Indian History Congress: కేయూలో రేపటి నుంచి ఇండియన్ హిస్టరీ కాంగ్రెస్
27 December 2023, 9:02 IST
- Indian History Congress: ప్రతిష్టాత్మక ఇండియన్ హిస్టరీ కాంగ్రెస్ కు కాకతీయ యూనివర్సిటీ వేదికగా నిలిచింది. దేశంలోని ఎంతో మంది చరిత్రకారులు, పరిశోధకులు తరలిరానున్న ఈ మెగా సదస్సును రేపటి నుంచి మూడు రోజుల పాటు నిర్వహించనున్నారు.
ఇండియన్ హిస్టరీ కాంగ్రెస్కు కేయూ ఆతిథ్యం
Indian History Congress: ప్రతిష్టాత్మక ఇండియన్ హిస్టరీ కాంగ్రెస్కు కాకతీయ యూనివర్శిటీ ఆతిథ్యం ఇవ్వనుంది. డిసెంబర్ 28, 29, 30 తేదీల్లో సాగనున్న ఈ 82వ ఇండియన్ హిస్టరీ కాంగ్రెస్ కు ఇప్పటికే కేయూను ముస్తాబు చేశారు. ఈ మేరకు వర్సిటీ అధికారులు అన్ని ఏర్పాట్లు పూర్తి చేశారు. ఈ సదస్సుకు రాష్ట్ర మంత్రులతో పాటు వివిధ యూనివర్సిటీలకు చెందిన ప్రొఫెసర్లు ముఖ్య అతిథులుగా హాజరై ప్రసంగించనున్నారు.
30 ఏళ్ల తరువాత కేయూలో హిస్టరీ కళ
ఇండియన్ హిస్టరీ కాంగ్రెస్ అనేది శాస్త్రీయంగా, చరిత్రను కాపాడేందుకు తోడ్పడే ప్రత్యేక వ్యవస్థ కాగా.. ఇందులో దేశవ్యాప్తంగా దాదాపు 35 వేల మంది చరిత్రకారులు, పరిశోధకులు సభ్యులుగా ఉన్నారు. 1935లో ఇండియన్ హిస్టరీ కాంగ్రెస్ ఏర్పడగా.. ప్రతి సంవత్సరం దేశంలోని ఒక్కోచోట ఈ సదస్సు నిర్వహిస్తున్నారు. చివరిసారిగా 1993లో తెలంగాణ సిద్ధాంతకర్త, ప్రొఫెసర్ జయశంకర్ వైస్ ఛాన్సలర్ గా ఉన్న సమయంలో ఈ చరిత్రాత్మక సదస్సుకు కాకతీయ యూనివర్సిటీ వేదికగా నిలవగా.. దాదాపు 30 ఏళ్ల తరువాత మరోసారి ఓరుగల్లు గడ్డకు అవకాశం దక్కింది. దీంతో వీసీ ప్రొఫెసర్ తాటికొండ రమేశ్, రిజిస్ట్రార్ శ్రీనివాసరావు, ఇతర అధికారులు హర్షం వ్యక్తం చేస్తున్నారు.
తరలిరానున్న 2 వేల మంది చరిత్రకారులు
ఇండియన్ హిస్టరీ కాంగ్రెస్ కు దేశంలోని వివిధ ప్రాంతాల నుంచి దాదాపు 2 వేల మంది వరకు చరిత్రకారులు హాజరయ్యే అవకాశం ఉంది. ముఖ్యంగా మూడు రోజుల పాటు సాగే ఈ సదస్సులో 6 సెక్షన్లలో పలువురు పరిశోధకులు సుమారు 1,030 వరకు పరిశోధన పత్రాలు సమర్పించనున్నారు.
ప్రొఫెసర్లు కృష్ణమోహన్ శ్రీమాలి, కుందన్ లాల్ తుతేజా ప్రత్యేక ప్రసంగాలు ఉంటాయని కేయూ అధికారులు తెలిపారు. ఇందులో కృష్ణమోహన్ శ్రీమాలి సనాతన ధర్మంపై కీలక ప్రసంగం చేయనున్నారు. జేఎన్ యూ ప్రొఫెసర్ మహాలక్ష్మి, ప్రొఫెసర్ సుబ్బరాయలు, ప్రొఫెసర్ అరుణ్ బందోపాధ్యాయ, తదితరులు భారతీయ చరిత్రపై ముఖ్య ప్రసంగాలు ఇస్తారు.
హాజరుకానున్న డిప్యూటీ సీఎం, మంత్రులు
గురు, శుక్ర, శనివారాల్లో నిర్వహించనున్న 82వ ఇండియన్ హిస్టరీ కాంగ్రెస్ కు కేయూ క్యాంపస్ లో ఏర్పాట్లు పూర్తి చేశారు. ఏ ఈవెంట్ కు ఇబ్బందులు కలగకుండా తగిన జాగ్రత్తలు చేపట్టారు. కాగా ఈ హిస్టారికల్ ఈవెంట్కు రాష్ట్ర రాష్ట్ర ఉప ముఖ్యమంత్రి మల్లు భట్టి విక్రమార్క ముఖ్య అతిథిగా హాజరుకానున్నారు. ఆయన వెంట ఉమ్మడి వరంగల్ కు చెందిన రాష్ట్ర అటవీ, పర్యావరణ, దేవాదాయశాఖ మంత్రి కొండా సురేఖ, పంచాయతీరాజ్, గ్రామీణాభివృద్ధి, స్త్రీ, శిశు సంక్షేమశాఖ మంత్రి సీతక్క పాల్గొననున్నారు. ఈ మేరకు కాకతీయ యూనివర్సిటీ అధికారులు మంత్రులను ఆహ్వానించి, అందుకు తగ్గట్టుగా ఏర్పాట్లు పూర్తి చేశారు.
కీలక ఘట్టాలకు వేదిక
ఈ ఇండియన్ హిస్టరీ కాంగ్రెస్ పలు కీలక ఘట్టాలకు వేదిక కానుంది. జవహర్ లాల్ నెహ్రూ యూనివర్సిటీకి చెందిన ప్రొఫెసర్ ఆదిత్య ముఖర్జీ ఇండియన్ హిస్టరీ కాంగ్రెస్ నూతన అధ్యక్షుడిగా బాధ్యతలు స్వీకరించనున్నారు. ఐదేళ్లకోసారి అందించే జీవన సాఫల్య పురస్కారాన్ని ప్రొఫెసర్ రామచంద్ర గుహకు అందించనున్నారు.
రెండేళ్లకోసారి ఉత్తమ పుస్తకానికి అందించే పురస్కారాన్ని కృష్ణమోహన్ శ్రీమాలి అందుకోనున్నారు. ఈ రెండు పురస్కారాలు పొందిన వీరిద్దరికి రూ.50 వేల నగదు బహుమతి కూడా ఉంటుంది. వీటితోపాటు మరో 11 మంది యువ పరిశోధకులకు కూడా ప్రశంసా పత్రాలు, బహుమతులు అందించనున్నారు.
(హిందుస్తాన్ టైమ్స్ తెలుగు, వరంగల్ ప్రతినిధి)