Adipurush TV Premier Date: ఆదిపురుష్ టీవీలోకి వచ్చేస్తోంది.. ఎప్పుడు, ఏ ఛానెల్లో చూడాలంటే?

Adipurush TV Premier Date: ఆదిపురుష్ మూవీ టీవీ ప్రీమియర్ డేట్ వచ్చేసింది. ఓవైపు రెబల్ స్టార్ ప్రభాస్ తన తర్వాతి మూవీ సలార్: సీజ్ ఫైర్ రిలీజ్ కోసం ఎదురు చూస్తున్న వేళ.. ఆదిపురుష్ వరల్డ్ టీవీ ప్రీమియర్ డేట్ ను స్టార్ మా(Star Maa) వెల్లడించింది. ఈ సినిమా వచ్చే ఆదివారం (అక్టోబర్ 29) సాయంత్రం 5.30 గంటలకు రానున్నట్లు స్టార్ మా తెలిపింది.

భారీ అంచనాల మధ్య రిలీజైన ఆదిపురుష్ మూవీ.. బాక్సాఫీస్ దగ్గర బోల్తా పడిన విషయం తెలిసిందే. ప్రభాస్ రాముడిగా, కృతి సనన్ సీతగా, సైఫ్ అలీ ఖాన్ రావణాసురుడిగా నటించిన ఈ సినిమా ప్రేక్షకులను మెప్పించలేకపోయింది. తొలి మూడు రోజుల్లోనే భారీగా వసూలు చేసినా.. నెగటివ్ టాక్ తో తర్వాత కలెక్షన్లు పడిపోతూ వచ్చాయి.

ప్రభాస్ కు వరుసగా హ్యాట్రిక్ డిజాస్టర్ ను మిగిల్చింది. అంతకు ముందు సాహో, రాధేశ్యామ్ సినిమాలు కూడా బోల్తా పడిన విషయం తెలిసిందే. ఆదిపురుష్ మూవీకి ఓటీటీలోనూ పెద్దగా ఆదరణ లభించలేదు. అమెజాన్ ప్రైమ్ వీడియోలో ఈ సినిమా స్ట్రీమ్ అవుతోంది. హిందీ వెర్షన్ నెట్‌ఫ్లిక్స్ లో అందుబాటులో ఉంది. బాక్సాఫీస్ వైఫల్యంతో అనుకున్నదానికంటే ఎంతో ముందే ఈ సినిమా ఓటీటీలోకి వచ్చింది.

ఈ సినిమా రిలీజ్ సమయంలోనూ ఎన్నో వివాదాలు చెలరేగాయి. విమర్శలూ వచ్చాయి. రామాయణాన్ని పూర్తిగా నాశనం చేశారంటూ డైరెక్టర్ ఓంరౌత్ పై ఎంతో మంది విరుచుకుపడ్డారు. మరోవైపు ప్రభాస్ ప్రస్తుతం సలార్ కోసం ఎదురు చూస్తున్నాడు. ఈ సినిమా డిసెంబర్ 22న రిలీజ్ కానుంది. హ్యాట్రిక్ వైఫల్యాలతో ఢీలా పడిన ప్రభాస్.. ఈ సలార్ పై భారీ ఆశలే పెట్టుకున్నాడు.