Lok sabha elections : కేరళలో బిగ్ ఫైట్.. ఎవరిది విజయం? మోదీ మ్యాజిక్ ఈసారైనా పనిచేస్తుందా?
Lok sabha elections Kerala : 2024 లోక్సభ ఎన్నికల నేపథయ్యంలో కేరళలో హడావుడి ఊపందుకుంది. ఎల్డీఎఫ్- యూడీఎఫ్లు.. ఒక పార్టీపై ఇంకో పార్టీ.. పైచేయి సాధించేందుకు తీవ్రంగా శ్రమిస్తున్నాయి. వీటి మధ్య బీజేపీ కూడా ఈసారి ఖాతా తెరవాలని ప్రయత్నిస్తోంది.
2024 lok sabha elections in Kerala : 2024 లోక్సభ ఎన్నికలు సమీపిస్తున్నాయి. ఇప్పటికే దేశవ్యాప్తంగా రాజకీయ హడావుడి కనిపిస్తోంది. 400 సీట్లు గెలవాలను బీజేపీ టార్గెట్గా పెట్టుకుంది. విపక్షాలు.. ఇండియా కూటమిగా ఏర్పడి, మోదీని గద్దెదించేందుకు తీవ్రంగా కృషిచేస్తున్నాయి. ఈ నేపథ్యంలో అందరి చూపు దక్షిణాది రాష్ట్రాలపై పడింది. మరీ ముఖ్యంగా.. కేరళలో లోక్సభ ఎన్నికల హడావుడి ఇప్పటికే తారస్థాయిలో ఉంది. లోక్సభ ఎన్నికల్లో కచ్చితంగా విజయం సాధించాలని అన్ని పార్టీలు తీవ్రంగా శ్రమిస్తున్నాయి. మరి ఈసారి ఎవరు గెలుస్తారు? కేరళలో 2019 లోక్సభ ఎన్నికల ఫలితాలు ఎలా ఉన్నాయి? రాష్ట్రంలో బీజేపీ ప్రభావం ఎంత? ఇక్కడ చూద్దాము..
కేరళలో 2019 లోక్సభ ఎన్నికల ఫలితాలు ఇలా..
లోక్సభలో మొత్తం 545 సీట్లు ఉంటాయి. వాటిల్లో 543 సీట్లకు ఎన్నికలు జరుగుతాయి. ఈ 543 సీట్లల్లో 20 సీట్లు కేరళ రాష్ట్రానికి చెందినవి. గత లోక్సభ ఎన్నికల్లో ఇక్కడ కాంగ్రెస్ నేతృత్వంలోని యూడీఎఫ్ హవా కొనసాగింది. 20 సీట్లల్లో.. 19 చోట్ల విజయం సాధించింది. బీజేపీ నేతృత్వంలోని ఎన్డీఏ కూటమి.. కేంద్రంలో ప్రభుత్వాన్ని ఏర్పాటు చేయగలిగినా.. కేరళలో మాత్రం ఒక్క సీటు కూడా గెలవలేదు. అధికార ఎల్డీఎఫ్ (లెఫ్ట్ డెమొక్రటిక్ ఫ్రెంట్).. ఒక్కటంటే ఒక్క సీటులోనే విజయం సాధించింది.
కేరళ రాజకీయాల్లో మొత్తం మూడు కూటములు ఉంటాయి. ఒకటి యూడీఎఫ్. ఇందులో కాంగ్రెస్, ఇండియన్ యూనియన్ ముస్లిం లీగ్, కేరళ కాంగ్రెస్ (ఎం), రివొల్యూషనరీ సోషలిస్ట్ పార్టీలు ఉంటాయి. ఎల్డీఎఫ్లో సీపీఐ(ఎం), సీపీఐ పార్టీలు ఉంటాయి. ఇక ఎన్డీఏలో బీజేపీతో పాటు భారత్ ధర్మ జన సేన, కేరళ కాంగ్రెస్ (టీ) ఉన్నాయి.
