Prabhu Deva: ఆ ఫేమస్ సాంగ్ టైటిల్‍తో ప్రభుదేవా హీరోగా సినిమా

Prabhu Deva : ఇండియా అంతటా ప్రభుదేవా.. ఫేమస్ కొరియోగ్రాఫర్. దేశంలోని దాదాపు అన్ని సినీ ఇండస్ట్రీల్లో ఈ ఇండియన్ మైకేల్ జాక్సన్ చాలా పాపులర్. అయితే, పదుల సంఖ్యల్లోనూ సినిమాల్లోనూ ప్రభుదేవా నటించారు. ఇటీవల నటుడిగా బిజీ అయ్యారు. ప్రభుదేవా దర్శకత్వం వహించిన కొన్ని చిత్రాలు బ్లాక్‍బస్టర్ కూడా అయ్యాయి. కాగా, ప్రభుదేవా ప్రధాన పాత్రలో నటించిన భగీరా మూవీ రెండు నెలల క్రితం విడుదలైంది. అయితే, తాజాగా మరో సినిమాను ప్రభుదేవా మొదలుపెట్టారు. ‘కాదలన్’ (తెలుగులో ప్రేమికుడు) సినిమాలో ‘పెట్టా ర్యాప్’ అనే పాట ఎంత ఫేమసో అందరికీ తెలుసు. ఇప్పుడు అదే ‘పెట్టా ర్యాప్’ టైటిల్‍తో వస్తున్నారు ప్రభుదేవా.

ఈ ‘పెట్టా ర్యాప్’ సినిమాలో ప్రభుదేవా ప్రధాన పాత్రలో నటిస్తున్నారు. మలయాళం డైరెక్టర్ ఎస్‍జే శీను ఈ మూవీకి దర్శకత్వం వహిస్తున్నారు. తమిళంలో ఫేమస్ అయిన వేదిక.. ఫీమేల్ లీడ్‍గా నటిస్తున్నారు. బ్లూహిల్స్ ఫిల్మ్స్ పతాకంపై జోబీ పి.సామ్ ఈ చిత్రానికి నిర్మాతగా ఉన్నారు. డి.ఇమ్మాన్ సంగీతం అందిస్తున్నారు.

పెట్టా ర్యాప్ మూవీ టైటిల్ కింద సింగ్, యాక్షన్, డ్యాన్స్, రిపీట్ అని స్లోగన్ ఉంది. అంటే ఈ సినిమా మ్యూజిక్ స్కోర్, డ్యాన్స్ నేపథ్యంలో సాగుతోందని తెలుస్తోంది. గురువారం ఈ చిత్రం పూజా కార్యక్రమాలు జరిగాయి. రొమాన్స్, మ్యూజికల్, యాక్షన్ ఎంటర్‌టైనర్‌గా ఈ మూవీ తెరకెక్కుతోందని డైరెక్టర్ చెప్పారు. ఈనెల 15వ తేదీ నుంచి షూటింగ్ మొదలవుతుందని తెలుస్తోంది. ఈ ఏడాదిలోనే పెట్టా ర్యాప్ సినిమాను రిలీజ్ చేయాలని చిత్రయూనిట్ భావిస్తోంది.

ప్రభుదేవా హీరోగా రూపొందిన ఫ్లాష్‍బ్యాక్ చిత్రం విడుదల కావాల్సి ఉంది. ఈ సినిమాలో రెజీనా కసాండ్రా హీరోయిన్‍గా నటించారు. డాన్ సాండీ దర్శకత్వం వహించారు.