oats cutlet: రుచిగా, ఆరోగ్యంగా ఓట్స్ కట్లెట్..

ఊరికే ఓట్స్ తినడం రొటీన్ గా అనిపిస్తోందా. అయితే రుచిలో ఏమాత్రం తీసిపోని ఈ ఓట్స్ కట్‌లెట్ ఒకసారి ప్రయత్నించి చూడండి. తక్కువ నూనెతో చేసే ఈ వంటకం అల్పాహారంలోకి, పిల్లల లంచ్ బాక్సుల్లోకి చాలా బాగుంటుంది. నేరుగా తినొచ్చు. లేదా రోటీ మధ్యలో పెట్టి ఫ్రాంకీ లాగా కూడా పిల్లలకు ఇవ్వొచ్చు.

కావాల్సిన పదార్థాలు:

ఓట్స్ - 1 కప్పు

ఉడికించిన బంగాళదంప - 1

పనీర్ తురుము - పావు కప్పు

ఉల్లిపాయ- 1 చిన్నది

సన్నగా తరిగిన పచ్చిమిర్చి- 2

అల్లం వెల్లుల్లి ముద్ద - సగం టేబుల్ స్పూన్

క్యారట్ తురుము - సగం కప్పు

నూనె - 2 టేబుల్ స్పూన్లు

చాట్ మసాలా- 1 టీస్పూన్

ఆమ్ చూర్ పౌడర్ -పావు టేబుల్ స్పూన్

కొత్తిమీర - కొద్దిగా

ఉప్పు- తగినంత

తయారీ విధానం :

step 1: ఒక పెద్ద పాత్రలో ఓట్స్, పనీర్ తురుము, ఉడికించిన బంగాళ దుంప ముద్ద, సన్నగా తరిగిన ఉల్లిపాయ ముక్కలు, క్యారట్ తురుము, అల్లం వెల్లుల్లి ముద్ద, ఆమ్‌చూర్ పొడి, ఉప్పు, కొత్తిమీర వేసుకోవాలి.

step 2: ఇప్పుడు దీన్ని ముద్దలా కలుపుకోవాలి. అవసరమైతేనే నీళ్లు కొద్దిగా వాడండి.

step 3: ఇప్పుడు చిన్న చిన్న ఉండల్లాగా చేసుకుని చేతికి నూనె అద్దుకుని వాటిని ఒత్తండి. వడల్లాగా అయిపోవాలి.

step 4: తరువాత ఒక పెనం పెట్టుకుని వేడి చేసుకోవాలి. కొద్దిగా నూనె వేసుకుని అంతటా రాసుకోవాలి. మీడియం మంట మీద గ్యాస్ ఉంచి ఒత్తుకున్న కట్‌లెట్ లను దూరందూరంగా పెట్టుకోవాలి.

step 5: ఒకవైపు కనీసం రెండు నిమిషాలలుంచాక మరోవైపు కొద్దిగా నూనె వేసుకుని కాల్చుకోవాలి. అవి పూర్తిగా రంగు మారి ఉడికేంత వరకు అటూ ఇటు మారుస్తూ కాల్చుకోవాలి. అంతే ఓట్స్ కట్ లెట్ సిద్దం.