Viral Video: నదిలో నయా బిజినెస్..! భక్తుల తరఫున ఒక్కో మునకకు రూ.10

Viral Video: ప్రస్తుత కాలంలో కొందరు సరికొత్త ఐడియాలతో వ్యాపారాలు చేస్తున్నారు. ఎవరికీ రాని విభిన్నమైన ఐడియాలతో మరికొందరు బిజినెస్ మొదలుపెడుతున్నారు. మెదడులో ఉండే ఆలోచనలను ఆచరణలోకి తెస్తున్నారు. అయితే ఇక్కడ చెప్పేది మాత్రం ఏ స్టార్టప్ కంపెనీ గురించో కాదు. చలికాలంలో ఓ వ్యక్తికి వచ్చిన బిజినెస్ ఐడియా గురించి. శీతాకాలంలో చల్లటి నీరు ఉండే నదిలో మునక వేసేందుకు చార్జీలను వసూలు చేస్తున్నారు ఆ వ్యక్తి. భక్తుల తరఫున నదిలో మునకలేసే (Holy Dip) బిజినెస్ చేస్తున్నారు. ప్రస్తుతం ఇందుకు సంబంధించిన వీడియో సోషల్ మీడియాలో చక్కర్లు కొడుతోంది. అతడి ఐడియాకు చాలా మంది నెటిజన్లు ఫిదా అవుతున్నారు. పూర్తి వివరాలు ఇవే.

నీరు చల్లగా ఉన్న నదిలో భక్తుల తరఫున మునకలు (పుణ్య స్నానం) వేసే బిజినెస్ చేస్తున్న ఆ వ్యక్తి ఐడియా నెటిజన్లను విపరీతంగా ఆకట్టుకుంటోంది. ఐఏఎస్ అవనీశ్ శరణ్ ఈ వీడియోను ట్విట్టర్‌లో పోస్ట్ చేశారు. “ఈ సీజన్‍లో ఇది బెస్ట్ స్టార్టప్” అని హిందీలో రాసుకొచ్చారు. ఆ తర్వాత ఇది వైరల్‍గా మారింది. సోషల్ మీడియాలో చక్కర్లు కొడుతోంది. ఇంతకీ ఆ వీడియోలో ఏముందంటే..

ఒక్కో మునకకు రూ.10

Viral Video: ఓ వ్యక్తి.. షార్ట్ ధరించి నది మధ్యలో ఉండే రెయిలింగ్‍పై కూర్చున్నట్టుగా ఆ వీడియోలో ఉంది. తమ తరఫున నదిలో మునగాలంటే ఒక్కో మునకకు రూ.10 ఇవ్వండి అని ఆ వ్యక్తి.. అక్కడికి వచ్చిన భక్తులతో హిందీలో అన్నారు. “ఇంతటి చల్లని వాతావరణంలో మీ తరఫున నేను నదిలో మునకలు వేస్తాను. మీరు చెబుతూ మునుగుతాను. దీంతో మీకు ప్రతిఫలం దక్కుతుంది. నాకు రూ.10వస్తాయి” అని ఆ వ్యక్తి.. భక్తులను పిలుస్తున్నట్టు ఆ వీడియోలో ఉంది. కాగా, ఇది ఏ ప్రాంతంలో జరిగిందో స్పష్టత లేదు.

ఈ వీడియో కొన్ని రోజుల ముందు ట్విట్టర్‌లో పోస్ట్ కాగా.. విపరీతంగా వైరల్ అవుతోంది. వేలాది లైక్‍లు, కామెంట్లు వస్తున్నాయి. ఈ వీడియోకు నెటిజన్లు విభిన్నంగా స్పందిస్తున్నారు. ఆన్‍లైన్ పేమెంట్ సదుపాయం కూడా కల్పించాలని, ఇంట్లో ఉండే తమ పేరుపై కూడా మునకలేయాలని ఓ యూజర్ సరదాగా కామెంట్ చేశారు. బెస్ట్ ఇన్నోవేషన్ అని చాలా మంది రాసుకొచ్చారు. ఇండియాలో మాత్రమే ఇలా జరుగుతుందని అంటూ మరికొందరు కామెంట్ చేశారు.