Tata Steel : టాటా స్టీల్​ నికర లాభం 13శాతం పతనం- అదే కారణం!

Tata steel Q1 results 2022 : 2022-23 ఆర్థిక ఏడాది మొదటి త్రైమాసికం ఫలితాలను విడుదల చేసింది టాటా స్టీల్​ సంస్థ. ఏకీకృత నికర లాభం 12.83శాతం మేర పతనమై.. రూ. 7,764.96కోట్లకు చేరింది. గతేడాది ఇదే త్రైమాసికంలో టాటా స్టీల్​ ప్యాట్​(ప్రాఫిట్​ ఆఫ్టర్​ ట్యాక్స్​) రూ. 8,907కోట్లుగా ఉంది. ఇక జనవరి- మార్చ్​ త్రైమాసికంతో పోల్చుకుంటే.. ప్యాట్​ 20.4శాతం పడిపోయింది.

ఏప్రిల్​- జూన్​ త్రైమాసికంలో టాటా స్టీల్​ ఏకీకృత ఆదాయం.. 18.6శాతం పెరిగి, రూ. 63,430కోట్లకు చేరింది. గతేడాది ఇదే త్రైమాసికంలో ఆ విలువ రూ. 53,465కోట్లుగా ఉంది. గత త్రైమాసికంతో పోల్చుకుంటే.. ఇది 8.5శాతం తక్కువ.

కారణం ఇదే..

పెట్​ కోక్​ ధరలు పెరగడంతో నిర్వహణ ఖర్చులు భారీగా పెరిగాయి. ఫలితంగా జూన్​తో ముగిసిన త్రైమాసికంలో టాటా స్టీల్​ ఫైనాన్షియల్స్​పై ప్రభావం పడింది. ఎగుమతులపై కేంద్రం సుంకాలు విధించడం కూడా పరిశ్రమపై ప్రతికూల ప్రభావం చూపించింది.

"వడ్డీ రేట్ల పెంపు, చైనాలో కొవిడ్​ లాక్​డౌన్​ వల్ల ఈ త్రైమాసికంలో అంతర్జాతీయ, భారత ఆర్థిక వ్యవస్థకు అనేక సవాళ్లు ఎదురయ్యాయి. వీటన్నింటినీ ఛేదిస్తూ.. టాటా స్టీల్​ మంచి ప్రదర్శన చేస్తోంది. ప్రభుత్వం విధించిన సుంకాలను ఎదుర్కొనే విషయంలో మా వ్యవస్థ మెరుగ్గా పనిచేసింది," అని టాటాస్టీల్​ సీఈఓ టీవీ నరేంద్రన్​ వెల్లడించారు.

ఇదే సమయంలో టాటాస్టీల్​కి చెందిన యూరోప్​ వ్యాపారాలు అనుహ్యంగా వృద్ధిచెందాయి.

మరోవైపు ఈ త్రైమాసికంలో 7.74మిలియన్​ టన్నుల స్టీల్​ని సంస్థ ఉత్పత్తి చేసింది. గతేడాది ఇదే త్రైమాసికంతో పోల్చుకుంటే ఇది 1.8శాతం తక్కువ. ఎగుమతులపై సుంకాల కారణంగా అమ్మకాల వాల్యూంలు 7శాతం(ఇయర్​ ఆన్​ ఇయర్​) తగ్గిపోయాయి.

ఇండియాలో.. ఒక్క టన్ను స్టీల్​కు సంస్థ సంపాదిస్తున్న ఆదాయం.. గత త్రైమాసికంతో పోల్చుకుంటే రూ. 8,534కోట్లు పెరిగి.. రూ. 83,625కి చేరింది.

టాటాస్టీల్​ కన్సాలిడేటెడ్​ ఎబిట్​డా.. ఈ త్రైమాసికంలో రూ. 15,047కోట్లుగా ఉంది. గతేడాది ఇదే త్రైమాసికంతో పోల్చుకుంటే.. ఇది 7శాతం తక్కువ.

కానీ క్వార్టర్​ ఆన్​ క్వార్టర్​తో పోల్చుకుంటే.. ఎబిట్​డా మార్జిన్​.. 24శాతం మేర వృద్ధిని నమోదు చేసింది. ఇక జూన్​ త్రైమాసికం ముగిసే సమయానికి.. టాటా స్టీల్​కు రూ. 54,504కోట్ల అప్పులు ఉన్నాయి.

సోమవారం ట్రేడింగ్​ సెషన్​ ముగిసే సమయానికి.. టాటా స్టీల్​ స్టాక్​ రూ. 964 వద్ద స్థిరపడింది.