Prabhas |ఆదిపురుష్ టీమ్‌పై ప్ర‌భాస్ ఫ్యాన్స్ ఫైర్‌... వేక్అప్‌టీమ్ఆదిపురుష్ అంటూ వార్నింగ్

కెరీర్‌లో తొలిసారి పౌరాణిక క‌థాంశంతో ప్ర‌భాస్ న‌టిస్తున్న చిత్రం ఆదిపురుష్‌. ఓంరౌత్ ఈ సినిమాకు ద‌ర్శ‌క‌త్వం వ‌హిస్తున్నారు. త్రీడీ మోష‌న్ క్యాప్చ‌ర్ టెక్నాల‌జీతో తెలుగు, హిందీ భాష‌ల్లో ఏక‌కాలంలో ఈ సినిమాను రూపొందిస్తున్నారు. ఇండియ‌న్ సినిమా హిస్ట‌రీలోనే అత్య‌ధిక బ‌డ్జెట్‌తో తెర‌కెక్కుతున్న సినిమాల్లో ఒక‌టిగా ఆదిపురుష్ ఆరంభం నుంచే అభిమానుల్లో ఆస‌క్తిని రేకెత్తిస్తోంది.

 2020 ఆగ‌స్ట్‌లో ఆదిపురుష్‌ను అనౌన్స్ చేశారు. ఈ సినిమా మొద‌లై రెండేళ్లు గ‌డిచినా ఇప్ప‌టివ‌ర‌కు ప్ర‌భాస్ తో పాటు మిగ‌తా న‌టీన‌టులు ఫ‌స్ట్‌లుక్ ల‌ను రిలీజ్ చేయ‌లేదు. షూటింగ్‌, పోస్ట్ ప్రొడ‌క్ష‌న్‌కు సంబంధించిన అప్‌డేట్స్ కూడా వెల్ల‌డించి నెలలు గడుస్తున్నాయి. ప్ర‌భాస్ లుక్ కోసం అభిమానులు చాలా రోజులుగా  ఎదురుచూస్తున్నారు. 

ఈ ఏడాది శ్రీరామ‌న‌వ‌మి రోజున ప్ర‌భాస్ లుక్‌ను రిలీజ్ చేస్తారంటూ ప్ర‌చారం జ‌రిగింది. కానీ ఫ్యాన్‌మేడ్ లుక్స్‌ను ద‌ర్శ‌కుడు ట్విట్ట‌ర్‌లో పోస్ట్ చేయ‌డంతో అత‌డిని నెటిజ‌న్లు ఓ ఆట ఆడుకున్నారు. స‌లార్‌, ప్రాజెక్ట్ కే అప్‌డేట్స్‌ను టీమ్ త‌ర‌చుగా పంచుకుంటోంది. కానీ ఆదిపురుష్ చిత్ర‌యూనిట్ మాత్రం సైలెంట్‌గా ఉండ‌టంతో ఫ్యాన్స్ ఆగ్ర‌హాన్ని వ్య‌క్తం చేస్తున్నారు. 

సోష‌ల్ మీడియా వేదిక‌గా ఆదిపురుష్ టీమ్‌పై ఫైర్ అవుతున్నారు. భారీగా విమ‌ర్శ‌ల్ని గుప్పిస్తున్నారు. ఇక‌నైనా మేల్కొని సినిమాకు సంబంధించిన అప్‌డేట్స్ ఇవ్వాలంటూ సూచిస్తున్నారు. వేక్అప్‌టీమ్ఆదిపురుష్ హాష్‌ట్యాగ్ సోష‌ల్‌మీడియాలో ప్రభాస్ ఫ్యాన్స్ ఆదిపురుష్ టీమ్ ను ఉద్దేశిస్తూ చేస్తోన్న ట్వీట్స్ వైరల్ గా మారాయి. త్వరలోనే ప్రభాస్ లుక్ ను రిలీజ్ చేయడంతో పాటు సినిమా అప్ డేట్స్ వెల్లడించాలంటూ వార్నింగ్ ఇస్తున్నారు. 

 ఈ సినిమాలో కృతిస‌న‌న్ సీత పాత్ర‌లో క‌నిపించ‌బోతున్న‌ది. లంకేష్ అనే నెగెటివ్ షేడ్స్ తో కూడిన పాత్ర‌లో సైఫ్అలీఖాన్ న‌టిస్తున్నారు. 2023 సంక్రాంతికి తెలుగు, హిందీతో పాటు మ‌ల‌యాళం, క‌న్న‌డ‌, త‌మిళ భాష‌ల్లోనూ ఈ సినిమాను రిలీజ్ చేయ‌బోతున్నారు.