Adipurush Collections: సగానికి పడిపోయిన ఆదిపురుష్ క‌లెక్ష‌న్స్ - బ్రేక్ ఈవెన్ కావాలంటే ఇంకా ఎన్ని కోట్లు రావాలంటే?
Adipurush Collections: ప్రభాస్ ఆదిపురుష్ మూవీ క‌లెక్ష‌న్స్ స‌గానికిపైగా ప‌డిపోయాయి. నాలుగోరోజు ఈ సినిమాకు వ‌చ్చిన క‌లెక్ష‌న్స్ ఎంతంటే..
Adipurush Collections: మండే బాక్సాఫీస్ టెస్ట్‌లో ప్రభాస్ ఆదిపురుష్(Adipurush) మూవీ ఫెయిలైంది. సోమ‌వారం ఈ మూవీ క‌లెక్ష‌న్స్ స‌గానికిపైగా త‌గ్గుముఖం ప‌ట్ట‌డం సినిమా యూనిట్‌తో పాటు ట్రేడ్ వ‌ర్గాల‌ను క‌ల‌వ‌ర‌పాటుకు గురిచేసింది. ఆదివారం రోజు వ‌ర‌ల్డ్ వైడ్‌గా ఆదిపురుష్ మూవీ దాదాపు 40 కోట్ల వ‌ర‌కు షేర్ క‌లెక్ష‌న్స్ రాబ‌ట్టిన సంగ‌తి తెలిసిందే. సోమ‌వారం అందులో స‌గం కూడా వ‌సూళ్ల‌ను సొంతం చేసుకోలేక‌పోయింది. 12 కోట్ల‌కు అటుఇటుగా క‌లెక్ష‌న్స్ ద‌క్కించుకొని నిరాశ‌ప‌రిచింది.
తొలిరోజు వ‌ర‌ల్డ్ వైడ్‌గా 70 కోట్ల షేర్ క‌లెక్ష‌న్స్ రాబ‌ట్టిన ఈ మూవీ నాలుగోరోజు 10 కోట్ల‌కు చేరువ‌డంతో ఈ సినిమా బ్రేక్ ఈవెన్ అవుతుందా? లేదా? అన్న‌ది ఆస‌క్తిక‌రంగా మారింది. ఈ సినిమా ప్రీ రిలీజ్ బిజినెస్ వ‌ర‌ల్డ్ వైడ్‌గా 240 కోట్ల వ‌ర‌కు జ‌రిగింది. ఇప్ప‌టివ‌ర‌కు నాలుగు రోజుల్లో ఈ సినిమా 170 కోట్ల వ‌ర‌కు క‌లెక్ష‌న్స్ రాబ‌ట్టింది.
బ్రేక్ ఈవెన్ టార్గెట్ రీచ్ కావ‌డానికి మ‌రో 70 కోట్ల‌కుపైగా క‌లెక్ష‌న్స్ రావాల్సి ఉంది. సోమ‌వారం క‌లెక్ష‌న్స్ చూస్తుంటే అది అసాధ్య‌మ‌నే అనిపిస్తోంది. నెగెటివ్ టాక్ కార‌ణంగా మంగ‌ళ‌వారం ఈ వ‌సూళ్లు మ‌రింత త‌గ్గే అవ‌కాశం ఉన్న‌ట్లు ప్ర‌చారం జ‌రుగుతోంది.
నాలుగోరోజు క‌లెక్ష‌న్స్ ఎంతంటే...
నాలుగోరోజు ఆదిపురుష్ సినిమా తెలుగు రాష్ట్రాల్లో ఎడు కోట్ల‌కుపైగా గ్రాస్‌ను నాలుగు కోట్ల వ‌ర‌కు షేర్‌ను రాబ‌ట్టిన‌ట్లు ట్రేడ్ వ‌ర్గాలు అంచ‌నా వేశాయి. నైజాంలో మిన‌హా మిగిలిన ఏరియాల్లో సోమ‌వారం ఈ సినిమా పెద్ద‌గా ప్ర‌భావాన్ని చూప‌లేక‌పోయింది. నైజాంలో సోమ‌వారం ఆదిపురుష్ మూవీ రెండు కోట్ల క‌లెక్ష‌న్స్ రాబ‌ట్ట‌గా మిగిలిన అన్ని ప్రాంతాల్లో క‌లిపి మ‌రో రెండు కోట్లు వ‌చ్చిన‌ట్లు స‌మాచారం.
ఓవ‌ర్‌సీస్‌, నార్త్‌, మిగిలిన సౌత్ రాష్ట్రాల్లో క‌లిపి సోమ‌వారం రోజు ఆదిపురుష్ మూవీ 24 కోట్ల గ్రాస్‌ను, ప‌న్నెండు కోట్ల షేర్‌ను సొంతం చేసుకున్న‌ది. రామాయ‌ణ గాథ ఆధారంగా ద‌ర్శ‌కుడు ఓంరౌత్ ఈ సినిమాను తెర‌కెక్కించారు. ప్రభాస్(Prabhas), కృతిస‌న‌న్ హీరోహీరోయిన్లుగా న‌టించిన ఈ సినిమాలో సైఫ్ అలీఖాన్ (Saif Ali Khan)విల‌న్ పాత్ర‌ను పోషించాడు.
