Akhil Risky Stunt: అఖిల్ రిస్కీ స్టంట్.. 172 అడుగుల భవనంపై నుంచి దూకిన హీరో.. ఎందుకో తెలుసా?

Akhil Risky Stunt: అఖిల్ అక్కినేని హీరోగా సురేందర్ రెడ్డి దర్శకత్వంలో ఏజెంట్ సినిమా రానున్న సంగతి తెలిసిందే. ఇప్పటికే విడుదల కావాల్సి ఉన్న ఈ సినిమా కొన్ని కారణాల వల్ల ఆలస్యమవుతూ వచ్చింది. అయితే ఎట్టకేలకు ఏప్రిల్ 28న ప్రపంచ వ్యాప్తంగా ప్రేక్షకుల ముందుకు రానుందీ మూవీ. ఇప్పటికే విడుదలైన టీజర్, గ్లింప్స్, పాటలపై ప్రేక్షకుల నుంచి విపరీతంగా రెస్పాన్స్ వచ్చింది. దీంతో భారీగా అంచనాలు నెలకొన్నాయి. సినిమా విడుదల దగ్గర పడుతున్న తరుణంలో ఏజెంట్ టీమ్ ప్రమోషన్లను ముమ్మరం చేసింది. హీరో అఖిల్ వరుస పెట్టి ఇంటర్వ్యూల్లో పాల్గొంటూ సినిమా గురించి ఆసక్తికర విషయాలను వెల్లడిస్తున్నారు.

తాజాగా అఖిల్.. ఏజెంట్ మూవీకి విభిన్నంగా ప్రమోషన్ నిర్వహిస్తున్నారు. విజయవాడ ప్రమోషన్లలో పాగ్లొన్న అక్కినేని హీరో.. 172 అడుగుల ఎత్తున్న బిల్డింగ్‌పై నుంచి తాళ్ల సహాయంతో జంప్ చేశాడు. ఇంతవరకు ఏ టాలీవుడ్ హీరో కూడా ఈ విధంగా ప్రమోషన్ చేయలేదు. ఏజెంట్ పోస్టర్ లాంచ్ ఈవెంట్‌లో భాగంగా విభిన్నమైన సాహసం చేశారు. అఖిల్ సాహాసాన్ని చూసిన అభిమానులు కూడా షాకవుతున్నారు

ఈ పోస్టర్‌లో అఖిల్ ఆకట్టుకుంటున్నాడు. అదిరిపోయే ఫిజిక్‌తో పాటు గ్రీక్ గాడ్‌గా కనిపిస్తున్నారు. సిక్స్ ప్యాక్ బాడీని చూపిస్తూ ఆకర్షణీయంగా కనిపంచారు. ఇప్పటికే ఏజెంట్ సినిమాలో వైల్డ్‌గా నటించి సినిమాపై అంచనాలు పెంచేశారు. ఏప్రిల్ 18న ఏజెంట్ ట్రైలర్ విడుదల కానుంది. కాకినాడ ఎంసీ లారిన్ హైస్కూల్ గ్రౌండ్స్‌ ఇందుకు వేదికగా మారనుంది.

ఏకే ఎంటర్‌టైన్మెంట్స్ పతాకంపై అనిల్ సుంకర ఈ సినిమాను నిర్మిస్తున్నారు. వక్కంతం వంశీ కథను అందిస్తున్నారు. సాక్షి వైద్య ఈ చిత్రంలో హీరోయిన్‌గా నటిస్తోంది. ధ్రువ సినిమాకు అదిరిపోయే మ్యూజిక్ ఇచ్చిన హిప్ హాప్ తమిళన్ ఈ చిత్రానికి సంగీతాన్ని సమకూరుస్తున్నారు. సురేందర్ రెడ్డి దర్శకత్వం వహిస్తున్నారు. తెలుగుతో పాటు మలయాళంలో ముందు విడుదల కానుంది. ఆ తర్వాత ఇతర భాషల్లోనూ రిలీజ్ కానున్నట్లు తెలుస్తోంది.