PM Vishwakarma : గ్యారెంటీ లేకుండానే రూ. 3లక్షల లోన్- 'పీఎం విశ్వకర్మ' పథకాన్ని ప్రారంభించిన మోదీ!
PM Vishwakarma : పీఎం విశ్వకర్మ పథకాన్ని తాజాగా లాంచ్ చేశారు ప్రధాని మోదీ. కళాకారుల కోసం ఈ స్కీమ్లో రూ. 3లక్షల వరకు రుణాలు ఇవ్వనున్నట్టు మోదీ వెల్లడించారు.
PM Vishwakarma : ప్రధానమంత్రి నరేంద్ర మోదీ పుట్టిన రోజుతో పాటు విశ్వకర్మ జయంతి నేపథ్యంలో.. ఆదివారం నాడు ఓ కొత్త పథకాన్ని ప్రారంభించింది కేంద్ర ప్రభుత్వం. ఈ 'పీఎం విశ్వకర్మ' స్కీమ్ను మోదీ స్వయంగా లాంచ్ చేశారు. కళాకారులు, హస్తకళాకారులు అభ్యున్నతే లక్ష్యంగా ఈ పథకాన్ని రూపొందించినట్టు ప్రధాని అన్నారు.
ఈ పీఎం విశ్వకర్మ కోసం కేంద్రం రూ. 13వేల కోట్లను ఖర్చు చేయనుందని మోదీ తెలిపారు. ఈ పథకం.. కళాకారులకు ఓ ఆశాకిరణం అని అభిప్రాయపడ్డారు.
PM Vishwakarma scheme : "18 విభాగాలపై దృష్టిసారించి.. రూ. 13వేల కోట్లను ఖర్చు చేస్తాము. ఈ పథకంలో చేరే వారిని విశ్వకర్మ పార్ట్నర్స్ అని పిలుస్తాము. వీరికి అన్ని విధాలుగా సాయం చేస్తాము. ఈ దేశంలోని కళాకారుల అభివృద్ధే లక్ష్యంగా మా ప్రభుత్వం అడుగులు వేస్తోంది," అని దిల్లీలోని ద్వారకాలో ఆదివారం జరిగిన.. స్కీమ్ లాంచ్ ఈవెంట్లో మాట్లాడారు మోదీ.
కేంద్రం చెబుతున్న దాని ప్రకారం.. విశ్వకర్మ పార్ట్నర్స్కు తొలుత ట్రైనింగ్ ఇస్తారు. ఆ సమయంలోనే రూ. 500 ఇస్తారు. రూ. 1500 విలువ చేసే టూల్ కిట్ని కూడా అందిస్తారు. కళాకారులు తయారు చేసిన ఉత్పత్తుల బ్రాండింగ్, ప్యాకేజింగ్, మార్కెటింగ్కు కేంద్ర ప్రభుత్వం సాయం చేస్తుంది. పార్ట్నర్స్కు విశ్వకర్మ సర్టిఫికేట్, ఐడీ కార్డ్ వంటివి లభిస్తాయి.
ఇదీ చూడండి:- Modi birthday wishes : ప్రధాని మోదీకి స్వయంగా బర్త్ డే విషెస్ చెప్పాలని ఉందా? ఇలా చేయండి..
"ఎలాంటి గ్యారెంటీ లేకుండానే రూ. 3లక్షల వరకు లోన్ ఇస్తాము. తొలుత రూ. 1లక్ష ఇస్తాము. దానిని సకాలంలో రీపేమెంట్ చేస్తే, మరో రూ. 2లక్షల రుణానికి అర్హత పొందుతారు. దీని వడ్డీ కూడా చాలా తక్కువగానే ఉంటుంది," అని విశ్వకర్మ పథకం గురించి ప్రధాని మోదీ వివరించారు.
What is PM Vishwakarma : స్కీమ్ అమల్లో భాగంగా.. తొలి సంవత్సరంలో 5లక్షల కుటుంబాలను కవర్ చేయాలని కేంద్రం నిర్ణయించుకుంది. 2028 ఆర్థిక ఏడాది నాటికి 30లక్షల కుటుంబాలను ఈ పథకం పరిధిలోకి తీసుకురావాలని భావిస్తోంది.
కార్పెంటర్, పడవ తయారీ, శిల్పి, బ్లాక్స్మిత్, సుత్తి వంటి ఆయుధాల తయారీ, లాక్స్మిత్, గోల్డ్స్మిత్, రాళ్లు కొట్టే వారు, కాబ్లర్, తాపి మేస్త్రీ, చీపురు తయారీ చేసేవారు, బార్బర్, ఆట వస్తువులు తయారీ చేసేవారు, బట్టలు కడిగే వారు, టైలర్, చేపల వేటకు ఉపయోగించే నెట్ను తయారు చేసే వారితో పాటు మొత్తం మీద 18 విభాగాలకు చెందిన వారు.. ఈ పీఎం విశ్వకర్మ పథకానికి అర్హులుగా కేంద్రం గుర్తించింది.
