WTC Points Table | టెస్టు ఛాంపియన్‌షిప్‌లో శ్రీలంక జోరు.. భారత్ ఎక్కడుందంటే?

బంగ్లాదేశ్‌తో జరిగిన రెండు టెస్టుల సిరీస్‌ను శ్రీలంక 1-0 తేడాతో విజయం సాధించింది. ఢాకాలోని షేర్ బంగ్లా స్టేడియం వేదికగా జరిగిన రెండో టెస్టులో లంక జట్టు 10 వికెట్ల తేడాతో ఘనవిజయం సాధించింది. దీంతో ప్రపంచ టెస్టు ఛాంపియన్‌షిప్ పాయింట్ల పట్టికలో తన స్థానాన్ని మెరుగుపరచుకుంది. ఈ విజయంతో గతంలో ఐదో స్థానంలో ఉన్న శ్రీలంక.. ఇప్పుడు నాలుగో స్థానానికి ఎగబాకింది. ఇదే సమయంలో బంగ్లాదేశ్ 8వ స్థానానికి పడిపోయింది.

శ్రీలంక ఆడిన 6 సిరీస్‌ల్లో మూడింటిలో విజయం సాధించగా.. రెండింటిలో పరాజయం చెందింది. ఒకటి డ్రాగా తేలింది. దీంతో 55.56 శాతంతో 40 పాయింట్లతో నాలుగో స్థానంలో నిలిచింది. అన్నింటికంటే ముందు ఆస్ట్రేలియా ఐదింటిలో విజయం సాధించి 72 పాయింట్లు, 75 శాతంతో అగ్రస్థానంలో నిలిచింది. అనంతరం దక్షిణాఫ్రికా 71.43 శాతంతో రెండో స్థానంలో, 58.33 శాతంతో భారత్ మూడో స్థానంలో ఉన్నాయి.

ప్రస్తుతం ఇంగ్లాండ్ 12.50 శాతంతో అన్నింటికంటే కింది స్థానంలో ఉండగా.. బంగ్లాదేశ్ 16.67 శాతంతో కింది నుంచి రెండో స్థానం అంటే 8వ స్థానంలో నిలిచింది. పాకిస్థాన్ 52.38 శాతంతో ఐదో స్థానంలో ఉండగా.. 38.89 శాతంతో న్యూజిలాండ్ ఆరు, 35.71 శాతంతో వెస్టిండీస్ 7వ స్థానాల్లో నిలిచాయి.

ఢాకా వేదికగా బంగ్లాదేశ్‌తో జరిగిన రెండో టెస్టులో శ్రీలంక 10 వికెట్ల తేడాతో ఘనవిజయం సాధించింది. తొలుత బ్యాటింగ్ చేసిన బంగ్లా మొదటి ఇన్నింగ్స్‌లో 365 పరుగులకు ఆలౌట్ కాగా.. అనంతరం శ్రీలంక 506 పరుగుల భారీస్కోరు చేసింది. మ్యాథ్యూస్(145), చండీమల్(124) శతకాలతో విజృంభిచగా.. కెప్టెన్ కరుణరత్నే(80), ఓషాడా ఫెర్నాండో(57) ఆకట్టుకున్నారు. అనంతరం రెండో ఇన్నింగ్స్‌లో బంగ్లాదేశ్ 169 పరుగులకే ఆలౌట్ కాగా.. మిగిలిన 29 పరుగుల లక్ష్యాన్ని వికెట్లేమి పడకుండా లంక జట్టు ఛేదించింది.