Diet Trends in 2023: డైటింగ్‌ నామ సంవత్సరం.. ఈ ఏడాది ట్రెండ్‌లో ఉన్న 4 డైట్లు

బరువు తగ్గడం అనేది అందరికీ పెద్ద పనే. వ్యాయామాలు.. తినే ఆహారంలో మార్పులు.. లాంటివి సర్వ సాధారణంగా ఈ ప్రయత్నంలో ఉన్నవారు చేస్తుంటారు. ఈ సందర్భంలో డైటింగ్‌ అనేది ఎప్పుడూ ప్రముఖ పాత్ర వహిస్తూ ఉంటుంది. అయితే మునపటి రోజులతో పోలిస్తే ఈ ఏడాది డైటింగ్‌లో కొన్ని డైట్ల పేర్లు ఎక్కువగా వినిపించాయి. ఈ ఏడాది ట్రెండింగ్‌ డైటింగ్‌ మోడళ్లుగా నిలిచాయి. అవేంటంటే..

మెడిటేరియన్‌ డైట్‌ :

2023 సంవత్సరంలో ఎక్కువగా వినిపించిన డైట్‌ పేర్లలో మెడిటేరియన్‌ డైట్‌ ఒకటి. ఎక్కువ మొక్కల ఆధారిత ఆహారాలు, ఆరోగ్యకరమైన కొవ్వుల్ని ప్రధానంగా చేసుకుని ఈ డైటింగ్‌ చేస్తుంటారు. ప్రధానంగా నట్స్‌, ఆలివ్‌ ఆయిల్‌, చేపలు, చీజ్‌, రెడ్‌ మీట్‌ లాంటివి ఇందులో తరచుగా తినే ఆహారాలు. ఈ డైటింగ్‌ పేరు ఈ ఏడాదంతా ఆన్‌లైన్‌లో చక్కర్లు కొడుతూనే ఉంది. అనేక మంది డైటీషియన్లు దీనిపై వీడియోలు చేశారు. రెసిపీలను షేర్‌ చేశారు.

ఇంటర్మిటెన్‌ పాస్టింగ్‌ డైట్‌ :

ఇక ఈ ఏడాది ఎక్కువగా ప్రచారంలోకి వచ్చిన డైటింగ్‌ల్లో ఇంటర్మిటెన్‌ పాస్టింగ్‌ కూడా ఒకటి. ఇది ఎప్పటి నుంచో ఆచరణలో ఉన్నప్పటికీ ఈ ఏడాది దీనిపై ఎక్కువగా చర్చలు నడిచాయి. ఆచరించే వారూ ఎక్కువ అయ్యారు. విరాట్‌ కోహ్లీ, అనుష్క శర్మ లాంటి ప్రముఖులు కూడా దీన్ని పాటిస్తున్నట్లు చెప్పేసరికి.. దీని మీద క్రేజ్‌ చాలా మందిలో పెరిగిపోయింది. ఈ డైట్‌లో ఉన్న వారు దాదాపుగా పది గంటల పాటు మాత్రమే తినడానికి వీలు ఉంటుంది. రోజులో మిగిలిన 14 గంటల సమయం ఏమీ తినకుండా ఉండాలి.

కీటో డైట్‌ :

పరిశోధకులు, వైద్యులు ఎక్కువగా సిఫార్సు చేసే డైట్లలో కీటో డైట్‌ ఒకటి. 1920ల నుంచీ దీన్ని అనుసరించే వారు ఉన్నారు. అయితే మరీ ముఖ్యంగా ఈ డైట్‌ పేరు ఈ ఏడాదంతా వినిపిస్తూనే ఉంది. ఆరోగ్యకరమైన కొవ్వులు ఎక్కువగా, పిండి పదార్థాలు తక్కువగా ఉండే డైట్‌ ఇది. బరువు తగ్గాలనుకునే వారు, దీర్ఘ కాలిక వ్యాధుల బారిన పడిన వారు దీన్ని పాటిస్తూ వస్తున్నారు.

వేగన్ డైట్‌ :

జంతువులు, పర్యావరణానికి తమ వల్ల ఎక్కువ దుష్ప్రభావాలు కలగకూడదనే శాంతియుతమైన ఆలోచనలను కల వారు ఎక్కువగా వేగన్‌లుగా మారడాన్ని మనం చూస్తూ ఉంటాం. వీరు మాంసాలు, జంతు సంబంధమైన పదార్థాలు వేటినీ ముట్టరు. కేవలం మొక్కల ఆధారంగా వచ్చే వాటిని మాత్రమే తింటారు. ఈ ఏడాది ఇలాంటి డైట్‌ చేసే వారి సంఖ్య కూడా పెరిగిందని లెక్కలు చెబుతున్నాయి.