lok sabha elections latest news : నాటి కాంగ్రెస్ అధ్యక్షుడు రాహుల్ గాంధీ.. కేరళ వయనాడ్ నుంచి పోటీ చేయడం హాట్ టాపిక్గా మారింది. వాస్తవానికి ఆయన సొంత నియోజవర్గం.. ఉత్తర్ప్రదేశ్లోని అమేఠీ. ప్రతిసారి ఆ ఒక్క సీటు నుంచే పోటీ చేసేవారు. కానీ గత ఎన్నికల్లో రెండు చోట్ల పోటీ చేశారు. అమెఠీలో ఓడిపోయారు. కేంద్రమంత్రి, బీజేపీ అభ్యర్థి స్మృతి ఇరానీ చేతిలో రాహుల్ గాంధీకి ఘోర భంగపాటు ఎదురైంది. కానీ.. వయనాడ్ ప్రజలు మాత్రం రాహుల్ గాంధీకి స్వాగతం పలికారు. భారీ మెజారిటీతో ఆయన్ని గెలిపించారు. మోదీ ఇంటిపేరు కేసులో.. రాహుల్ గాంధీ తన సభ్యత్వాన్ని కోల్పోయినా, ఆయన వెన్నంటే నిలిచారు. ఈసారి కూడా.. రాహుల్ గాంధీ కేరళ వయనాడ్ నుంచే పోటీ చేయడం ఖాయంగానే కనిపిస్తోంది.
2021 అసెంబ్లీ ఎన్నికల ప్రభావం ఉంటుందా?
కేరళలో అనాదిగా ఓ ఆనవాయతీ వస్తూ ఉండేది. అక్కడ.. యూడీఎఫ్- ఎల్డీఎఫ్ ప్రధాన ప్రత్యర్థులుగా ఉన్నారు. అక్కడి ప్రజలు.. ఒకే పార్టీకి వరుసగా రెండుసార్లు అధికారాన్ని కట్టబెట్టలేదు. కానీ 2021లో ఈ ఆనవాయతీకి బ్రేక్ పడింది. అధికారపక్షంగా నాటి ఎన్నికల్లో పోటీ చేసిన ఎల్డీఎఫ్.. అంచనాలకు మించిన ఘన విజయం సాధించింది. మొత్తం 140 అసెంబ్లీ సీట్లల్లో 99 చోట్ల గెలిచింది. ఈసారి కచ్చితంగా గెలిచి ప్రభుత్వాన్ని ఏర్పాటు చేస్తుందనుకున్న కాంగ్రెస్కు ఘోర పరాభవం ఎదురైంది. కేవలం 41 సీట్లతో సరిపెట్టుకుంది. అక్కడ బీజేపీ పెద్దగా ప్రభావం చూపించలేకపోయింది.
మరి కేరళ అసెంబ్లీ ఎన్నికల ప్రభావం లోక్సభ ఎన్నికలపై ఏమాత్రం ఉంటుందో వేచి చూడాలి.
లోక్సభ ఎన్నికల కోసం పార్టీల కసరత్తు..
Kerala UDF : 2024 లోక్సభ ఎన్నికల కోసం కేరళలో పార్టీల కసరత్తు ముమ్మరంగా సాగుతోంది. ఎల్డీఎఫ్ కూటమిలో సీట్ల సద్దుబాటు ఓ కొలిక్కి వచ్చినట్టు తెలుస్తోంది. రానున్న ఎన్నికల్లో.. సీపీఎం 15 చోట్ల పోటీ చేస్తుందని సమాచారం. సీపీఐకి 4 సీట్లు దక్కుతాయని, కేరళ కాంగ్రెస్ (ఎం) ఒక చోట పోటీ చేస్తుందని తెలుస్తోంది.
అయితే.. ఈసారి ఎట్టిపరిస్థితుల్లోనైనా గెలవాలని, 2019 లోక్సభ ఎన్నికల ఫలితాలు రిపీట్ అవ్వకూడదని ఎల్డీఎఫ్ బృందం బలంగా ఏర్పాట్లు చేసుకుంటున్నట్టు తెలుస్తోంది. ఇందుకోసం.. మాజీ ఆరోగ్య శాఖ మంత్రి కేకే శైలజ, మాజీ ఆర్థికమంత్రి థామస్ ఐసక్, ప్రస్తుత కేబినెట్ మంత్రి కే రాధాకృష్ణన్, ప్రముఖ నటుడు ముకేశ్లను బరిలో దింపాలని చూస్తోందని సంబంధిత వర్గాలు వెల్లడించాయి.
