Stock market | ఇంకెన్నాళ్లు ఈ 'పతనం'.. మదుపర్లు ఇప్పుడు ఏం చేయాలి?

stock market outlook for next week | అమెరికా స్టాక్​ మార్కెట్లలో మొదలైన అమ్మకాల ఒత్తిడి.. ప్రపంచ దేశాల సూచీలను కుదిపేస్తోంది. ఫెడ్​ వడ్డీ రేట్ల పెంపు నిర్ణయంతో ద్రవ్యోల్బణం అదుపులోకి రాకపోవచ్చన్న అంచనాలతో మదుపర్లు విపరీతంగా షేర్లను విక్రయిస్తున్నారు. ద్రవ్యోల్బణం పెరిగితే, ప్రపంచ ఆర్థిక వ్యవస్థకు నష్టమని, ఫలితంగా ఫెడ్​ మరిన్ని చర్యలు చేపట్టవచ్చని మదుపర్లు ఆందోళన వ్యక్తం చేస్తున్నారు. ఫలితంగా అంతర్జాతీయ మార్కెట్లతో పాటు దేశీయ సూచీలు శుక్రవారం భారీగా పతనమయ్యాయి. మరి వచ్చే వారం పరిస్థితులు ఎలా ఉండనున్నాయి?

ఇవే కీలకం..

2021 అక్టోబర్​లో ఇండియా స్టాక్​ మార్కెట్లు ఆల్​ టైమ్​ హైని నమోదు చేశాయి. అప్పటి నుంచి డౌన్​ట్రెండ్​లో కొనసాగుతున్నాయి. ఒమిక్రాన్​తో కూడిన మూడో వేవ్​, రష్యా ఉక్రెయిన యుద్ధం, ద్రవ్యోల్బణం వంటి కారణాలతో సూచీలు భారీ ఒడిదొడుకులకు లోనవుతున్నాయి.

Stock market news | ఈ నేపథ్యంలో వచ్చే వారం దలాల్​ స్ట్రీట్​ను ప్రభావితం చేసే అంశాలను తెలుసుకోవడం ముఖ్యం. అవేంటంటే..

