Salaar Prabhas Cutout: కటౌట్ చూసి నమ్మేయాలి డ్యూడ్.. ప్రభాస్ 120 అడుగుల కటౌట్ చూశారా?
18 December 2023, 15:55 IST
- Salaar Prabhas Cutout: సలార్ మూవీ కోసం ఏకంగా 120 అడుగుల ప్రభాస్ కటౌట్ ఏర్పాటు చేయడం విశేషం. అది కూడా తెలుగు రాష్ట్రాల్లో కాదు.. దేశ ఆర్థిక రాజధాని ముంబైలో.
ముంబైలో ఏర్పాటు చేసిన ప్రభాస్ 120 అడుగుల కటౌట్
Salaar Prabhas Cutout: దేశాన్ని సలార్ మూవీ మేనియా పట్టి ఊపేస్తోంది. అందులో భాగంగానే ముంబైలో ప్రభాస్ కు చెందిన 120 అడుగుల కటౌట్ ఏర్పాటు చేశారు. ఈ మహా నగరంలోని ఆర్ మాల్ లో ఈ అత్యంత భారీ కటౌట్ పెట్టడం విశేషం. ముంబైలో ఇప్పటి వరకూ ఏ సినిమా ప్రమోషన్ కోసం కూడా ఇంత భారీ కటౌట్ ఏర్పాటు చేయలేదు.
ఈ భారీ కటౌట్ ఏర్పాటు చేస్తున్న వీడియోను సలార్ అధికారిక ఎక్స్ సోషల్ మీడియా అకౌంట్ పోస్ట్ చేసింది. "ముంబైలోని ఆర్ మాల్ ఇప్పుడే సలారిఫైడ్ అయింది. ఈ యాక్షన్ ఎపిక్ కి ఉన్న హైప్ ఎలాంటిదో రెబల్ స్టార్ ప్రభాస్ 120 అడుగుల ఈ కటౌట్ చెబుతోంది. డిసెంబర్ 22 నుంచి సలార్ సీజ్ఫైర్ సినిమాస్ లో రాబోతోంది" అంటూ సలార్ టీమ్ ఓ వీడియో పోస్ట్ చేసింది.
ఈ వీడియోలో ఈ 120 అడుగుల భారీ ప్రభాస్ కటౌట్ ఎలా చేశారో చూపించారు. ఆ కటౌట్ చూసి ఆ దారిలో వెళ్తున్న ఫ్యాన్స్ ఆశ్చర్యపోతున్నారు. ప్రభాస్ కటౌట్ ను వీడియోలు, ఫొటోలు తీయడానికి పోటీ పడుతున్నారు. సెల్ఫీలు దిగుతున్నారు. సలార్ మూవీ డిసెంబర్ 22న రిలీజ్ కానుండగా.. సోమవారం (డిసెంబర్ 18) మధ్యాహ్నం రిలీజ్ ట్రైలర్ రిలీజ్ చేశారు.
ఈ ట్రైలర్ మొదటి ట్రైలర్ కంటే కూడా గూస్బంప్స్ తెప్పించేలా ఉంది. మొదటి ట్రైలర్ లో ప్రభాస్ ను చివర్లో చూపించిన మేకర్స్.. ఇందులో మాత్రం కాస్త ఎక్కువగానే అతడు కనిపించేలా జాగ్రత్త పడ్డారు. 2 నిమిషాల 53 సెకన్ల ఈ ట్రైలర్ ఖాన్సార్ నగర హింసాత్మక స్టోరీని కళ్లకు కట్టే ప్రయత్నం చేసింది.