డ్రామాలూ తెరకెక్కించాడు. ఈగలాంటి ఓ ఎవరూ ఊహించని సినిమానూ అందించాడు. అతని సినిమాల్లో ఎన్నో భిన్నమైన భావోద్వేగాలు ఉంటాయి. అయితే అతడు ఇప్పటి వరకూ హారర్‌ జానర్‌ జోలికి మాత్రం వెళ్లలేదు. దీని వెనుక బలమైన కారణమే ఉంది. తనకు హారర్‌ సినిమాలంటే పెద్దగా ఇష్టం ఉండదని రాజమౌళి అంటున్నాడు.

ఈ మధ్యే ఆహా ఓటీటీ తెరకెక్కించిన అన్యాస్‌ ట్యుటోరియల్‌ వెబ్‌సిరీస్‌ ట్రైలర్‌ను అతడు లాంచ్‌ చేశాడు. ఇదొక హారర్‌ వెబ్‌ సిరీస్‌. ఈ సందర్భంగా జక్కన్న మాట్లాడుతూ.. తనకు హారర్‌ సినిమాలు పెద్ద నచ్చవని చెప్పేశాడు. అయితే రెండు హారర్‌ సినిమాలు మాత్రం తాను ఇష్టపడినట్లు రాజమౌళి తెలిపాడు. అందులో ఒకటి ది ఒమెన్‌ కాగా.. మరొకటి పారానార్మల్‌ యాక్టివిటీ. ఈ రెండు సినిమాలూ ప్రపంచవ్యాప్తంగా అభిమానులను భయపెట్టాయి.

ప్రస్తుతం రాజమౌళి ట్రిపుల్‌ ఆర్‌ మూవీ సక్సెస్‌ను ఎంజాయ్‌ చేస్తున్నాడు. ప్రపంచవ్యాప్తంగా కలెక్షన్ల వర్షం కురిపించిన ఈ సినిమాపై పలువురు హాలీవుడ్‌ ప్రముఖులు కూడా ప్రశంసలు కురిపించారు. జక్కన్న తన తర్వాతి మూవీని మహేష్‌ బాబుతో చేయనున్నాడు. ఆ మూవీ స్క్రిప్ట్‌ వర్క్‌ జరుగుతోంది.