Dawood Ibrahim|దావూద్‌కు లింకున్న మనీలాండరింగ్‌ కేసులో మహారాష్ట్ర మంత్రి అరెస్ట్

ముంబై: ఈ కేసులో బుధవారం ఉదయం 8 గంటల నుంచీ ఈడీ.. ఎన్సీపీ నేత, మంత్రి అయిన నవాబ్‌ మాలిక్‌ను ప్రశ్నిస్తోంది. అండర్‌ వరల్డ్ డాన్ దావూద్‌ ఇబ్రహీం, అతని సోదరులు అనీస్‌, ఇక్బాల్‌, సహాయకుడు చోటా షకీల్‌లకు లింకున్న ఈ కేసులో ఈడీ నవాబ్‌ మాలిక్‌కు సమన్లు జారీ చేసింది. 

దావూద్‌తోపాటు అండర్‌ వరల్డ్‌కు సంబంధించిన క్లూల కోసం గత వారం ముంబైలో పలుచోట్లు ఈడీ సోదాలు నిర్వహించింది. ఈ మధ్యే నేషనల్‌ ఇన్వెస్టిగేషన్‌ ఏజెన్సీ (ఎన్‌ఐఏ).. దావూద్‌ ఇబ్రహీంపై నమోదు చేసిన కేసును దృష్టిలో ఉంచుకొనే ఈ సోదాలు నిర్వహించింది ఎన్‌ఫోర్స్‌మెంట్‌ డైరెక్టరేట్‌. 

దావూద్‌ ఇబ్రహీం సహాయకుడు సర్దార్‌ షావలీ ఖాన్‌, దావూద్‌ సోదరి హసీనా పార్కర్‌ బాడీగార్డ్‌ సలీమ్‌ పటేల్‌లతో నవాబ్‌ మాలిక్‌ జరిపిన డీల్‌లకు సంబంధించి ఈడీ దర్యాప్తు చేస్తోంది. ఈ ఇద్దరి నుంచీ కోట్ల విలువ చేసే ప్రాపర్టీని నవాబ్‌ మాలిక్‌ కేవలం రూ.30 లక్షలకు కొనుగోలు చేసినట్లు ప్రతిపక్ష నేత దేవేంద్ర ఫడ్నవీస్‌ ఆరోపిస్తున్నారు. 

దీంతోపాటు నవాబ్‌ మాలిక్‌ ఇతర వ్యాపార లావాదేవీలు, ఆయన సన్నిహితులపై కూడా ఈడీ ఓ కన్నేసి ఉంచింది. నవాబ్‌ మాలిక్‌కు వ్యతిరేకంగా ఈడీ దగ్గర సాక్ష్యం కూడా ఉన్నట్లు విశ్వసనీయ వర్గాలు వెల్లడించాయి.