Moon Eclipse : చంద్రగ్రహణం రోజు దుర్గగుడి మూసివేత

ChandraGrahanam : కార్తీక పౌర్ణమి నాడు ఏర్పడే చంద్ర గ్రహణం సందర్భంగా ఇంద్రకీలాద్రిపై ఉన్న దుర్గా మల్లేశ్వర స్వామి దేవస్థానం మూసివేయనున్నట్లు ఆలయ ఈవో భ్రమరాంబ ప్రకటించారు. నవంబర్ 8న రాహుగ్రస్త పాక్షిక చంద్రగ్రహణం సందర్భంగా దేవస్థానం వైదిక కమిటీ సూచనల ప్రకారం మంగళవారం ఉదయం 8గంటలకు ఆలయ తలుపులు మూసివేస్తారు.

దుర్గగుడితో పాటు ఇంద్రకీలాద్రిపై ఉన్న ఇతర ఉపాలయాలను కూడా మూసివేస్తారు. మంగళవారం సాయంత్రం ఆరున్నరకు తిరిగి ఆలయ కవాట ఉద్ఘటన చేసి దేవతా మూర్తులకు స్నపనాభిషేకాలు నిర్వహించిన తర్వాత అర్చన, మహానివేదన, హారతి కార్యక్రమాలను నిర్వహిస్తారు.

మంగళవారం ఉదయం 8గంటల్లోపు ఆర్జిత సేవలైన సుప్రభాత సేవ, ఖడ్గ మాలార్చన, గణపతి హోమం, నవగ్రహ శాంతి హోమం, రుద్రహోమాలు మాత్రమే నిర్వహిస్తారు.ఇంద్రకీలాద్రిపై ఉదయం ఏడు గంటల తర్వాత నిర్వహించే లక్ష కుంకుమార్చన, శాంతి కళ్యాణం, శ్రీచక్ర నవావరణార్చన, చండీహోమం, పంచ హారతులు, పల్లకీ సేవ వంటి సేవల్ని పూర్తిగా రద్దు చేస్తారు.చంద్రగ్రహణం వీడిన తర్వాత బుధవారం అన్ని రకాల దర్శనాలు, ఆర్జిత సేవలు పున:ప్రారంభించి యథావిధిగా నిర్వహిస్తారు.