Keral LDF : యూడీఎఫ్ పరిస్థితి మాత్రం కాస్త ఇబ్బందికరంగానే ఉన్నట్టు తెలుస్తోంది! యూడీఎఫ్లో భాగమైన ఇండియన్ యూనియన్ ముస్లిం లీగ్.. సీట్ల సద్దుబాటు వ్యవహారంలో కాస్త అసంతృప్తిగా ఉన్నట్టు వార్తలు వస్తున్నాయి. మూడో లోక్సభ సీటు కావాలని ఆ పార్టీ అడుగుతున్నట్టు.. అందుకు కాంగ్రెస్ నేతృత్వంలోని యూడీఎఫ్ సభ్యులు అంగీకరించడం లేదని తెలుస్తోంది. ఐయూఎంఎల్కు ఇప్పటికే ఇద్దరు ఎంపీలు ఉన్నారు. ఇప్పుడు ఆ పార్టీ మూడో సీటు అడుగుతోంది. రాజ్యసభ సీటు ఇస్తామని కాంగ్రెస్ చెబుతున్నా.. మూడో లోక్సభ సీటు కచ్చితంగా కావాలని పార్టీ పట్టుబడుతోందట.
ఐయూఎంఎల్ అసంతృప్తిని ఎల్డీఎఫ్ క్యాష్ చేసుకోవాలని ప్రయత్నిస్తోంది! "కాంగ్రెస్ నుంచి అడ్డుకుంటూ.. యూడీఎఫ్లో ఉండటం దేనికి?" అంటూ కామెంట్లు చేశారు సీపీఎం సీనియర్ నేత పీ రాజీవ్.
మరోవైపు.. ఉత్తర కేళలోని ఆరు జిల్లాలు.. అన్ని కూటములకు కీలకంగా మారాయి. ఇక్కడ మొత్తం 9 లోక్సభ సీట్లు ఉంటాయి. వీటిల్లో రెండు నియోజకవర్గాలు.. అత్యంత కీలకంగా ఉంటాయని తెలుస్తోంది. అవి.. వయనాడ్, మలప్పురం. గతంలో ఈ 9 సీట్లల్లో కాంగ్రెస్కు చెందిన యూడీఎఫ్ విజయం సాధించింది. కానీ ఇప్పుడు వాటిని వెనక్కి తీసుకోవాలని ఎల్డీఎఫ్ తీవ్రస్థాయిలో ప్రయత్నాలు చేస్తోంది.
UDF vs LDF in Kerala : బీజేపీకి ఉత్తరాదిన మంచి పట్టు ఉంది. కానీ దక్షిణాదిలో మాత్రం కమలదళానికి ఎప్పటికప్పుడు నిరుత్సాహం ఎదురవుతూనే ఉంది. మొన్నటి వరకు అధికారంలో ఉన్న ఏకైక రాష్ట్రాన్ని (కర్ణాటక) కూడా కోల్పోయింది. మరి కేరళ లోక్సభ ఎన్నికల్లో ఏమేరకు ప్రభావం చూపిస్తుందో వేచి చూడాలి. ఈసారైనా ఖాతా తెరవాలని ఆ పార్టీ బలంగా ప్రయత్నాలు చేస్తోంది. ప్రధాని మోదీ ఎన్ని పర్యటనలు చేపట్టినా, మోదీ మేనియా ఇక్కడ పనిచేస్తున్నట్టు కనిపించడం లేదని రాజకీయ నిపుణులు అభిప్రాయపడుతున్నారు.
మరి కేరళలో యూడీఎఫ్- ఎల్డీఎఫ్ మధ్య ఈసారి రసవత్తర పోరు కనిపిస్తుందా? లేక గత ఎన్నికల్లో జరిగినట్టే.. యూడీఎఫ్ క్లీన్ స్వీప్ చేస్తుందా? కేరళపై మోదీ మ్యాజిక్ ఈసారైనా పనిచేస్తుందా? ఈ ప్రశ్నలకు సమాధానం కోసం 2024 లోక్సభ ఎన్నికల ఫలితాల వరకు వేచి చూడాల్సిందే!
సంబంధిత కథనం