Bed Time Habit : మీకు రాత్రిపూట ఈ అలవాటు ఉంటే.. అది బంధానికి విలన్

బిజీ లైఫ్‌లో వైవాహిక జీవితంలోని చాలా మంచి అలవాట్లు దూరమవుతున్నాయి. బదులుగా అనేక కొత్త చెడు అలవాట్లు ప్రవేశించాయి. ఇవి సంబంధాలకు హానికరం, నెమ్మదిగా బంధాన్ని విచ్ఛిన్నం చేస్తాయి. ఇది వివాహానికి విలన్ లాంటిదని చెప్పవచ్చు. అలాంటి రాత్రిపూట అలవాటు ఏంటో చూద్దాం.. ఇది చాలా మంది రాత్రి పడుకున్న తర్వాత చేసే అలవాటు. మీ ఫోన్‌ని తీయడం, సోషల్ మీడియా స్క్రోలింగ్ చేయడం.

మీ భాగస్వామి పక్కన పడుకుని సైలెంట్ గా ఫోన్ స్క్రోలింగ్ చేసే అలవాటు కుటుంబ సంబంధాలను దెబ్బతీస్తుందని నిపుణులు హెచ్చరిస్తున్నారు. వాస్తవానికి మీ భాగస్వామితో భాగస్వామ్యం చేయవలసిన విలువైన క్షణాలు ఇక్కడ కోల్పోతారు. మీ భాగస్వామితో సాన్నిహిత్యం, ప్రేమను పెంచుకోవడానికి ఈ గొప్ప అవకాశాన్ని వృథా చేయడం అవివేకం.

ఎప్పుడూ మీ భాగస్వామికి సంబంధించిన విశేషాలు చెప్పాలి, వివరాలు పంచుకోవాలి. ఆ విషయాలు కొత్తగా పెళ్లయిన వారు మాత్రమ కాదు. అందరూ చేయాలి. బలమైన వివాహ బంధానికి నిరంతర ప్రయత్నాలు అవసరం. మరింత కచ్చితంగా చెప్పాలంటే మీ వివాహాన్ని మరింత ఆరోగ్యవంతంగా మార్చుకోవడానికి మీరు శ్రద్ధ వహించాల్సిన కొన్ని విషయాలు ఉన్నాయి.

భాగస్వాములిద్దరూ రోజంతా బిజీ బిజీగా ఉంటారు. ఒకరితో ఒకరు మాట్లాడుకోవడానికి, ప్రత్యేకతలు, భవిష్యత్తు విషయాలు, ముఖ్యమైన నిర్ణయాలు, అనుభవాలను పంచుకునే సమయం రాత్రులు. అయితే అలా కాకుండా ఈ రోజుల్లో చాలా మంది భార్యాభర్తలు ఆ సమయంలో ఫోన్‌నే చూస్తున్నారు. ఫోన్ వైపు చూస్తూ తర్వాత ఫోన్ పక్కన పెట్టి పడుకుంటారు. మీ భాగస్వామితో సత్సంబంధాలను ఏర్పరచుకునే సమయం ఇది. దానిని నాశనం చేయకూడదు.

చాలా మంది ప్రధాన ఫిర్యాదు ఏమిటంటే వారి భాగస్వామి ఫోన్‌లో ఎక్కువ సమయం గడుపుతారని. ముఖ్యంగా రాత్రి సమయంలో. మీ భాగస్వామితో మాట్లాడటానికి ఏమీ లేకుంటే, మౌనంగా పడుకోండి. ఫోన్లో మాత్రం ఉండకూడదు. అలా కాకుండా ఆ సమయంలో మీ ఫోన్ చూడొచ్చు అని అనుకుంటే మీ భాగస్వామి స్త్రీ అయినా, పురుషుడైనా బాధపడుతారు.

ఒకే మంచంలో ఉన్నప్పటికీ రాత్రి సమయ ఫోన్ వాడకం భాగస్వాములను రెండు ధృవాలుగా ఉంచుతుంది. ఫోన్‌ని చూస్తున్న వ్యక్తి కొన్నిసార్లు అవతలి వ్యక్తి చెప్పేది కూడా వినలేరు. వివాహంలో వారికి తగిన శ్రద్ధ లభించకపోవడం దంపతుల మధ్య దూరాన్ని పెంచుతుంది.

సోషల్ మీడియా, డిజిటల్ మీడియాను మీ జీవితానికి దూరంగా ఉంచడం ఈ రోజుల్లో సాధ్యం కాదు. చాలా మంది డిజిటల్ మీడియా ద్వారా వార్తలను తెలుసుకుంటారు. బాహ్య ప్రపంచంతో సంభాషిస్తారు.

సోషల్ మీడియాలోనే చిక్కుకోకుండా జాగ్రత్త వహించాలి. సోషల్ మీడియా వినియోగంలో భాగస్వామి ఆసక్తులను కూడా గౌరవించండి. ఇద్దరు భాగస్వాములు పడుకునే ముందు కొంత సమయం వరకు తమ ఫోన్‌లను చూడటానికి ఇష్టపడితే పర్వాలేదు. పరస్పర అవగాహనతో ముందుకు తీసుకెళ్లవచ్చు. అలా కాకుండా ఒక పక్క ఒకరు ఫోన్ ద్వారా మరో లోకంలో ప్రయాణిస్తుంటే మరో పక్క తమ భాగస్వామితో మాట్లాడలేక బాధపడుతుంటే అది చెడు అలవాటు అనే చెప్పాలి.

ఫోన్‌ని చూడటం, సోషల్ మీడియాను ఉపయోగించడం కోసం నిర్దిష్ట సమయాలను సెట్ చేయాలి. భోజనం, ఇతర కుటుంబ సమావేశాల సమయంలో ఫోన్‌ను దూరంగా ఉంచాలి. కనీసం వారానికి ఒక రోజు ఫోన్‌ని ఉపయోగించకపోవడం చేయాలి.