Fire accident: తమిళనాడులోని బాణాసంచా తయారీ కేంద్రంలో భారీ పేలుడు; 9 మంది దుర్మరణం

Fire accident: తమిళనాడులోని విరుదు నగర్ జిల్లా, శివకాశీ తాలూకా, రెంగపాలయం గ్రామంలో ఘోరమైన అగ్ని ప్రమాదం చోటు చేసుకుంది. గ్రామ శివార్లలో ఉన్న ఒక బాణా సంచా తయారీ కేంద్రం, దానికి ఆనుకుని ఉన్న బాణాసంచా విక్రయ కేంద్రంలో మంగళవారం మధ్యాహ్నం ఈ అగ్నిప్రమాదం జరిగింది.

9 మంది మృతి

శివకాశీ తాలూకా, రెంగపాలయం గ్రామంలో కనిష్కర్ ఫైర్ వర్క్స్ పేరుతో ఒక బాణాసంచా తయారీ కేంద్రం నడుస్తోంది. ఆ కేంద్రానికి ముందు వైపు ఒక షాపు కూడా ఉంది. ఆ షాపులో బాణాసంచాను అమ్ముతుంటారు. దీపావళి పండుగ దగ్గర పడుతుండడంతో పెద్ద ఎత్తున బాణాసంచాను తయారు చేసి, నిల్వ చేశారు. మంగళవారం మధ్యాహ్నం ఆ షాపులో బాణాసంచా కొనుగోలు చేసిన కొందరు ఆ షాపు ముందే వాటిని కాల్చారు. అనుకోకుండా, ఒక ఫైర్ క్రాకర్ మండుతూ ఆ షాపులోకి దూసుకువెళ్లింది. దాంతో, ఒక్కసారిగా అందులోని బాణాసంచా పెద్ద ఎత్తున పేలడం ప్రారంభమైంది. గంటకు పైగా, ఈ పేలుళ్లు కొనసాగాయి. ఈ ప్రమాదంలో ఆ ఫైర్ క్రాకర్ ఫ్యాక్టరీలో పనిచేస్తున్న 9 మంది ప్రాణాలు కోల్పోయారు. పదుల సంఖ్యలో కార్మికులకు తీవ్రంగా గాయాలయ్యాయి.