• త్రైమాసిక ఫలితాలు:- 2022 జనవరి- మార్చ్​ క్యూ4 ఫలితాల సీజన్​ నడుస్తోంది. ఇప్పటికే కొన్ని సంస్థలు ఫలితాలను వెల్లడించాయి. కాగా ఈ వారం పలు కీలక కంపెనీలు తమ త్రైమాసిక ఫలితాలను విడుదల చేయనున్నారు. అనేక సెక్టార్లకు చెందిన స్టాక్స్​ భవిష్యత్తు కదలికలు వీటిపై ఆధారపడి ఉంటాయని నిపుణులు అంటున్నారు.
• ద్రవ్యోల్బణం, బాండ్​ యీల్డ్స్​:- ద్రవ్యోల్బణం మరింత పెరుగుతుందని ఆర్​బీఐ వెల్లడించింది. కమోడిటీ ధరలు ఇప్పటికే భారీగా పెరిగాయి. ఆహార ఉత్పత్తుల ధరలు సైతం ఎక్కువగానే ఉన్నాయి. బాండ్​ యూల్డ్స్​ విపరీతంగా పెరుగుతున్నాయి. కంపెనీలకు ఖర్చులు ఎక్కువై, క్యాష్​ తగ్గుతుందని ఇవి సూచిస్తున్నాయి. దేశంలో ద్రవ్యోల్బణం పరిస్థితులు, వినియోగదారుల కొనుగోళ్ల శక్తి.. స్టాక్​ మార్కెట్లను ప్రభావితం చేయగలవు.
• అంతర్జాతీయ పరిణామాలు:- డాలర్​ ఇండెక్స్​ 20ఏళ్ల గరిష్ఠానికి చేరింది. స్వల్పకాలంలో డాలర్​ డిమాండ్​ కూడా పెరిగే అవకాశం ఉంది. ఫలితంగా ఎఫ్​ఐఐ(ఫారిన్​ ఇన్​స్టిట్యూషనల్​ ఇన్వెస్టర్లు)లు అమ్మకాలవైపే ఉండొచ్చు. డాలర్​ కదలికల్లో మార్పులు వస్తే.. ఎఫ్​ఐఐ మనసు మారవచ్చు! అందువల్ల డాలర్​ ఇండెక్స్​ను పరిశీలిస్తుండటం అవసరం. అంతర్జాతీయ పరిణామాలు, ద్రవ్యోల్బణం, బాండ్​ యూల్డ్స్​ కీలకం. ఫెడ్​ రేట్​ హైక్​తో మార్కెట్లు పడ్డాయి. అమెరికా, యూరోప్​ దేశాల ఆర్థిక వ్యవస్థలు ఎలా మారుతాయి అన్న అంశంపై ఇండియా మార్కెట్ల ఒడిదొడుకులు ఆధారపడే అవకాశం ఉంది.
• ఎఫ్​ఐఐలు మారితేనే:- గత కొన్ని నెలలుగా ప్రపంచవ్యాప్తంగా ఉన్న స్టాక్​ మార్కెట్లలో ఎఫ్​ఐఐలు భారీగా అమ్మకాలు చేస్తున్నారు. ఇందుకు దేశీయ స్టాక్​ మార్కెట్లేవీ అతీతం కాదు. రోజూ.. కొన్ని వేల కోట్ల విలువ చేసే షేర్లను విక్రయించేస్తున్నారు. అందువల్ల.. డీఐఐ(డొమెస్టిక్ ఇన్​స్టిట్యూషనల్​ ఇన్​వెస్టర్లు) ఎంత భారీగా కొనుగోళ్లు చేస్తున్నా, మార్కెట్లు లాభాలను చూడటం లేదు. అందువల్ల ఎఫ్​ఐఐలపై ఓ కన్నేసి ఉంచాలి. వారు అమ్మకాల జోరును కొనసాగించారా? లేక కొనుగోళ్లు మొదలుపెట్టారా? అన్నది ఎన్​ఎస్​ఈ సైట్​లో చూడవచ్చు.
• కమోడిటీ ధరలు:- చమురు, మెటల్​ ధరలు పెరిగితే.. ముడిసరకు ధరలు పెరుగుతాయి. ఫలితంగా కంపెనీల మార్జిన్లు కోసుకుపోతాయి. ఇది కంపెనీలకు నష్టమే. అందువల్ల స్టాక్​ మార్కెట్లకు కూడా నష్టమే. మొత్తం మీద.. చమురు, లోహాల ధరలను మార్కెట్లు ఎప్పటికప్పుడు పరిశీలిస్తూ ఉంటాయి.

'ఆ రోజులు పోయాయి..'

Stock market outlook | స్టాక్​ మార్కెట్ల నుంచి సులభంగా డబ్బులు సంపాదించే రోజులు పోయాయని, మంచి రిటర్నుల కోసం మదుపర్లు ఇక కష్టపడాల్సిందేనని స్వస్తిక ఇన్​వెస్ట్​మార్ట్​ ఎండీ సునీల్​ నైతి పేర్కొన్నారు. క్వాలిటీ స్టాక్స్​నే ఎంచుకుని, హోల్డ్​ చేయాలని సూచిస్తున్నారు. కంపెనీ భవిష్యత్తు బాగుంటుంది అని అనుకునే సంస్థల షేర్లను పరిశీలించాలని అంటున్నారు.

(గమనిక: ఇది కేవలం సమాచారం కోసం రూపొందించిన కథనం మాత్రమే. నిపుణుల అభిప్రాయాలతో హిందుస్థాన్​ టైమ్స్​కు ఎలాంటి సంబంధం లేదు. స్టాక్స్​లో పెట్టుబడులు పెట్టేముందు.. మీ ఫైనాన్షియల్​ ఎడ్వైజర్లను సంప్రదించడం శ్రేయస్కరం)