Kyiv | ఉక్రెయిన్ దేశంపై రష్యా దండయాత్ర ప్రారంభించి వారం రోజులు గడిచింది. నేడు 8వ రోజూ యుద్ధం కొనసాగుతోంది. గత గురువారం నుంచి ఈరోజు గురువారం వరకు గ్యాప్ లేకుండా ఉక్రెయిన్ లోని పలు ప్రధాన నగరాలను లక్ష్యంగా చేసుకుంటూ రష్యా దాడులు చేస్తూనే ఉంది. తొలుత సైనిక స్థావరాలు, ప్రభుత్వ ఆస్తులే లక్ష్యంగా సాగిన దాడులు, రోజులు గడుస్తున్నా కొద్దీ మరింత భీకరంగా మారుతూ పౌరులు సంచరించే చోట కూడా క్షిపణి దాడులు జరుగుతున్నాయి.

అయితే ఉక్రెయిన్ వైపు నుంచి కూడా దీటైన ప్రతిఘటన ఎదురవుతుండటంతో ఇప్పటికీ రష్యా ఉక్రెయిన్ లోని పెద్ద నగరాలపై పట్టు సాధించలేకపోతుంది. వారం రోజుల దాడి తర్వాత ఎట్టకేలకు రష్యా దళాలు ఖెర్సన్ అనే ప్రధాన నగరాన్ని స్వాధీనం చేసుకున్నట్లు ప్రకటించాయి.

ఖెర్సన్ అనేది దక్షిణ ఉక్రెయిన్ లోని ఒక వ్యూహాత్మక ఓడరేవు కేంద్రం. ఈ నగరంలో సుమారు 300,000 మంది జనాభా నివసిస్తున్నారు. నల్ల సముద్రంలోకి ప్రవహించే డ్నీపర్ నదీ తీరాన ఉండే ఈ నగరం వ్యూహాత్మక రక్షణ కేంద్రంగా ఉంటుంది. ఈ నగరం స్వాధీనం చేసుకోవడం ద్వారా రష్యన్ దళాలకు సమీపంలోని క్రిమియన్ ద్వీపకల్పంపై నియంత్రణ ఉంటుంది. నదీ జలాలను కూడా తమ ఆధీనంలో ఉంచుకోవచ్చు. అంతకుముందు మెలిటోపోల్ అనే పట్టణాన్ని కూడా రష్యన్ దళాలు తమ నియంత్రణలోకి తీసుకున్నాయి.

ప్రస్తుతం రాజధాని కీవ్ నగరం, అలాగే రెండో అతిపెద్ద నగరమైన ఖార్కివ్‌ను రష్యన్ దళాలు చుట్టుముట్టాయి. ఈ నగరాలను తమ వశం చేసుకోడానికి దాడులను తీవ్రతరం చేశాయి. గత 72 గంటలుగా కీలక ఉక్రేనియన్ నగరాలపై ఎడతెరపి లేని దాడులు చేస్తున్నాయి. అయితే ఖెర్సన్ నగరం మినహా.. కీవ్, ఖార్కివ్, చెర్నిహివ్, మారియుపోల్ లాంటి నగరాలు ఇప్పటికీ ఉక్రేనియన్ నియంత్రణలో ఉన్నట్లు నివేదికలు వెల్లడిస్తున్నాయి.

ఇక, ఈ దాడుల భయంతో ఇప్పటివరకు 10 లక్షలకు పైగా జనం ఉక్రెయిన్ వీడారు. చాలా మంది ప్రజలు ఉక్రెయిన్ సరిహద్దులు దాటి పొరుగున ఉండే హంగేరీ, పోలాండ్, రొమేనియా, స్లొవేకియా, మాల్డొవా సహా ఇతర యురోపియన్ దేశాలకు వలస వెళ్తున్నారు.