Salman Khan Bhumika Chawla: అప్పుడు హీరోయిన్ - ఇప్పుడు సిస్ట‌ర్ - స‌ల్మాన్ సినిమాలో భూమిక

Salman Khan Bhumika Chawla: స‌ల్మాన్‌ఖాన్ తేరేనామ్‌, దిల్ నే జిసే అప్నా క‌హా సినిమాల్లో అత‌డికి జోడీగా హీరోయిన్‌గా న‌టించింది భూమికా చావ్లా. తేరేనామ్‌లో స‌ల్మాన్‌ఖాన్‌, భూమిక త‌మ కెమిస్ట్రీతో అభిమానుల‌ను ఆక‌ట్టుకోన్నారు. దాదాపు ఇర‌వై ఏళ్ల విరామం త‌ర్వాత మ‌ళ్లీ స‌ల్మాన్‌ఖాన్ సినిమాలో భూమిక న‌టిస్తోంది. అయితే ఈ సారి హీరోయిన్‌గా కాదు. స‌ల్మాన్‌ఖాన్ సోద‌రిగా క‌నిపించ‌బోతున్న‌ది.

స‌ల్మాన్‌ఖాన్ హీరోగా న‌టించిన కిసీ కా భాయ్ కిసీ కీ జాన్ సినిమా ఏప్రిల్ 21న రిలీజ్ కానుంది. ఫ్యామిలీ యాక్ష‌న్ ఎంట‌ర్‌టైన‌ర్‌గా రూపొందిన ఈ సినిమాలో పూజాహెగ్డే హీరోయిన్‌గా న‌టిస్తోండ‌గా టాలీవుడ్ హీరో వెంక‌టేష్ కీల‌క పాత్ర‌లో క‌నిపించ‌బోతున్నాడు. ఇందులో వెంక‌టేష్ వైఫ్ పాత్ర‌ను భూమిక పోషిస్తోంది. అంటే వ‌రుస‌కు స‌ల్మాన్‌ఖాన్‌కు సోద‌రి పాత్ర‌ను భూమిక చేయ‌బోతున్న‌ది.

తేరేనామ్ సినిమాలో స‌ల్మాన్ స‌ర‌స‌న హీరోయిన్‌గా న‌టించిన భూమిక ఇప్పుడు కిసీ కా భాయ్ కిసీ కీ జాన్ సినిమాలో సోద‌రి పాత్ర‌ను చేయ‌బోతుండ‌టం ఆస‌క్తిని రేకెత్తిస్తోంది. స‌ల్మాన్‌ఖాన్‌తో క‌లిసి తేరేనామ్ సినిమాలో న‌టించిన జ్ఞాప‌కాల్ని భూమిక గుర్తుచేసుకున్న‌ది. తేరేనామ్ ఆడియో లాంఛ్ ఈవెంట్‌లో స‌ల్మాన్‌ఖాన్‌ను వేదిక‌పైనే స‌ల్మాన్‌భాయ్ అంటూ పిల‌వ‌డంతో అభిమానులు త‌న‌ను చాలా విమ‌ర్శించార‌ని భూమిక తెలిపింది.

అయితే స‌ల్మాన్ మాత్రం ఆ విష‌యాన్ని సీరియ‌స్‌గా తీసుకోలేద‌ని, త‌న‌ను పేరు పెట్టి పిలిస్తే చాలాని చెప్పాడ‌ని అన్న‌ది. సార్ అని పిలిచినా అలా కూడా వ‌ద్దంటూ వారించాడ‌ని భూమిక గుర్తుచేసుకున్న‌ది. కాగా తెలుగులో ప‌వ‌న్ క‌ళ్యాణ్ హీరోగా న‌టించిన కాట‌మ‌రాయుడు ఆధారంగా కిసీ కా భాయ్ కిసీ కీ జాన్ సినిమా రూపొందుతోంది. ఈద్ కానుక‌గా రిలీజ్ కానున్న ఈ సినిమాపై బాలీవుడ్‌లో భారీగా అంచ‌నాలు నెల‌కొన్నాయి.