Karthi: కార్తీ 'సర్దార్' తెలుగు రైట్స్ కొనుగోలు చేసిన నాగార్జున

కోలీవుడ్ యాక్టర్ కార్తీకి.. తమిళంతో పాటు తెలుగులోనూ మంచి ఫాలోయింగ్ ఉంది. ఆయన నటించిన సినిమాలు ఇక్కడ కూడా అనువాదమై మంచి వసూళ్లు సాధిస్తాయి. అందుకే బడా నిర్మాతలు సైతం ఆయన సినిమా హక్కులను కొనుగోలు చేసి ఇక్కడ విడుదల చేసేందుకు ఆసక్తి చూపుతుంటారు. తాజాగా ఈ హీరో నటిస్తోన్న తాజా చిత్రం సర్దార్‌ కోసం మన నిర్మాతలు పోటీ పడుతున్నారు. కానీ ఆ అవకాశం మాత్రం టాలీవుడ్ కింగ్ నాగార్జునే దక్కించుకున్నారు.

కార్తీ నటించిన సర్దార్ చిత్ర తెలుగు హక్కులను టాలీవుడ్ కింగ్ అక్కినేని నాగార్జున సొంతం చేసుకున్నారు.ఆయన సొంత బ్యానర్ అన్నపూర్ణ స్టూడియోస్ సంస్థ ద్వారా తెలుగు రాష్ట్రాల్లో పలు ప్రాంతాల్లో ఈ చిత్రాన్ని విడుదల చేయనున్నట్లు తెలుస్తోంది. కార్తీ-నాగార్జున కలిసి ఇప్పటికే ఊపిరి సినిమాలో కలిసి నటించిన విషయం తెలిసిందే. పీఎస్ మిత్రన్ దర్శకత్వంలో రానున్న ఈచిత్రంలో కార్తీ పోలీస్‌ అధికారి పాత్రలో కనిపించనున్నారు.

సర్దార్ చిత్రంలో కార్తీ డ్యూయల్ రోల్స్‌లో కనిపించనున్నారట. ఓ యువ పోలీస్ అధికారిగా, ఓ ఖైదీగా రెండు పాత్రల్లో కార్తీ అలరించనున్నారట. రజీషా విజయన్, రాశీ ఖన్నా ఇద్దరూ హీరోయిన్లుగా చేస్తున్నారు. నిన్నటి తరం హీరోయిన్ లైలా ఈ సినిమాలో కీలక పాత్రలో కనిపించనుంది. ఈ సినిమాతో తన సెకండ్ ఇన్నింగ్స్‌ను ఘనంగా ప్రారంభించాలని భావిస్తోంది. ఈమెతో పాటు చుంకీ పాండే, ప్రిన్స్, మునీశ్ కాంత్, మురళీ శర్మ తదితరులు కీలక పాత్రలో నటిస్తున్నారు. జార్జ్ విలియమ్స్ సినిమాటోగ్రాఫర్‌గా పనిచేస్తున్న ఈ సినిమాకు జీవీ ప్రకాశ్ సంగీతాన్ని అందిస్తున్నారు.

కార్తీ సర్దార్ ఈ దీపావళీకి ప్రేక్షకుల ముందుకు రానుంది. అయితే అప్పుడే హీరో అజిత్ సినిమా రానుండటంతో బాక్సాఫీస్ వద్ద పోటీ తప్పేలా లేదు. సర్దార్‌తో పాటు కార్తీతో విరుమాన్, పొన్నియన్ సెల్వన్ కూడా ఈ ఏడాదే ప్రేక్షకుల ముందుకు రానున్నాయి. ఆ చిత్రాలు సర్దార్ కంటే ముందే ఆగస్టు 15వ ఒకటి, సెప్టెంబరు 30న మరోకటి వరుసగా విడుదల కానున్నాయి.