Asian Games Hockey: సెమీస్‍లో భారత్ ఘన విజయం.. ఫైనల్‍ చేరిన టీమిండియా.. పతకం ఖరారు

చైనాలోని హాంగ్జౌలో జరుగుతున్న 19వ ఏషియన్ గేమ్స్‌లో భారత పురుషుల హాకీ జట్టు సత్తాచాటుతోంది. నేడు (అక్టోబర్ 4) దక్షిణ కొరియాతో జరిగిన సెమీఫైనల్‍లో భారత్ ఘన విజయం సాధించింది.

దక్షిణ కొరియాతో హాకీ సెమీ ఫైనల్‍లో 5-3 తేడాతో భారత పురుషుల జట్టు గెలిచింది. 

ఈ మ్యాచ్‍లో భారత్ తరఫున హార్దిక్ సింగ్ (5వ నిమిషం), మన్‍దీప్ సింగ్ (11వ ని.), లలిత్ కుమార్ ఉపాధ్యాయ్ (15వ ని.), అమిత్ రోహిదాస్ (24వ ని.), అభిషేక్ (54వ ని.) గోల్స్ చేశారు. 

దక్షిణ కొరియా తరఫున మాంజే జంగ్ (17వ, 20వ, 42వ నిమిషాల్లో) ఒక్కడే మూడో గోల్స్ చేశాడు. ఇక ఆది నుంచి దూకుడుగా ఆడిన భారత జట్టు 5 గోల్స్ చేసి విజయం సాధించింది. 

ఈ గెలుపుతో ఏషియన్ గేమ్స్ పురుషుల హాకీలో భారత జట్టు ఫైనల్ చేరింది. దీంతో పతకాన్ని ఖరారు చేసుకుంది. రెండో సెమీఫైనల్‍లో జపాన్, చైనా పోటీ పడనున్నాయి. ఈ మ్యాచ్ గెలిచిన జట్టుతో ఫైనల్‍లో తలపడనుంది భారత జట్టు. 

భారత పురుషుల జట్టు ఫైనల్‍లో గెలిస్తే స్వర్ణ పతకాన్ని కైవసం చేసుకుంటుంది. ఒకవేళ ఓడినా రజత పతకం దక్కుతుంది. అక్టోబర్ 6న ఫైనల్ జరగనుంది. 

ఇక, 19వ ఏషియన్ క్రీడల్లో భారత్‍కు ఇప్పటి వరకు (అక్టోబర్ 4, సాయంత్రం) 76 పతకాలు వచ్చాయి. ఇందులో 16 స్వర్ణాలు, 28 రజతాలు, 32 కాంస్యాలు ఉన్నాయి. షూటింగ్, అథ్లెటిక్స్ విభాగాల్లో ఎక్కువ పతకాలు వచ్చాయి.